Kpep N̄kpọ To Ikọ Abasi

Nso ke Akpanam man Inemesịt Odu ke Ubon Fo?

Ibuotikọ emi obụp mme mbụme emi ẹkemede ndidi emesibụp n̄ko, onyụn̄ owụt ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Ntak emi ndọ edide akpan n̄kpọ emi anamde ubon okop inemesịt?

Jehovah Abasi, emi edide Abasi inemesịt, ọkọtọn̄ọ ndọ. Ndọ enen̄ede edi akpan n̄kpọ emi anamde ubon ẹkop inemesịt koro enye anam owo ekeme ndibọk nditọ nte ọfọnde. Didie ke Abasi ese ndọ? Enye oyom ndọ ebịghi ke nsinsi, onyụn̄ oyom ebe ye n̄wan ẹsịn ndọ mmọ ke n̄wed ukara. (Luke 2:1-5) Abasi oyom ebe ye n̄wan ẹnam akpanikọ ẹnọ kiet eken. (Mme Hebrew 13:4) Efịbe edi n̄kukụre n̄kpọ emi ekemede ndinam Jehovah ayak Christian adian̄ade ndọ ọkọdọ owo en̄wen.—Kot Matthew 19:3-6, 9.

2. Didie ke ebe ye n̄wan ẹkpenam n̄kpọ ye kiet eken?

Jehovah okobot erenowo ye n̄wan ke usụn̄ emi mmọ mbiba ẹkemde ye kiet eken. (Genesis 2:18) Sia ebe edide ibuot ufọk, edi utom esie ndinọ ubon udia, ọfọn̄, ufọk, ye mme n̄kpọ eken nnyụn̄ n̄kpep mmọ n̄kpọ mban̄a Abasi. Enye ekpenyene ndinyịme ndikpa nnọ n̄wan esie. Ebe ye n̄wan ẹkpenyene ndima nnyụn̄ n̄kpono kiet eken. Sia mîdụhe eke mîsinamke ndudue, ebe ye n̄wan ẹkpenyene ndikpep ndifen nnọ kiet eken koro emi edi akpan n̄kpọ kiet emi anamde inemesịt odu ke ubon.—Kot Ephesus 4:31, 32; 5:22-25, 33; 1 Peter 3:7.

3. Ndi akpana ẹsuan ndọ emi inemesịt mîdụhe?

Edieke edide afo ye ebe fo ẹmenyene mfịna, ẹnen̄ede ẹsịn ifịk ẹwụt kiet eken ima. (1 Corinth 13:4, 5) Bible idọhọke ke ndidian̄ade ntie ekeme ndikọk mfịna ndọ. Edi edieke ebe enen̄erede ọdiọk n̄wan ukama, n̄wan oro ekeme ndibiere m̀mê ọyọfọn ika iso iyọ m̀mê idian̄ade itie. Ebe emi ukem n̄kpọ emi ọwọrọde ekeme ndinam ntre n̄ko.—Kot 1 Corinth 7:10-13.

  4. Nditọ, Jehovah oyom n̄kpọ etie didie ye mbufo?

Jehovah oyom mbufo ẹkop inemesịt. Enye ọnọ mbufo mfọnn̄kan item oro edinamde mbufo ẹkop inemesịt idahaemi. Enye oyom mbufo ẹdia ufọn ifiọk ete ye eka fo ẹnyụn̄ ẹkpep n̄kpọ ẹto se mmọ ẹkụtde ke uwem. (Colossae 3:20) Jehovah esikop inemesịt ke se ededi oro mbufo ẹnamde man ẹtoro enye.—Kot Ecclesiastes 11:9–12:1; Matthew 19:13-15; 21:15, 16.

5. Mme ete ye eka, nso ikeme ndinam nditọ mbufo ẹkop inemesịt?

Ana mbufo ẹsịn idem ẹnam utom man ẹnọ nditọ mbufo udia, ufọk, ye ọfọn̄. (1 Timothy 5:8) Edi man nditọ mbufo ẹkop inemesịt, oyom mbufo ẹkpep mmọ ndima Abasi nnyụn̄ n̄kpebe enye. (Ephesus 6:4) Nte afo amade Abasi ekeme ndinam nditọ fo ẹma enye n̄ko. Ndida Bible nnọ nditọ fo item ekeme ndinyene eti ufọn ke idemmọ.—Kot Deuteronomy 6:4-7; Mme N̄ke 22:6.

Nditọwọn̄ ẹsinen̄ede ẹma ndinam n̄kpọ ke ini ẹsịnde udọn̄ ẹnọ mmọ ẹnyụn̄ ẹtorode mmọ. Ana ẹnen̄ede mmọ ẹnyụn̄ ẹtụnọ mmọ n̄ko. Emi esinam mmọ ẹkûnam mme n̄kpọ emi mîdiyakke mmọ ẹkop inemesịt. (Mme N̄ke 22:15) Edi ikpanaha ẹfiomo nditọ ke ini ẹtụnọde mmọ.—Kot Colossae 3:21.

Mme Ntiense Jehovah ẹsio mme n̄wed emi ẹkemede ndin̄wam mme ete ye eka ye nditọ mmọ. Kpukpru se idude ke n̄wed emi ẹto Bible.—Kot Psalm 19:7, 11.

Edieke oyomde ndifiọk n̄kpọ en̄wen, se ibuot 14 ke n̄wed Nso Ke Bible Enen̄ede Ekpep?, emi Mme Ntiense Jehovah ẹsiode.