Bible Okpụhọde Mme Owo

NSO ikanam ete kiet emi ekedide ata idiọk inọ, emi ekesinyụn̄ ebrede mbre mfọniso okpụhọde? Kop se enye etịn̄de mi.

“Mma mma mbuba uwat enan̄-mbakara etieti.”​—RICHARD STEWART

N̄KAMANA KE 1965

NTO JAMAICA

NKEDI ABIATIBET YE OWO MBRE MFỌNISO

NTE N̄KESIDUDE UWEM: N̄kokpon ke Kingston, ibuot obio Jamaica. Mme owo ẹma ẹwak ẹnyụn̄ ẹbuene etieti. Utom ama anana etieti, ubiatibet onyụn̄ okpon. Ntre, mme owo ẹkedu uwem ke ndịk. Ekpere ndidi kpukpru usen ke n̄kesikop ẹtopde ikan̄.

Eka mi ikedịghe ifu, ntre enye ama anam ofụri se enye ekekeme ọnọ mi ye udọ eka mi ye adiahaeka mi. Enye ama ọdọn̄ nnyịn n̄wed. N̄kamaha n̄wed, n̄kama mbuba uwat enan̄-mbakara, ntre mma nsikpọn̄ n̄wed n̄ka itie mbuba emi, nsinyụn̄ n̄wat enan̄-mbakara do.

Ikebịghike, mma nnen̄ede nsịn idem ke mbre mfọniso emi ẹkesibrede ke itie uwat enan̄-mbakara emi. Mma ndu oburobụt uwem nnyụn̄ mma iban. Mma nsin̄wọn̄ ikọn̄ekpo, nnyụn̄ nyịp inọ man nnyene okụk nda ndu uwem nte mmade. Mma nnyene ediwak ikan̄, ndien mmokop inemesịt nte mmen̄kowotke owo ndomokiet ke ofụri ini emi n̄kesikade inọ.

Nte ini akakade, mme bodisi ẹma ẹmụm mi, ndien ẹma ẹsịn mi ke ufọk-n̄kpọkọbi ke ntak ubiatibet. Ke ẹma ẹkesio mi ke ufọk-n̄kpọkọbi, mma mfiak n̄kọtọn̄ọ ke ebiet emi n̄ketrede. Ke nditịm ntịn̄, mma ndiọk n̄kan akpa. Okposụkedi emi n̄kesikamade iso nte eti owo, n̄kedi owo isọn̄esịt, owo iyatesịt ye ibak. N̄kesikere mban̄a idemmi ikpọn̄.

NTE BIBLE OKOKPỤHỌREDE UWEM MI: Ke ini n̄kosụk ndude uwem ntem ke eka mi ekekpep Bible onyụn̄ akabade edi kiet ke otu Mme Ntiense Jehovah. Mma n̄kụt ke enye anam ukpụhọde ke uwem esie. Mma nyom ndifiọk se inamde eka mi okpụhọde, ntre mma ntọn̄ọ ndikpep Bible ye Mme Ntiense Jehovah.

Mma ndi ndikụt ke se Mme Ntiense Jehovah ẹkpepde okpụhọrede ye se mme ufọkabasi eken ẹkpepde; ke kpukpru se mmọ ẹkpepde ẹto Bible. Mmọ ẹdi n̄kukụre mbon emi n̄kọdiọn̄ọde nte ẹsikwọrọde ikọ ke ufọk ke ufọk ukem nte mme akpa Christian. (Matthew 28:19; Utom 20:20) Ndikụt nte Mme Ntiense Jehovah ẹnyenede ata ima ẹnọ kiet eken ama anam mfiọk ke mmokụt ido ukpono akpanikọ.—John 13:35.

Se n̄kekpepde ke Bible ama anam n̄kụt ke ana nnam akamba ukpụhọde. Mma ndifiọk ke Jehovah Abasi asasua use ndien ke edieke nyomde ndinem enye esịt, ke ana ntre kpukpru se isabarede obụkidem. (2 Corinth 7:1;  Mme Hebrew 13:4) Idem ama akpa mi ndifiọk ke n̄kpọ esitụk Jehovah ndien ke se nnamde ekeme ndiyat mîdịghe adat enye esịt. (Mme N̄ke 27:11) Mma mbiere nditre ikọn̄ekpo, ndiduọn̄ọ ikan̄ mi, nnyụn̄ n̄kpụhọde edu. N̄kpọ iba ẹkesọn̄ mi ẹkan nditre: uma iban ye mbre mfọniso.

Ke nsonso oro, n̄koyomke mme ufan mi ẹfiọk ẹte ke ami ke n̄kpep Bible ye Mme Ntiense Jehovah. Edi mma nduọk utọ ekikere emi ke ini n̄kokotde Matthew 10:33 emi ọdọhọde ete: “Owo ekededi eke akan̄de mi ke iso owo, ami n̄ko nyonyụn̄ n̄kan̄ enye ke iso Ete mi emi odude ke heaven.” Ikọ Jesus emi ama anam nsian mme ufan mi ke ami ke n̄kpep Bible ye Mme Ntiense Jehovah. Idem ama akpa mmọ etieti. Mmọ ikenịmke ke owo nte ami mmekeme ndiyom ndikabade ndi Christian. Ndien mma ndọhọ mmọ ke nyomke ndidu uwem aba nte n̄kesidude.

UFỌN ORO MBỌDE: Esịt ama enem eka mi etieti ke ini enye okokụtde nte ntọn̄ọde ndida mme edumbet Bible ndu uwem. Esit iduọhọ enye aba m̀mê nso efen ke ndinam. Imesinyụn̄ itie kiet ineme iban̄a nte imade Jehovah. Ndusụk ini mmesitie n̄kere nte n̄kesidude uwem, ndien idem esikpa mi etieti ndikụt mme ukpụhọde emi Abasi an̄wamde mi nnam. Idọn̄ke mi aba ndidu oburobụt uwem idiọkitọn̄ emi n̄kesidude.

Ekpedi n̄kenyịmeke etop Bible, ekeme ndidi n̄kpakpa mîdịghe ndu ke ufọk-n̄kpọkọbi idahaemi. Edi idahaemi, mmenyene ubon emi enemde etieti. N̄wan mi ye adiaha mi ẹfọn etieti ye ami, ndien enen̄ede enem mi nte mmọ ẹdianade ye ami ẹnam n̄kpọ Jehovah Abasi. Mmọkọm Jehovah etieti nte enye anamde mi ntiene ndụk esop emi ima ye edidianakiet okponde ntem. Mmokop inemesịt nte owo ekesịnde ukeme ekpep mi Bible. Mmenen̄ede mma nte nnyenede ifet ndin̄wam mbon en̄wen ẹfiọk se Bible ekpepde. Mmonyụn̄ n̄kọm Jehovah Abasi nte enye odụride mi adian ke idem ke ntak ima-mfọnido esie.

[Se ẹwetde ke ikpọ abisi ke page 11]

“[Mmedifiọk] ke n̄kpọ esitụk Jehovah, ndien ke se nnamde ekeme ndiyat enye mîdịghe adat enye esịt”

[Ndise ke page 11]

Ami ye n̄wan mi ye adiaha mi

[Ndise ke page 11]

Mma n̄kụt ukpụhọde emi eka mi akanamde