Kpep N̄kpọ To Ikọ Abasi

Ikpanam Didie Inyene Nti Ufan?

Ibuotikọ emi obụp mme mbụme emi ẹkemede ndidi emesibụp n̄ko, onyụn̄ owụt ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Ntak emi ikpetịmde idiọn̄ọ mbon emi inamde ufan?

Ediwak owo ẹsiyom mme owo ẹma mmimọ. N̄kpọ emi esinam nnyịn ikpebe mme ufan nnyịn. Mme ufan nnyịn ẹsinam nnyịn idu utọ uwem emi nnyịn idude. Ke ntre, edieke inamde ufan ye mbon ọniọn̄, iyenyene ọniọn̄, edi edieke inamde ufan ye mme ndisịme, idinyụn̄ idi ndisịme.—Kot Mme N̄ke 4:23; 13:20.

David emi spirit Abasi akadade usụn̄ ndiwet Bible ama etịm ọdiọn̄ọ mbon emi enye akanamde ufan. Enye akanam ufan ye mbon emi ẹken̄wamde enye ọsọn̄ọ ada anam n̄kpọ Abasi. (Psalm 26:4, 5, 11, 12) Ke uwụtn̄kpọ, David ama okop inem ufan ye Jonathan koro Jonathan ama an̄wam enye ọbuọt idem ye Jehovah.—Kot 1 Samuel 23:16-18.

2. Didie ke afo ekeme ndidi ufan Abasi?

Okposụkedi emi Jehovah edide Ata Ọkpọsọn̄ Abasi, nnyịn imekeme ndinam ufan ye enye. Ke uwụtn̄kpọ, Abraham ekedi ufan Abasi. Enye ama ọbuọt idem ye Jehovah onyụn̄ okop uyo esie, ntre Jehovah akada enye nte ufan imọ. (Genesis 22:2, 9-12; James 2:21-23) Edieke ibuọtde idem ye Jehovah inyụn̄ ikopde uyo esie, nnyịn n̄ko imekeme ndidi ufan esie.—Kot Psalm 15:1, 2.

  3. Didie ke nti ufan ẹkeme ndin̄wam fi?

Nti ufan ẹyesọn̄ọ ẹda ye afo ẹnyụn̄ ẹn̄wam fi anam se inende. (Mme N̄ke 17:17; 18:24) Ke uwụtn̄kpọ, kpa ye emi Jonathan ọkọsọn̄ọde David ke n̄kpọ nte isua 30, okpokonyụn̄ edide edidem Israel, enye ama ọsọn̄ọ ada ye David onyụn̄ an̄wam enye nte owo emi Abasi emekde edidem. N̄kpọ efen edi ke nti ufan idikopke ndịk ndinen̄ede fi ke ini mmọ ẹkụtde fi anamde se idiọkde. (Psalm 141:5) Mme ufan emi ẹmade Abasi ẹyen̄wam fi enyene nti ido.—Kot 1 Corinth 15:33.

Emekeme ndikụt mbon emi ẹtienede ẹma se inende ke Ufọkmbono Obio Ubọn̄ Mme Ntiense Jehovah. Mi ke edikụt mme ufan emi ẹdisịnde udọn̄ inọ fi enem Abasi esịt.—Kot Mme Hebrew 10:24, 25.

Edi, idem mme ufan emi ẹmade Abasi ẹkeme ndinam se ibiakde nnyịn ndusụk ini. Kûyak emi anam ọsọp ayat esịt ye mmọ. (Ecclesiastes 7:9, 20-22) Ti ete ke idụhe owo ndomokiet emi ọfọnde ama, n̄ko ke nti ufan emi ẹmade Abasi ẹdi n̄kpọuto ẹnọ nnyịn. Ikọ Abasi ọdọhọ ifen inọ nditọete nnyịn.—Kot Colossae 3:13.

4. Nso ke akpanam edieke mbon emi ẹdọhọde ke idi ufan fo ẹbiọn̄ọde fi ndinam n̄kpọ Abasi?

Ediwak owo ẹkụt ke ndusụk ufan mmimọ ẹsitọn̄ọ ndibiọn̄ọ mmimọ ke ndondo oro itọn̄ọde ndikpep Bible. Ekeme ndidi utọ mme ufan emi idiọn̄ọke ke item Bible enyene ufọn inyụn̄ idiọn̄ọke idotenyịn emi Bible anamde fi enyene. Afo emekeme ndin̄wam mmọ ẹfiọk mme n̄kpọ emi.—Kot Colossae 4:6.

Edi ndusụk ufan ẹsikam ẹda eti mbụk Bible ẹnam n̄kpọ nsahi. (2 Peter 3:3, 4) Ndusụk mmọ ẹkeme ndisak fi ke ntak emi an̄wanade ndinam se inende. (1 Peter 4:4) Edieke emi etịbede, afo enyene ndibiere m̀mê ayaka iso anam ufan ye mmọ m̀mê edinam ye Abasi. Edieke emekde Abasi, ọwọrọ ke emek mfọnn̄kan ufan.—Kot James 4:4, 8.

Edieke oyomde ndifiọk n̄kpọ en̄wen, se ibuot 12 ye 19 ke n̄wed Nso ke Bible Enen̄ede Ekpep?, emi Mme Ntiense Jehovah ẹsiode.