Mme Andikot N̄wed Nnyịn Ẹbụp Ẹte . . .

Ndi Isọn̄ Emi Oyodu Ebe 2012?

▪ “Mbon oro ẹnịmde ke isọn̄ emi ọmọn̄ ebe efep ẹbụn̄ọ nte ifian̄ ẹdụk ekpri obio kiet ke France . . . Mmọ ẹdọhọ ke emi editịbe ke December 21, 2012, kpa usen emi ẹdọhọde ke edidi utịt ọyọhọ isua 5,125 ke n̄wed usenọfiọn̄ mbon Maya eset.”—Mbụk N̄kpọntịbe BBC.

Isọn̄ emi oyodu ebịghi inamke n̄kpọ m̀mê nso ke inua-okot ntaifiọk, mme etịn̄ ini iso eyo emi, ye mme adaiso ido ukpono emi ẹsiwakde ndikwọrọ ke ererimbot ọmọn̄ ebe efep, ẹtịn̄. Ke akpanikọ, isọn̄ emi oyodu ebe isua 2012 onyụn̄ aka iso odu ke nsinsi.

Bible ọdọhọ ete: “Emana kiet ebe, emana efen onyụn̄ edi; edi isọn̄ ada ke nsinsi.” (Ecclesiastes 1:4) N̄ko, Isaiah 45:18 ọdọhọ ete: “Ntem ke Jehovah ọdọhọ, . . . kpa Andibot isọn̄ ye Andinam enye, Enye emi ọkọsọn̄ọde owụk enye, emi mîkobotke enye ke ikpîkpu, emi okobotde enye man ẹdụn̄ ke esịt: ‘Ami ndi Jehovah, ndien baba kiet efen idụhe.’” Nso ke emi ọwọrọ?

Ndi odu edima ete emi akpadade ini ọdiọn̄ n̄kpọmbre ọnọ eyen esie, ekem abiat n̄kpọmbre oro esisịt ini ke ama ọkọkpọn̄ ọnọ enye? Utọ n̄kpọ oro ọkpọdiọk ebe nde! Kpasụk ntre, Abasi okobot isọn̄ emi ọnọ mme owo man mmọ ẹnen̄ede ẹkop inemesịt. Abasi ọkọdọhọ Adam ye Eve ete: “Mbufo ẹtọt ẹnyụn̄ ẹwak ẹnyụn̄ ẹyọhọ ke isọn̄ ẹnyụn̄ ẹkan enye.” Ekem, “Abasi [ama] okụt kpukpru se enye akanamde, ndien sese! [mmọ ẹma] ẹfọn etieti.” (Genesis 1:27, 28, 31) Abasi ikpụhọkede uduak esie kaban̄a isọn̄ emi, ntre, enye idiyakke ẹsobo enye. Kop se Jehovah etịn̄de mi aban̄a kpukpru un̄wọn̄ọ esie: “Ikọ mi emi ọwọrọde mi ke inua . . . idifiakke itiene mi ubọk ubọk, edi ayanam se mmade, onyụn̄ okụt unen ke se ndọn̄de enye.”—Isaiah 55:11.

Nte ededi, Jehovah aduak ‘ndisobo mbon oro ẹbiatde isọn̄.’ (Ediyarade 11:18) Enye ọn̄wọn̄ọ ọnọ nnyịn ke Bible ete: “Ndinen owo ẹyedụn̄ ke isọn̄, mmọ eke mînyeneke nduduọhọ ẹyenyụn̄ ẹsụhọ ke esịt. Edi ẹyesobo mme idiọkowo ẹfep ke isọn̄; ndien amaedi mbon abian̄a, ẹyesọhi mmọ ẹfep ke esịt.”—Mme N̄ke 2:21, 22.

Ini ewe ke emi editịbe? Jesus ọkọdọhọ ke “baba owo kiet ifiọkke usen m̀mê hour oro, mme angel ke heaven ifiọkke, Eyen inyụn̄ ifiọkke, ke mîbọhọke Ete.” (Mark 13:32) Mme Ntiense Jehovah idọhọke owo ndomokiet ke mmimọ imọfiọk usen emi Abasi edisobode mme idiọkowo. Okposụkedi emi mmọ ẹfiọkde “idiọn̄ọ” utịt ini emi ẹnyụn̄ ẹnịmde ke akpanikọ ke nnyịn idu ke ini emi Bible okotde “mme akpatre usen,” mmọ ifiọkke ata ata ini emi utịt edidide. (Mark 13:4-8, 33; 2 Timothy 3:1) Mmọ ẹyak n̄kpọ emi ẹsịn Ete mmọ eke heaven ye Eyen esie ke ubọk.

Mbemiso utịt emi edide, Mme Ntiense Jehovah ke ẹsịn idem ẹkwọrọ eti mbụk Obio Ubọn̄ Abasi, kpa ukara heaven emi edinamde isọn̄ akabade edi paradise, emi ‘ndinen owo ẹdidade inyene, inyụn̄ idụn̄ ke esịt ke nsinsi.’—Psalm 37:29.

[Ebiet Ẹdade Ndise Ẹto ke page 10]

Image Science and Analysis Laboratory, NASA-Johnson Space Center