Bible Okpụhọde Mme Owo

NSO ikanam ete kiet emi ekesitọde un̄wọn̄, emi okonyụn̄ enen̄erede ama ido ukpono esie etre nditọ un̄wọn̄ onyụn̄ ọkpọn̄ ido ukpono esie? Mma kiet emi ekedide owo mmịn akasan̄a didie okpụhọde? Yak mmọ ẹtịn̄ ẹnọ fi.

“Esịt Enen̄ede Enem Mi Ndisịne ke Otu Ikọt Abasi.”—DINO ALI

N̄KAMANA KE 1949

NTO AUSTRALIA

N̄KESITỌ UN̄WỌN̄

NTE UWEM MI EKETIEDE: Ete ye eka mi ẹketo Albania ke 1939 ẹdidụn̄ ke Mareeba, ekpri obio kiet ke Queensland ke Australia. Ediwak mbon Bosnia, Greece, Italy, Serbia, ye mme idụt en̄wen ẹma ẹdi ẹdidụn̄ mi nde, ẹnyụn̄ ẹka iso ẹdu uwem nte mmọ ẹkesidude ke edem mmọ. Akpan ubọkutom mbon Mareeba ekedi utọ un̄wọn̄, ndien se ete ye eka emi ẹkenyụn̄ ẹnamde edi oro.

Mi ke kpukpru nnyịn ikamana—oro edi, adiahaeka mi, akpaneka mi, udọeka mi, ye ami. Edi ifehesịt ama owot ete mi ke ini n̄kedide isua kiet kpọt. Eka mi ama afiak ọdọ ebe onyụn̄ aman nditọ inan̄ en̄wen. Kpukpru nnyịn ikodụn̄ọ ntre inam utom ke in̄wan̄ un̄wọn̄ ebeeka mi.

N̄kọyọhọke isua 20 ke ini n̄kenyenede ufọk idemmi. Ke mma n̄kebe isua 20, mma ndọ Saime ke ido mme Muslim sia nnyịn mbiba ikedide mme Muslim. Kpukpru mbon nnyịn ẹkedi Muslim. Mma nsikot Koran ye n̄wed emi etịn̄de n̄kpọ aban̄a Muhammad. Mma nsinyụn̄ n̄kot ekpri Bible oro n̄kenyenede. Koran asiak ndusụk mme prọfet oro Bible asiakde n̄ko, edi Bible akanam mfiọk ini emi mme prọfet emi ẹkedude mi ke isọn̄.

Mme Ntiense Jehovah ẹma ẹsidi ufọk mi ke ubọk ke ubọk ẹdinọ mi magazine ye mme n̄wed en̄wen. Ami ye n̄wan mi ima isima ndikot mme n̄wed emi. Ke nteti nte n̄kesifakde mmọ mbụme, ndien mmọ ẹma ẹsida Bible ẹbọrọ kpukpru mbụme mi, utu ke nditịn̄ ekikere idemmọ. Emi ama enen̄ede otụk mi.

Mme Ntiense ẹma ẹyom ndikpep mi Bible ẹsinyụn̄ ẹkot mi mbono esop mmọ, edi  n̄kesinyịmeke. Se ikebehede mi ekedi ndinyene in̄wan̄ un̄wọn̄ idemmi ye ediwak nditọ. Okposụkedi emi mmen̄kenyeneke in̄wan̄ un̄wọn̄, mma nnyene ndiye nditọ ition.

NTE BIBLE OKOKPỤHỌREDE UWEM MI: N̄kosụk ndedi owo Muslim idem ke ofụri isua usụkkiet ẹma ẹkebe tọn̄ọ n̄kosobo ye Mme Ntiense Jehovah. Edi mma nsima ndibọ nnyụn̄ n̄kot kpukpru n̄wed mmọ. Mma nsitie ye n̄wan mi kpukpru Sunday n̄kot mme n̄wed emi. Nnyịn ikọduọkke n̄wed emi ndomokiet. Mmọ ẹma ẹnen̄ede ẹn̄wam mi ke ini mme owo ẹkeyomde ndinam mfre enyịn mban̄a obufa ido ukpono oro n̄kọtọn̄ọde ndima mi.

Ke uwụtn̄kpọ, pastọ kiet ama odomo ndinam mi nnịm ke Jesus edi Andinyan̄a ubonowo, idịghe Muhammad. Pastọ emi ama anam eyeneka an̄wan mi ye eyeneka mi ẹtiene enye. Ikebịghike, mbon oro n̄kọdiọn̄ọde ke nsio nsio ido ukpono ẹma ẹdomo ndinam mi nsitiene ndụk ido ukpono mmọ. Ndusụk mmọ ẹma ẹnọ mi n̄wed emi ẹdoride Mme Ntiense Jehovah ikọ. Mma ndọhọ mmọ ẹwụt mi ebiet emi mmọ ẹdade ukpepn̄kpọ mmọ ke Bible, edi mmọ ikekemeke.

Kpukpru emi ẹkekam ẹnanam mi nda mme n̄wed oro Mme Ntiense ẹkenọde mi nnen̄ede ndụn̄ọde Bible. Ke akpatre, mma ndikụt ke akpana nnam se nsikpepde.

Ntiense ndomokiet ikekpepke mi Bible kan̄a ke ini n̄kọtọn̄ọde ndidụk mme mbono esop mmọ. Idem ama esinyek mi ke nsonso oro, nsinyụn̄ n̄kop bụt, edi se ikan̄wamde mi edi nte ke mbon oro n̄kosobode ke mme mbono esop oro ẹkesitie ufan ufan, se ẹkekpepde ama esinyụn̄ enem mi. Mma mbiere ndidi kiet ke otu Mme Ntiense Jehovah. Ntre mma nna baptism ke 1981 ndiwụt ke mma nyak idem nnọ Jehovah.

N̄wan mi ikafịnake mi okposụkedi emi enye ekesikerede ndusụk ini m̀mê ẹkam ẹbabian̄a mi. Kpa ye oro, enye ama edise nte ẹnịmde mi baptism. Mma n̄ka iso n̄wụt enye se n̄kpepde ke Bible. Usen kiet, ke n̄kpọ nte isua kiet ama ekebe tọn̄ọ n̄kana baptism, ke ini ami ye n̄wan mi ikọnyọn̄de udia uwem, enye ama ọdọhọ mi ke imọ n̄ko iyom ndidi Ntiense. Idem ama akpa mi tutu n̄kpere ndiwat ndụk ikọt! Enye akana baptism ke 1982.

Ikememke utom ndikpụhọde. N̄kenyene nditre utọ un̄wọn̄ sia oro mîkemke ye se Bible ekpepde. (2 Corinth 7:1; James 2:8) Ama onyụn̄ ada ini mbemiso ikekemede ndinyene eti utom. N̄ko, ndusụk iman nnyịn ẹma ẹsọn nnyịn ke ediwak isua, edi nnyịn ikosụk imama mmọ nte Bible etemede. Nte ini akakade, mmọ ẹma ẹfiak ẹtọn̄ọ ndidian idem ye nnyịn.

UFỌN ORO MBỌDE: Mmokụt ukụt ke uwem emi—ukọbọ mbonufọk, unana okụk, ye edikop bụt. Edi kpa ye kpukpru emi, Jehovah ke osụk an̄wan̄wam mi nyọ. Emi anam n̄kụt ke Jehovah edi ata Abasi ime.  Ke uwụtn̄kpọ, ndi ebiowo idahaemi, mmesinyụn̄ nda ke mbot utịn̄ikọ n̄kpep ofụri esop n̄kpọ. Okposụkedi emi idem esinyekde mi tutu ntọn̄ọ ndikekek ikọ, mmesibọn̄ akam kpukpru ini nte Jehovah an̄wam mi; enye n̄ko onyụn̄ an̄wam mi n̄ka iso nnam utom mi ke esop.

Ami ye n̄wan mi imenen̄ede ikpere kiet eken. Kpa ye oro ikesinamde ndudue ke nte ibọkde nditọ nnyịn, ima isidomo ofụri ukeme ndikpep mmọ ikọ Abasi. (Deuteronomy 6:6-9) Idahaemi, akpan nnyịn ye n̄wan esie ẹdi mme ọkwọrọikọ oro ẹsinọde ẹka nsio nsio idụt.

Ke nteti ini oro ikọtọn̄ọde-tọn̄ọ ndidụk mbono esop Mme Ntiense Jehovah. Ke ima ikọwọrọ ke ubomisọn̄, mma mbụp ikọtufọk mi m̀mê mmanie ke mmọ ẹkụt ke esịt ufọkmbono oro. Mmọ ẹkedọhọ ke ikụt nditọ nnyịn, mbon Albania, ye mbon Croatia nte ẹtiede ntre ẹneme nneme ẹsak imam. Esịt enen̄ede enem mi ndisịne ke otu ikọt Abasi emi ẹtiede nte ata nditọeka mi ke ofụri ererimbot.—1 Peter 5:9.

“Adiahaeka Mi Ikakpaha Mba Ndin̄wam Mi.”—YELENA VLADIMIROVNA SYOMINA

N̄KAMANA KE 1952

NTO RUSSIA

N̄KEDI OWO MMỊN, MMA NNYỤN̄ NDOMO NDIWOT IDEM

NTE UWEM MI EKETIEDE: N̄kamana ke Krasnogorsk, ekpri ediye obio kiet ke mbọhọ Moscow. Ete ye eka mi ẹkesikpep n̄wed. Mma nnen̄ede ndiọn̄ọ n̄wed nnyụn̄ n̄kpep ikwọ ke ufọkn̄wed. Eketie nte nyoforo.

Ke mma n̄kọdọ ebe, ami ye ebe mi ima iwọrọ ikodụn̄ ke ebiet emi mme owo ẹdude ntịme ntịme uwem—ẹsụn̄i owo, ẹdiọk ikọ inua, ẹkpa mmịn, ẹsinyụn̄ ẹn̄wọn̄ sika. N̄kọdiọn̄ọke ke utọ uwem emi ekeme ndibe mi. N̄kesitiene mmọ n̄ka itie udia uwem man n̄kọkwọ ikwọ nnyụn̄ mmia kita. Edi mma nsesịm do, mme owo ẹyenọ mi sika ye mmịn. Ikebịghike, mma n̄kabade owo mmịn.

Mmịn ama ekpere ndida mi ibuot. Nte ini akakade, uwem ama odorode mi tutu n̄kpọ ndomokiet idọn̄ke mi ndidia; n̄kpa kpọt ọkọdọn̄ mi. Ntre, usen kiet, mma ndomo ndiwot idem, edi n̄kekemeke. Idahaemi, mma nsitie n̄kere se iketịbede, mmesinen̄ede n̄kọm Abasi nte mmen̄kowotke idem.

Adiahaeka mi ikakpaha mba ndidi ndise mi ke ofụri ini emi. Enye ekedi kiet ke otu Mme Ntiense Jehovah, ntre, enye ama odomo ndiwụt  mi nte Bible ekemede ndin̄wam mi. Edi n̄koyomke ndikop n̄kpọ ndomokiet ke Bible, ntre, mma nyom n̄kpọ nnam man enye etre ndidi edem mi. Edi adiahaeka mi ikakpaha mba ndin̄wam mi. Nte enye akamade mi onyụn̄ emede ime ye ami ama anam nnyịme ndikpep Bible ndien.

NTE BIBLE OKOKPỤHỌREDE UWEM MI: Mma mbiere nditre mmịn ke mma n̄kọtọn̄ọ ndikpep Bible. Kpa ini emi ke akpammịn kiet ke mbọhọ nnyịn akamia mi obụn̄ n̄kan̄, ndien akayak nsịn̄ enye ekpekesịri mi enyịn. Ama enen̄ede ọdiọk tutu ẹmen mi ẹkenịm ke ufọkibọk. Edi ndina ke ufọkibọk ama akam ọfọn ye ami, sia emi ikayakke ndọn̄ọ nte mbon en̄wen ẹsidọn̄ọde ke ini ẹtrede mmịn.

N̄katak ke akam ofụri ini emi n̄kanade ke ufọkibọk. Odu itie Bible kiet emi ekenen̄erede ọdọn̄ mi esịt, oro edi, N̄wed Eseme 3:55, 56 emi ọdọhọde ete: “O Jehovah nsịne ke ata editụn̄ọ obube nseme n̄kot enyịn̄ fo. Kop uyo mi. Kûmen utọn̄ fo ufep utre ndin̄wam mi kûnyụn̄ utre ndikop eseme oro nsemede nyom un̄wam.”

Mmenen̄ede nnịm ke Jehovah ama okop akam mi. Odudu oro Jehovah ọkọnọde mi ikayakke mfiak ndu uwem nditaha oro n̄kodude. Ama odu mme ini emi mmịn akafiakde ọdọn̄ mi, edi esịt enem mi ndidọhọ ke mma mbe utọ idomo oro.

Nte n̄kosụk n̄kpepde Bible, mma ndikụt ke ebe edi ibuot ọnọ n̄wan, ndien ke ana n̄wan ebere ye ebe esie. (1 Peter 3:1, 2) Ama enen̄ede ọsọn̄ mi ndinam item Bible emi sia n̄kesitie ukara ukara ye ebe mi. Ntre, mma mbọn̄ akam nte Jehovah an̄wam mi n̄kpụhọde. Ama ada ini mbemiso n̄kemede ndikpụhọde; edi sụn̄sụn̄, mma ntọn̄ọ ndinam n̄kpọ nte eti an̄wan nnyụn̄ nnen̄ede mbere ye ebe mi.

Idem ama enen̄ede akpa ebe mi ndikụt utọ ukpụhọde emi. Enye ikesimaha nneme Bible. Edi ke ini n̄kebierede nditre sika, enye ama ọdọhọ mi ete: “Edieke etrede sika, nyọtọn̄ọ ndikpep Bible!” Nnyịn mbiba iketre sika usen kiet.

UFỌN ORO MBỌDE: Ebe mi ama ọtọn̄ọ ndikpep Bible nte enye ọkọdọhọde. Idahaemi, imesitie ọtọkiet ikot Bible kpukpru usen, itie ikere se ikotde, inyụn̄ idomo ndida se ikotde ndu uwem.

Inua ikemeke ndibụk adan̄a nte uwem enemde nnyịn idahaemi—ntịn̄ke-tịn̄ ufọn oro ami ke idemmi ndiade. Mmenen̄ede n̄kọm Jehovah ke ndikodụri mi ndian idem. (John 6:44) Mmọkọm adiahaeka mi n̄ko emi mîkakpaha mba ndin̄wam mi. Mmenen̄ede n̄kụt ke idemmi ke Bible ekeme ndikpụhọde owo.

[Se ẹwetde ke ikpọ abisi ke page 11]

Mma ndikụt ke akpana nnam se nsikpepde

[Se ẹwetde ke ikpọ abisi ke page 13]

Nte adiahaeka mi akamade mi onyụn̄ emede ime ye ami ama anam nnyịme ndikpep Bible ndien