Nso Idi Armageddon?
Nso Idi Armageddon?
“Spirit mme demon . . . ẹwọn̄ọ ẹka ke ọtọ ndidem ofụri isọn̄ . . . Ndien ẹtan̄ mmọ ẹbon ọtọkiet ke ebiet emi ẹkotde ke usem Hebrew, ete, Har–Magedon.”—EDIYARADE 16:14, 16.
ARMAGEDDON emi ẹsinyụn̄ ẹkotde “Har–Magedon” edi enyịn̄ ebiet. Edi idụhe ebiet ndomokiet ke isọn̄ emi, emi ẹkotde “Armageddon.”
Nso idedi Armageddon emi? Ntak ndien emi ẹsiwakde ndikot ekọn̄ ye mme n̄kpọ ntre “Armageddon”?
Ẹbon Mmọ ke Ebiet Emi Ẹkotde Armageddon
Har–Magedon ọwọrọ “Obot Megiddo” ke akpasarade usem Hebrew. Okposụkedi emi mîdụhe obot ndomokiet emi ekerede Megiddo, enyene ebiet emi ẹkotde Megiddo. Enye ekedi akwa isobo usụn̄ ke edere n̄kan̄ usoputịn Israel eset. Ẹkesiwak ndin̄wana ikpọ ekọn̄ ke n̄kann̄kụk oro. Ntak edi oro ẹwakde ndikot ebiet emi ndian ekọn̄. *
Edi se Megiddo enen̄erede ada aban̄a idịghe utọ ekọn̄ emi ẹkesin̄wanade do, akam edi ntak emi ẹkesin̄wanade ekọn̄ oro. Megiddo ekesịne ke Isọn̄ Un̄wọn̄ọ emi Jehovah ọkọnọde nditọ Israel. (Exodus 33:1; Joshua 12:7, 21) Enye ama ọn̄wọn̄ọ ke iyan̄wana ye idụt ekededi emi ẹdide en̄wan ye mmọ, enye ama onyụn̄ anam oro. (Deuteronomy 6:18, 19) Ke uwụtn̄kpọ, ke Megiddo ke Jehovah akanyan̄a Israel osio ke ubọk udịmekọn̄ Edidem Jabin ye Sisera etubom ekọn̄ esie emi ẹkedide en̄wan ye Israel.—Judges 4:14-16.
Mmọdo, “Har–Magedon,” m̀mê “Armageddon” ada aban̄a ekọn̄ emi ikpọ udịmekọn̄ iba ẹdin̄wanade.
N̄wed Ediyarade ọdọhọ ke ibịghike, ke Satan ye mme demon esie ẹmọn̄ ẹtan̄ ukara owo ẹbon ọtọkiet ẹnam mmọ ẹsọn̄ọ Abasi enyịn ẹn̄wana ye ikọt Esie. Abasi ayadaha ada anyan̄a ikọt esie, onyụn̄ osobo ata ediwak owo.—Ediyarade 19:11-18.
Ntak emi Abasi emi Bible ọdọhọde ke edi Abasi ‘mbọm emi mîsọpke iyatesịt, onyụn̄ awakde ima-mfọnido’ edisobode ata ediwak owo ntre? (Nehemiah 9:17) Man ifiọk ntak, ana ibem iso ifiọk ibọrọ mbụme ita emi: Akpa, anie editọn̄ọ ekọn̄ emi? Ọyọhọ iba, ntak emi Abasi edisịnde idem? Ọyọhọ ita, nso ufọn ke ekọn̄ emi edinyene inọ isọn̄ ye mme owo?
1. ANIE EDITỌN̄Ọ EKỌN̄ EMI?
Idịghe Abasi editọn̄ọ ekọn̄ Armageddon. “Ndidem ofụri isọn̄” ẹditọn̄ọ. Ntak-a? Satan edinam mmọ ẹda udịmekọn̄ mmọ ẹdi ndisobo ikọt Jehovah Abasi mfep. Do ndien ke Abasi edidaha ada anyan̄a ikọt esie.—Ediyarade 16:13, 14; 19:17, 18.
Ndusụk owo ikereke-kere ke ukara ekeme nditre m̀mê ndisobo ido ukpono ekededi akpan akpan ke eyo emi ukara ndusụk idụt ẹnọde mme owo ifụre mi ndikpono se ededi emi mmọ ẹmade nnyụn̄ nsioro uyo edieke ukara ẹnamde se mmọ mîmaha. Kûfre ke utọ n̄kpọ ntem ama etịbe ke ini ẹken̄wanade ọyọhọ ekọn̄ ererimbot iba, ke onyụn̄ etịbe idahaemi n̄ko. * Edi nsobo oro edisobode ido ukpono ke Armageddon eyenen̄ede okpụhọde ke usụn̄ iba ke nsụhọde n̄kaha akan enye emi isụk inemede mi. Akpa kan̄a, ẹdisobo ido ukpono ke ofụri ererimbot. Ọyọhọ iba, akananam Jehovah Abasi isoboke owo nte enye edisobode ke Armageddon. (Jeremiah 25:32, 33) Bible okot emi “ekọn̄ akwa usen Abasi Ata Ọkpọsọn̄.”
2. NTAK EMI ABASI EDISỊNDE IDEM?
Jehovah ọdọhọ ikọt esie ẹtie emem emem ẹnyụn̄ ẹma mme asua mmọ. (Micah 4:1-3; Matthew 5:43, 44; 26:52) Ntre, mmọ idin̄wanake inyan̄a idem ke ini mme asua ẹdide ekọn̄ ye mmọ. Edieke Abasi odopde-dop ese, ọwọrọ ke ẹyesobo ikọt esie ẹfep, ẹnyụn̄ ẹsuene enyịn̄ esie. N̄ko edieke Jehovah Abasi akpayakde emi etịbe, oro ọkpọwọrọ ke enye idịghe eti owo, inyeneke odudu, inyụn̄ inyeneke ima. Jehovah ikemeke-keme ndiyak utọ n̄kpọ oro etịbe!—Psalm 37:28, 29.
Abasi iyomke ndisobo owo ndomokiet, ntak edi oro enye anamde mme owo ẹfiọk se iyomde ndinam. (2 Peter 3:9) Enye ada Bible eti kpukpru owo nte ke imọ imesisio usiene ke ini mme asua ẹdide en̄wan ye ikọt imọ. (2 Ndidem 19:35) Bible etịn̄ n̄ko ete ke Jehovah ayafiak an̄wana ọnọ ikọt esie ke ini Satan ye ikọt esie ẹdidide en̄wan ye mmọ. Ke akpanikọ, Bible ama etetịn̄ ke Jehovah oyosobo mme idiọkowo. (Mme N̄ke 2:21, 22; 2 Thessalonica 1:6-9) Ini oro ndien ke mme asua ẹdifiọk ke mmimọ in̄wana ye Ata Ọkpọsọn̄ Abasi.—Ezekiel 38:21-23.
3. NSO UFỌN KE EKỌN̄ EMI EDINYENE INỌ ISỌN̄ YE MME OWO?
Ekọn̄ Armageddon ayanam ẹnyan̄a ata ediwak owo. Ke nditịm ntịn̄, edidi ekọn̄ emi ama okokụre, emem odu ke isọn̄ emi ndien.—Ediyarade 21:3, 4.
N̄wed Ediyarade ọdọhọ ke “akwa otuowo, emi baba owo kiet mîkemeke ndibat” ẹyebọhọ ekọn̄ emi. (Ediyarade 7:9, 14) Jehovah Abasi oyokụt ete ke ẹnam isọn̄ emi akabade Paradise kpa nte Enye okoyomde.
Ndi imọfiọk ini emi mme asua ẹdidade en̄wan ẹbịne ikọt Abasi?
[Mme Ikọ Idakisọn̄]
^ ikp. 6 Idịghe akpa ẹkotde ebiet ẹdian ekọn̄ edi emi. Ke uwụtn̄kpọ, sia ẹma ẹkeduọk bọmb ẹsobo obio Hiroshima, mme owo ẹdikot ekọn̄ oro ẹduọkde bọmb, “Hiroshima.”
^ ikp. 13 Ke uwụtn̄kpọ, mbon Nazi ke Germany ẹma ẹdomo ndisobo ofụri mme Jew ye ido ukpono mmọ mfep. N̄ko, mbon Soviet Union ẹma ẹnen̄ede ẹfiomo ido ukpono ke eyo ukara mmọ. Emekeme ndikụt n̄kpọ ntem ke ibuotikọ emi, “Mme Ama Emem Emi Mîyakke Ẹbiat Mmimọ Enyịn̄,” ke Enyọn̄-Ukpeme May 1, 2011, emi Mme Ntiense Jehovah ẹsiode.
[Ndise ke page 6]
Jehovah Abasi ama an̄wana ọnọ ikọt esie ke eset
[Ndise ke page 7]
Jehovah ayafiak an̄wana ọnọ ikọt esie ke ekọn̄ Armageddon
