Kpep N̄kpọ To Ikọ Abasi

Didie ke Ikpeti N̄kpa Jesus?

Ibuotikọ emi ọbọrọ mme mbụme emi ẹkemede ndidi emesibụp onyụn̄ owụt n̄ko ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Didie ke ẹkpeti n̄kpa Jesus?

Jesus ọkọdọhọ mme mbet esie ẹda uyo ye wine ẹti n̄kpa imọ. Uyo oro ada aban̄a idem Jesus ndien wine ada aban̄a iyịp esie.—Kot Luke 22:19, 20.

Uyo oro Jesus akadade anam Editi n̄kpa esie ikesịneke leaven m̀mê yeast. Yeast esiwak ndida mban̄a idiọkn̄kpọ ke Bible. Mmọdo, uyo oro owo mîsịnke yeast akada aban̄a mfọnmma idem Jesus. Enye ọkọnọ idemesie nte uwa, emi akanamde ẹtre ndisiwa uwa unam oro Ibet Moses ọkọdọhọde ẹwa. (Mme Hebrew 10:5, 9, 10) Wine oro akada aban̄a ọsọn̄urua iyịp Jesus emi enye ọkọduọkde man afak nnyịn osio ke mme idiọkn̄kpọ nnyịn.—Kot 1 Peter 1:19; 2:24; 3:18.

2. Ini ewe ke ikpeti n̄kpa Jesus?

Jesus akpakpa ke usen Passover, Nisan 14. Mme Jew ẹsitọn̄ọ ẹbat usen ke utịn ama okosop. Jesus ama adia usọrọ Passover ye mme apostle esie mbubreyo oro mbemiso ẹwotde enye. Ekem enye ama anam obufa edinam ndida nti n̄kpa esie.—Kot Luke 22:14, 15.

Mfịn, ikọt Abasi ẹsinam n̄kpọ emi etide mmọ nte Abasi akadade Jesus anyan̄a ofụri ubonowo osio ke idiọkn̄kpọ ye n̄kpa. (Exodus 12:5-7, 13, 17) Ukem nte ẹkesinịmde Passover ini kiet ke isua, ntre n̄ko ke ikọt Abasi ẹsiti n̄kpa Jesus ini kiet ke isua ke utịn ama okosop ke Nisan 14 ke n̄wed usenọfiọn̄ Bible.—Kot John 1:29.

 3. Anie akpata uyo onyụn̄ ọn̄wọn̄ wine emi?

Jesus ọkọdọhọ ke ini ọkọnọde mme mbet esie wine oro ete: “Cup emi ada aban̄a obufa ediomi.” (1 Corinth 11:25) Obufa ediomi emi akada itie ediomi oro Abasi akanamde ye nditọ Israel ete ke edieke mmọ ẹkopde uyo imọ, ke mmọ ẹdidi akpan inyene imọ. (Exodus 19:5, 6) Edi nditọ Israel ikokopke uyo Jehovah, ntre Jehovah ama anam obufa ediomi emi Jesus eketịn̄de aban̄a mi.—Kot Jeremiah 31:31.

Jehovah ada owo ifan̄ ọdiọn̄ ediwak owo ke obufa ediomi emi. Enye anam ediomi emi ye owo 144,000. Jehovah edida mmọ inam ata ediwak owo ẹdu uwem ke nsinsi ke Paradise ke isọn̄. Ndusụk mbon obufa ediomi emi ke ẹnam n̄kpọ Abasi ke isọn̄ idahaemi. Mmọ kpọt ẹdot ndita uyo nnyụn̄ n̄n̄wọn̄ wine Editi n̄kpa Christ sia “cup [m̀mê wine oro adade] aban̄a obufa ediomi.”—Kot Luke 12:32; Ediyarade 14:1, 3.

4. Nso ufọn ke Editi n̄kpa Jesus enyene ọnọ nnyịn?

Editi n̄kpa Jesus anam inen̄ede iwụt esịtekọm iban̄a akakan ima emi Jehovah amade nnyịn. Enye ọkọnọ Eyen esie edikpa ọnọ nnyịn. Ntre, ini ekededi oro idụkde Editi emi, akpana itie ikere ufọn oro n̄kpa Jesus enyenede ọnọ nnyịn. Akpana ikere n̄ko nte ikpowụtde esịtekọm inọ Jehovah ye Jesus ke se mmọ ẹnamde ẹnọ nnyịn.—Kot John 3:16; 2 Corinth 5:14, 15.

Edieke oyomde ndifiọk n̄kpọ en̄wen, mbọk kot page 206-208 ke n̄wed Nso ke Bible Enen̄ede Ekpep?, emi Mme Ntiense Jehovah ẹsiode.