Nso ke Akpanam Man Okop Inemesịt Ebịghi?

NSO ke akpanam man okop inemesịt ebịghi? Usụn̄ kiet emi ekemede ndinam oro edi nditie n̄kere m̀mê nso ke se ebierede ndinam edida idi n̄kpọn̄.

Imọfiọk ke ekeme ndisọn̄ fi ndinam ubiere emi edinọde fi inemesịt ibịghi. Ntak-a? Sia ediwak owo oro nnyịn idiọn̄ọde ẹma ndinam n̄kpọ oro ọnọde mmọ inemesịt idahaemi. Ke uwụtn̄kpọ, ekeme ndidi afo ọmọfiọk ke ubon fo ẹyekop inemesịt edieke afo adade item Bible odu uwem. (Ephesus 5:22–6:4) Edi man anam emi, ọwọrọ ke udunamke n̄kpọ ndomokiet ufre ubon fo enyịn—utọ nte utom, unọ idem nduọkodudu m̀mê unọ idem inemesịt. Ana ada ini anam n̄kpọ man ubon fo ẹkop inemesịt. Ntem ke onyụn̄ edi ye ediwak n̄kpọ en̄wen ke uwem, ana afo ebiere m̀mê edinam sụk se inọde fi inemesịt idahaemi, m̀mê edinam se idinọde fi inemesịt ibịghi. Nso idin̄wam fi anam eti ubiere? Nam n̄kpọ inan̄ emi.

1 Kere Se Ubiere Fo Edidade Idi

Ke ini oyomde ndinam ubiere ekededi, tie kere se ubiere emi edidade idi. Bible ọdọhọ ete: “Owo mbufiọk ada okụt afanikọn̄ ndien edịbe, edi ọkọi ebe aka ọkọbọ ufen.” (Mme N̄ke 22:3) Edieke adade okụt ke ubiere imọ ayada afanikọn̄ edi, emi ayanam emem fi utom nditre ndinam utọ ubiere oro. Edi edieke adade okụt mme ufọn emi nti ubiere ẹdidade isọk fi, emi ọyọnọ fi odudu ndinam utọ ubiere oro.

Bụp idemfo ete: ‘Nso ke ubiere emi edida edi ke isua kiet, isua 10, m̀mê isua 20 ẹma ẹkebe? Ndi emi edikam inanam ndọn̄ọ m̀mê mfụhọ? Ndi se nduakde ndinam emi ayafịna ubon mi ye mme ufan mi?’ Ndien ata akpan mbụme efen edi: ‘Ndi se mbierede ndinam emi eyenem Abasi esịt. Ndi emi ayanam n̄ka iso ndi ufan esie?’ Sia edide Abasi ọkọnọ odudu spirit ẹda ẹwet Bible, Bible ekeme ndin̄wam fi ọfiọk se inemde Abasi esịt onyụn̄ ada okụt afanikọn̄ emi ekpefepde.—Mme N̄ke 14:12; 2 Timothy 3:16.

2 Nam Ndụn̄ọde Mbemiso Anamde Ubiere

Ediwak owo ẹsinyụn̄ ẹnam se mbon en̄wen ẹnamde utu ke nditie ke idemmọ mbiere se idinamde. Edi ediwak owo ndinam n̄kpọ iwọrọke ke n̄kpọ oro ọfọn. Nam ndụn̄ọde mbemiso anamde ubiere. Da Natalie * ke uwụtn̄kpọ. Kop se enye ọdọhọde mi: “N̄koyom eti ebe. Edi mma n̄kụt ke nte ndude uwem idiyakke n̄kụt eti ebe ndọ. Kpukpru mme ufan mi ke ufọkn̄wed ẹkedọdiọn̄ọ n̄kpọ, edi nte mmọ ẹkedude uwem ikọfọnke. Mmọ ẹkesikpụhọ ufan irenowo m̀mê iban nte ọfọn̄. Mma ntiene mmọ nnyene ediwak ufan irenowo. Edi esịt ama esimia mi ufen etieti.”

Natalie ama ọtọn̄ọ ndikpep Bible ye Mme Ntiense Jehovah. Enye ọdọhọ ete: “Mma n̄kụt ke ndọ Mme Ntiense Jehovah ọfọn, mme uyen mmọ ẹnyụn̄ ẹkop inemesịt. Kpa ye oro mîkememke utom, mma n̄kpụhọde uwem mi sụn̄sụn̄.”  Nso ikedi utịp? Enye Natalie ọdọhọ ete: “N̄koyom ndidọ owo emi nnen̄erede mma. Nte ini akakade, mma ndọ owo emi isikponode Abasi ọtọkiet. Mmokụt ke Abasi anam ndọ mi ọfọn akan nte n̄kekerede.”

3 Kere nte Se Ebierede Editụkde Fi ke Ini Iso

Ndinen̄ede n̄kere mban̄a orụk ini iso emi afo oyomde ye nte edinyenede utọ ini iso oro idiyakke ekere sụk se idinọde fi inemesịt idahaemi. (Mme N̄ke 21:5) Kûkere uban̄a nte n̄kpọ editiede ke isua 70 m̀mê 80 emi edidude uwem kpọt. Kam kere nte edidude uwem ke nsinsi nte Bible etịn̄de.

Bible ọdọhọ ke Abasi ada uwa ufak Christ Jesus anam ndutịm man mme owo ẹkpenyene nsinsi uwem. (Matthew 20:28; Rome 6:23) Abasi ọn̄wọn̄ọ ete ke ibịghike imọn̄ inam se ikaduakde iban̄a isọn̄ ye ubonowo. Mbon emi ẹmade Abasi ẹyekeme ndidu uwem ke nsinsi ke isọn̄ oro ẹnamde enen̄ede eye. (Psalm 37:11; Ediyarade 21:3-5) Afo emekeme nditiene ndu do edieke etiede ekere nte ubiere fo editụkde fi ke ini iso.

4 Nam N̄kpọ man Enyene Se Oyomde

Nso ke akpanam man etiene enyene nsinsi uwem emi Abasi ọn̄wọn̄ọde mi? Tọn̄ọ ke ndikọ ifiọk Abasi. (John 17:3) Nnennen ifiọk Bible ayanam fi enịm ke se Abasi ọn̄wọn̄ọde aban̄a ini iso oyosu. Utọ mbuọtidem oro ekeme ndisọn̄ọ fi idem man anam mme ukpụhọde oro ẹdinamde Abasi ama fi.

Kere ban̄a se ikọwọrọde Michael. Enye ọdọhọ ete: “N̄kọtọn̄ọ ndikpa mmịn nnyụn̄ nda n̄kpọsọn̄ ibọk ke ini n̄kedide isua 12. Mma ndụk ata idiọk n̄ka nnyụn̄ n̄kere ke ndidụhe uwem nsịm isua 30. Mma ndomo ndiwot idem ediwak ini ke ntak iyatesịt ye ke ntak emi mmen̄kekemeke ndinyene se n̄koyomde. N̄kekere ke enyene se idude ke uwem emi, edi mma ndikụt ke inyeneke.” Ke ini Michael okosụk odude ke ufọkn̄wed, owo emi eketienede enye odụk idiọk n̄ka oro ama ọtọn̄ọ ndikpep Bible ye Mme Ntiense Jehovah. Michael ama enyịme nditiene n̄kpep.

Se Michael ekekpepde ke Bible ama okpụhọde se enye esikerede aban̄a ini iso. Enye ọdọhọ ete: “Mma n̄kpep ke Abasi ayanam isọn̄ emi akabade edi Paradise ye nte ke mme owo ẹyedụn̄ ke emem ye ifụre. Ama ọdọn̄ mi nditiene ndu ke utọ itie oro. Ntre mma nyom ndidi ufan Jehovah. Edi ikememke ndinam se Abasi amade kpukpru ini. Idem ke mma n̄kọtọn̄ọ ndikpep Bible, mma n̄kpa mmịn ikafan̄ nnyụn̄ nnyene ebuana ye eyenan̄wan kiet.”

Edi nso ikan̄wam Michael etre kpukpru emi onyụn̄ odu eti uwem? Enye ọbọrọ ete: “Eyenete emi ekekpepde mi Bible ama esịn udọn̄ ọnọ mi ndikot Bible kpukpru usen nnyụn̄ ndụk ndụk ye mbon oro ẹyomde ndinem Abasi esịt. Mma ndiọn̄ọ ke idiọk ndụk oro n̄kodụkde ikayakke nnam n̄kpọ Abasi nte n̄kpanamde. Ntre mma ntre ndụk ye mmọ okposụkedi emi nnyịn ikedide itai ye aban̄.”

Michael ama ọtọn̄ọ ndinam n̄kpri n̄kpọ emi ẹdin̄wamde enye ekeme ndinam ikpọ n̄kpọ nte edida mme edumbet Abasi ndu uwem. Afo n̄ko emekeme ndinam oro. Wewet se ebierede ndinam ke ini iso ye mme n̄kpọ oro ẹdin̄wamde fi anam oro. Neme mmọ ye mbon oro ẹdin̄wamde fi, nyụn̄ dọhọ mmọ ẹtiene ẹse nte anamde mme n̄kpọ emi.

Kûsịk ifet edikpep n̄kpọ mban̄a Abasi ye edinam item esie unịm. Nam n̄kpọ idahaemi man ekeme ndinen̄ede mma Abasi ye Ikọ esie kpa Bible. Ikọ Abasi ọdọhọ ke owo emi anamde se enye etemede “[oyokụt] unen ke kpukpru se enye anamde.”—Psalm 1:1-3.

[Ikọ Idakisọn̄]