Jehovah Amatat Mi Enyịn

NTE PATRICE OYEKA OBỤKDE

Sia ndide nnan, nte n̄kosụk ntiede ikpọn̄ mbubreyo usen kiet n̄kop nte ekebe utịn̄ikọ anamde uyom, mma mbiere ndiwot idem man ntre uwem ndọk oro n̄kodude. Mma ndọn̄ ibọkn̄kpa ke cup ndori ke okpokoro. N̄koyom ndiyere mmọn̄, nsịne ata ediye ọfọn̄, mbemiso n̄n̄wọn̄ ibọkn̄kpa emi. Ntak emi n̄koyomde ndiwot idem-e? Ndien nsinam nsụk ndu uwem ndisịm mfịn emi mbụk mbụk emi?

N̄KAMANA ke February 2, 1958, ke Kasaï Oriental ke Democratic Republic of Congo. Ete mi akakpa ọkpọn̄ mi ke ini ndide isua usụkkiet kpọt, ndien akpaneka mi ekemen mi akama.

Ke mma n̄kokụre n̄wed, mma nnyene utom ke ikọt ọkpọ. Usenubọk usen kiet ke 1989, ke ini n̄kosụk n̄wetde n̄kpọ ke ọfis, makmak ekịm ama ofụk mi. N̄kekere nte ke ẹbọ ikan̄, edi mma n̄kop uyom ukwak unọ ikan̄ emi owụtde ke ikan̄ do. Adianade do, eyo ndikosụk nsiere edi oro. Ndịk ama anam mi tutu. N̄kekwe n̄kpọ ndomokiet, idem n̄kpọ oro n̄kosụk n̄wetde ke ubọk!

Mma nsọsọp n̄kot owo oro akanamde utom ke idak mi nte emen mi ebịne ete oro ẹsisọbọde owo idem ke itieutom nnyịn. Ete oro ama ọdọhọ ẹmen mi ẹbịne akamba abiausọbọ en̄wen ke akwa obio. Sia akamba abiausọbọ emi okokụtde ke mmenyene ata akamba mfịna ke enyịn, enye ama ọnọ mi n̄ka Kinshasa emi edide ibuot obio Congo.

Nte N̄kpọ Eketiede ke Kinshasa

Ẹma ẹmen mi ẹbịne ediwak mbiausọbọ enyịn ke Kinshasa, edi idụhe eke ekekemede ndinam mfiak n̄kụt usụn̄. Ke mma n̄kabiat n̄kpọ nte ọfiọn̄ kiet ye ubak ke ufọkibọk, mbiausọbọ ẹma ẹdọhọ ke ndikwe aba usụn̄ tutu amama. Idụhe ufọkabasi emi mbon nnyịn mîkemenke mi ika m̀mê ẹyekeme ndinam mi mfiak n̄kụt usụn̄, edi kpukpru ọkọwọrọ ikpîkpu.

Ke akpatre, mma ndifiọk ke ndikwe usụn̄. Kpukpru n̄kpọ ẹma ẹwọrọ mi—n̄kekwe usụn̄, n̄kanamke aba utom, ndien n̄wan mi ama atan̄ kpukpru n̄kpọ nnyịn efehe. Bụt ama anam mi tutu n̄kemeke aba ndiwọrọ an̄wa m̀mê ndisan̄a n̄kpere mme owo. Ntre, mma ntọn̄ọ ndisịne ikpọn̄ ke ufọk, nnyụn̄ n̄kere ke n̄wọrọke n̄kpọ ndomokiet.

Mma ndomo ndiwot idem ikaba. Ọyọhọ ikaba edi emi n̄ketịn̄de ke ntọn̄ọ mbụk emi. Ekpri eyenọwọn̄ kiet ke ufọk nnyịn akanyan̄a mi. Enye ama edue emen ibọkn̄kpa oro n̄kenịmde ke cup ọkọduọk ke ini n̄kakade ndiyere mmọn̄. Mmọkọm Abasi sia enye mîkọn̄wọn̄ke. Edi esịt ama enen̄ede ọdiọk mi ke ini mmen̄kekwe cup oro ke mma n̄kọwọrọ ke itie uyere mmọn̄ ndi. Ekem, mma nnam kpukpru owo ke ufọk ẹfiọk ntak emi n̄koyomde cup oro ye se n̄koyomde ndinam.

Mmenen̄ede n̄kọm Abasi sia mbon nnyịn  ẹma ẹnen̄ede ẹse mi enyịn mbak ndifiak ndomo ndiwot idem.

Ndifiak N̄kop Inem Uwem

Ke ini n̄kosụk ntiede ke ufọk n̄n̄wọn̄ sika Sunday kiet ke 1992, owo iba ke otu Mme Ntiense Jehovah ẹma ẹwaha ufọk nnyịn ke ini mmọ ẹkesụk ẹkwọrọde ikọ. Ke ini mmọ ẹkekụtde ke ndi nnan, mmọ ẹma ẹkot Isaiah 35:5 ẹnọ mi, emi ọdọhọde ete: “Ke ini oro enyịn ẹyen̄wan̄a mme nnan, utọn̄ ẹyenyụn̄ ẹsịrede mme inan.” Esịt ama enen̄ede enem mi ndikop utọ ikọ oro. Mme Ntiense Jehovah ikọdọhọke mi ke imekeme ndinam mi mfiak n̄kụt usụn̄ ke utịbe utịbe usụn̄ nte mme ufọkabasi eken ẹkedọhọde, edi mmọ ẹma ẹkedọhọ ke nyafiak n̄kụt usụn̄ ke obufa ererimbot oro Abasi ọn̄wọn̄ọde edieke n̄kpepde Bible man mfiọk Abasi. (John 17:3) Inikiet inikiet, mma ntọn̄ọ ndida n̄wed Afo Emekeme Ndidu Uwem ke Nsinsi ke Paradise ke Isọn̄ n̄kpep Bible. Mma nnyụn̄ ntọn̄ọ ndidụk kpukpru mme mbono esop Mme Ntiense Jehovah ke Ufọkmbono Obio Ubọn̄ mmọ nnyụn̄ nnam ukpụhọde. Mma nnyụn̄ ntre ndin̄wọn̄ sika.

Edi n̄kekemeke ndinam n̄kọri sia ndide nnan. Ntre, mma ntọn̄ọ ufọkn̄wed mme nnan man n̄keme ndikot N̄wed Mme Nnan nnyụn̄ n̄wewet. Emi ama anam n̄keme nditiene mbọ ukpep oro ẹnọde ke Ufọkmbono Obio Ubọn̄. Ikebịghike, mma ntọn̄ọ ndikwọrọ ikọ nnọ mme owo ke mbọhọ nnyịn. Mma ntọn̄ọ ndifiak n̄kop inem uwem, nnyụn̄ n̄ka iso nnam n̄kọri tutu nyak idem nnọ Jehovah. N̄kana baptism ke May 7, 1994.

Nte ima oro n̄kamade Jehovah ye mme owo okokponde, ama ọdọn̄ mi ndidụk utom ukwọrọikọ uyọhọ ini. Mmanam utom emi tọn̄ọ ke December 1, 1995, tutu esịm emi. Ẹkenyụn̄ ẹmek mi ebiowo ke February 2004. Ẹsikot mi ndusụk ini ẹte ndinọ utịn̄ikọ Bible ke mme esop efen ke obio nnyịn. Kpukpru edidiọn̄ Abasi emi ẹnam esịt enen̄ede adat mi, ẹnyụn̄ ẹnam mi n̄kụt ke nnama ndomokiet ikemeke ndikpan owo ndinam n̄kpọ Jehovah Abasi.

Jehovah Ọmọnọ Mi “Enyịn”

Nte mma n̄ketetịn̄, n̄wan mi ama ọkpọn̄ mi sia ndide nnan. Edi Jehovah ama ọdiọn̄ mi. Eketie nte n̄kpọ eke enye ọnọde mi enyịn en̄wen ndida n̄kụt n̄kpọ. Anny Mavambu emi ekenyịmede mi ndọ kpa ye oro ndide nnan amakabade etie nte enyịn ọnọ mi. Enye esisan̄a ye ami kpukpru ini aka ukwọrọikọ sia enye ke idemesie onyụn̄ edi ọkwọrọikọ ofụri ini. Enye esinyụn̄ okot mme n̄wed emi ndidade ntịm utịn̄ikọ mi man n̄keme ndiwet mmọ ndọn̄ ke N̄wed Mme Nnan. Jehovah enen̄ede ada enye ọdiọn̄ mi. Enye anam n̄kụt ke ikọ Mme N̄ke 19:14 edi ata akpanikọ. Itien̄wed oro ọdọhọ ete: “Ufọk ye inyene ẹdi udeme emi ẹtode mme ete, edi n̄wanndọ emi enyenede ọniọn̄ oto Jehovah.”

Jehovah ọmọnọ nnyịn nditọ iba—akpan ye adiaha. Ke mbebet ini emi ndikụtde mmọ iso ke Paradise. N̄kpọ en̄wen emi Jehovah anamde ọnọ mi edi ndinam akpaneka mi, emi ayakde nnyịn idụn̄ ke esịt ebiet esie, okụt akpanikọ onyụn̄ ana baptism. Kpukpru nnyịn idu esop kiet.

Kpa ye emi ndide nnan, ke osụk ọdọdọn̄ mi ndinam ekese nnọ Abasi sia enye ọdiọn̄ mi etieti. (Malachi 3:10) Mbọn̄ akam kpukpru usen nte Obio Ubọn̄ Abasi edi man editre kpukpru ufen ke isọn̄ emi. Tọn̄ọ n̄kosụk ndiọn̄ọ Jehovah, mmedi ndikụt ke “edidiọn̄ Jehovah ofori owo, enye inyụn̄ idianke ubiak ke esịt.”—Mme N̄ke 10:22.

[Mme ndise ke page 13]

Ini nnọde utịn̄ikọ Bible; ami ye ubon mi ye akpaneka mi