Ọyọhọ Otu 132 Ẹkụre Ukpep ke Gilead

Nta Mme Andikpep Akpanikọ

MARCH 10, 2012, ekedi ata akpan usen ke itie unọ ukpep Mme Ntiense Jehovah ke Patterson ke New York. Ata ediwak owo do, ye mbon oro ẹketode idụt en̄wen ẹdi, ẹma ẹsịne ọfọn̄ ediye ediye ẹdidụk edinam ukụre ukpep ọyọhọ otu 132 ke Ufọkn̄wed Enyọn̄-Ukpeme Ukpep Bible Eke Gilead. Ediwak owo ẹkedụk edinam emi ke Patterson, ke ini mbon en̄wen ẹketiede ke mme ebiet en̄wen ẹse ke ekebe ndise. Owo 9,042 ẹkedụk ẹnyụn̄ ẹsese edinam emi.

Idem akada kpukpru owo urua urua. Nditọ ufọkn̄wed enye emi itiehe nte mbon oro ẹkekụrede ukpep emi ke ini edem. Kpukpru nditọ ufọkn̄wed enye emi ẹma ẹnanam san̄asan̄a utom uyọhọ ini. Ndusụk mmọ ẹkedu ke Bethel, ndusụk ẹdi akpan asiakusụn̄, ndusụk ẹdi mme esenyịn oro ẹsan̄ade-san̄a, m̀mê mme isụn̄utom emi mîkakaha ufọkn̄wed Gilead kan̄a. Mme owo ẹma ẹkere m̀mê nso ke ẹditịn̄ inọ nditọ ufọkn̄wed emi ẹma ẹkenanam san̄asan̄a utom uyọhọ ini mi.

Ikebịghike, otuowo ẹma ẹfiọk. Gerrit Lösch, emi edide owo Otu Ukara Mme Ntiense Jehovah, ekedi etieibuot okpokoro edinam emi. Ibuotikọ emi enye akadade eberede edinam emi ekedi mbụme emi anamde owo ekere n̄kpọ—oro edi, “Nte Afo Edi Ata?” Enye ama owụt ke mme Christian ẹdi nta mme andikpep akpanikọ, kpa mbon oro ẹsịnde idem ẹkpep kpukpru se Christ ekekpepde. Ndidi nta mme andikpep akpanikọ ikụreke ke ndikpep mme owo akpanikọ, edi esịne ndikpep mmọ ndima akpanikọ n̄ko.

Brọda Lösch ama obụp ete, “Nnyịn isan̄a didie ifiọk ke se ikpepde edi akpanikọ?” Enye ọkọdọhọ ke idịghe ibat mbon oro ẹnyịmede akpanikọ owụt ke se ikpepde edi akpanikọ. Okposụkedi emi mbon oro ẹnyịmede akpanikọ ẹwakde mfịn, owo ifan̄ kpọt ẹkenyịme akpanikọ ke Pentecost isua 33 E.N. Enye ama asiak n̄kpọ ition emi ẹwụtde ke se ikpepde edi akpanikọ: (1) Nnyịn ikpep se Jesus ekekpepde, (2) nnyịn imama kiet eken, (3) nnyịn idu uwem nte Abasi ọdọhọde idu, (4) nnyịn idịghe ubak ererimbot emi, (5) nnyịn inyụn̄ idi mbon emi Abasi emekde ete ikere enyịn̄ esie.

“Nam Se Ẹdọhọde Anam”

Otuowo ẹma ẹkere m̀mê nso en̄wen ke ẹdineme ke ini ẹkekụtde nte Geoffrey Jackson emi edide owo Otu Ukara asan̄ade ye ekpatisan̄ ọdọk mbot utịn̄ikọ. Ibuotikọ utịn̄ikọ esie ekedi “Nam Se Ẹdọhọde Anam.” Enye akada ibuotikọ emi oto se idude ke Isaiah 50:5. Itien̄wed emi owụt ke Jesus Christ ama esinam se Ete esie ọdọhọde enye anam, ‘isọn̄ke ibuot, inyụn̄ iwọn̄ọkede edem’ inam n̄kpọ en̄wen.

Brọda Jackson ama ọdọhọ nditọ ufọkn̄wed emi ete ẹsisọp ẹnam se Jehovah adade edisana spirit, Bible, ye esop esie, ọdọhọ mmọ ẹnam. Ke uwụtn̄kpọ oro Jesus ọkọnọde ke Matthew 25:14-30, ẹkenọ ifịn kiet kiet talent nte ukeme mmọ ẹdide. Ẹkeyom mmọ ẹsịn ofụri ukeme mmọ ẹda talent oro ẹnam mbubehe. Ifịn iba ẹma ẹnam se ẹkedọhọde, ntre eteufọk mmọ ama ọkọm onyụn̄ okot mmọ ‘nti ifịn emi ẹnamde akpanikọ!’ Idịghe omokụt do ke idịghe utịp utom owụt ke owo anam akpanikọ, akam edi owo ndinam se ẹdọhọde enye anam.

Eteufọk mmọ okokot ọyọhọ ofụn ita “idiọk ofụn ye ifu.” Nso ke ofụn emi akanam? Enye ama emen talent esie eketịbi isọn̄ obụk. Talent idịghe okudọk okụk, edi awak esịm denarius 6,000, onyụn̄ odobi kilogram 20. Emi edi udobi ekpatisan̄ emi ẹkemede ndiyak owo akama  odụk ubomofụm aka idụt en̄wen. Ikedịghe mmemmem n̄kpọ nditịbi isọn̄ mbụk utọ akamba n̄kpọ oro. Emi ọwọrọ ke ofụn oro ama osụk anam n̄kpọ—oro edi, nditịbi isọn̄ mbụk talent esie—edi idịghe se ẹkedọn̄de enye edi oro. Ntre, isụn̄utom ekeme ndinyụn̄ nnyene se anamde, nte ndiwet leta, ndinam n̄kpọ ke Intanet, ndidụk usọrọ mi ye ko, m̀mê mme n̄kpọ ntre. Utọ isụn̄utom oro idinyeneke odudu aba inam se ẹkedọn̄de enye. Brọda Jackson ekeberi ikọ esie ntem: “Nam se ẹdọhọde anam!”

“Ẹkûnyene Eyịghe”

Ibuotikọ Anthony Morris emi onyụn̄ edide owo Otu Ukara ekedi oro. Enye ama ọdọhọ ke akananam Bible idọhọke ke eyịghe asan̄a n̄kpọ ndomokiet ye mbuọtidem. Enye ọkọdọhọ ke mbuọtidem isiyakke owo enyene eyịghe. Satan ama anam Eve emi ekedide mfọnmma owo enyene eyịghe, ntre enye ekeme ndinam nnyịn n̄ko inyene eyịghe. Brọda Morris ọkọdọhọ ete: “Ama enyene mbuọtidem, udunyeneke eyịghe.” Enye ama eti mmọ nte Peter ‘akasan̄ade ke enyọn̄ mmọn̄ ebịne Jesus,’ edi ke ndondo oro enye “esede oyobio,” ndịk anam enye ndien enye ọtọn̄ọ ndiden̄. Edi Jesus ama osio ubọk omụm enye onyụn̄ ọdọhọ enye ete: “Ntak emi eyịkde?” (Matthew 14:29-31) Brọda Morris ọkọdọhọ ete: “Idem ayakpa mme owo ndikụt se mbufo ẹnamde. Editie mmọ nte n̄kpọ eke mbufo ẹsan̄ade ke enyọn̄ mmọn̄. Edi ke ini ẹsobode afanikọn̄ oro etiede nte oyobio, ẹkûnyene eyịghe ndomokiet.”

Brọda Morris ama ọdọhọ mmọ ke okposụkedi emi mme afanikọn̄ mîdimemke utom ndiyọ, ke nte ini akade mmọ ẹyebe ẹfep. Enye ama ọdọhọ nditọ ufọkn̄wed ete ke ini afanikọn̄, yak mmọ ẹnam se Paul ye Silas ẹkenamde ke ini ẹkedọn̄de mmọ ke ufọk n̄kpọkọbi ke Philippi. Utom 16:25 ọdọhọ ete: “Edi ke ekperede ufọt okoneyo Paul ye Silas ẹbọn̄ akam ẹnyụn̄ ẹtoro Abasi ke ikwọ; ih, mbon n̄kpọkọbi ẹnyụn̄ ẹkop.” Itien̄wed emi etịn̄ se Paul ye Silas ẹkenamde: Mmọ ẹma ẹbọn̄ akam, ẹnyụn̄ ẹkwọ ikwọ tutu mbon n̄kpọkọbi eken ẹda ẹkop. Brọda Morris ama ọdọhọ ke okposụkedi emi ediwak nnyịn mîtịmke inyene uyo ikwọ, ke emi ikpanamke nnyịn itre ndikwọ ikwọ, akpan akpan ke ini afanikọn̄. Enye ekeberi ikọ esie ke ndikot ikọ Ikwọ 135 emi “Ndiyọ Tutu Esịm Utịt,” ke n̄wedikwọ Mme Ntiense Jehovah.

Mme Utịn̄ikọ En̄wen Emi Ẹsọn̄ọde Owo Idem

Robert Luccioni emi anamde utom ke Itieutom Udep N̄kpọ ọkọnọ utịn̄ikọ emi “Ndi Ayama Ediwak Usen?” Enye akada ibuotikọ emi oto se Edidem David eketịn̄de ke Psalm 34:12. Brọda Luccioni ama etịn̄ nte nditọ ufọkn̄wed emi ẹkpeyọde afanikọn̄ ẹnyụn̄ ẹka iso ẹdi ufan Jehovah. Enye ama ọdọhọ ke mmọ ẹkeme ndikpep ediwak n̄kpọ ke se idude ke 1 Samuel ibuot 30. David ye ikọt esie ye mme ubon mmọ ẹkefehe ẹkedụn̄ ke Ziklag ke ntak Edidem Saul. Ke ini mbon Amalek ẹkedide ẹditan̄ ubon mmọ ẹnyọn̄ọ, ikọt David ẹma ẹduọhọ David ẹnyụn̄ ẹyom nditọn̄ọ enye ke itiat. Nso ke David akanam? Enye ikayakke idem emem enye edi ama “ada Jehovah Abasi esie ọsọn̄ọ idem.” (1 Samuel 30:6) Enye ama obụp Jehovah se ikpanamde, anam se Abasi eketemede enye, onyụn̄ aka ọkọbọ kpukpru se ẹketan̄de. Brọda Luccioni ama ọdọhọ nditọ ufọkn̄wed emi ete ke edieke mmọ ẹbuọtde idem ye Jehovah ukem nte David ẹnyụn̄ ẹnamde se enye ọdọhọde, ke mmọ ẹyekop inem ọsọn̄urua utom emi ẹnọde mmọ.

Michael Burnett, emi edide kiet ke otu mme andikpep ke Ufọkn̄wed Gilead ọkọnọ utịn̄ikọ emi “Kama Enyịn Se Usiere.” Okoneyo nditọ Israel ẹkesitọn̄ọ ke utịn ama okosop etre ke usiere. Ndien mmọ ẹkesibahade enye ẹsịn ke ikpehe ita, hour inan̄ inan̄. Akpatre ikpehe ekesitọn̄ọ ke n̄kanika iba esịm itiokiet usenubọk. Ini emi ekesikịm onyụn̄ etuebe akan. Ini emi n̄ko ke idap esinam owo akan. Utọ ini emi ke andiwet Psalm ekesitie ekere ikọ Jehovah man idap okûnam enye. (Psalm 119:148) Brọda Burnett ama ọdọhọ nditọ ufọkn̄wed oro ete: “Oyoyom mbufo ẹdu ke ukpeme. Mme ini ẹyedu emi mbufo ẹdisobode mme n̄kpọ emi ẹkemede  ndinam idem emem mbufo ke idiọk ererimbot emi. Ntre, ana mbufo ẹtie ẹkere se ẹdinamde.” Do ndien ke enye eketi mmọ ke mmọ ẹnyene ndika iso nsịn ifịk n̄kpep Bible man ẹkeme ndidu ke ukpeme ke n̄kan̄ eke spirit. Brọda Burnett ama ọdọhọ mmọ ete: “Kpukpru usen, mbufo ẹmesibọn̄ akam ẹnọ Jehovah sia ẹyomde enye edi ufan mbufo. Ntre, ẹyak Jehovah emi edide ufan mbufo mi ada Bible etịn̄ ikọ ọnọ mbufo n̄ko. Ini afanikọn̄ emi etiede nte okoneyo mi ọmọn̄ ebebe, ntre ẹtie ẹkere se ẹdinamde ke ini iso. Emi editie nte ẹkama enyịn ẹse usiere emi kpukpru afanikọn̄ nnyịn ẹdibede ẹfep.

Mark Noumair, emi onyụn̄ edide andikpep ke Gilead, ọkọnọ utịn̄ikọ emi ẹdade ẹto 1 Peter 5:10 mi, “Ukpep Emi Edifọnde ye Mbufo ke Ini Iso.” Brọda Noumair ama obụp nditọ ufọkn̄wed mbụme emi: “Sia mbufo ẹma ẹkededi nta mme ọkwọrọikọ, nso ikanam ẹkot mbufo ẹdi ufọkn̄wed emi?” Enye ama ọbọrọ mbụme emi ete: “Sia mbufo ẹdi nta ke utom mbufo. Ndien ediwak mbon emi ẹdide nta ke ererimbot emi ẹsikpọn̄ utom mmọ man ẹkebọ ukpep emi edinamde mmọ ẹtetịm ẹnyene usọ ke utom mmọ. Ke ọfiọn̄ ition emi ẹbede, Jehovah enen̄ede ada Ikọ ye esop esie ọnọ mbufo ukpep man anam mbufo ‘ẹsọn̄ọ ẹda ẹnyụn̄ ẹkop idem’ man ẹkeme ndinam ọkpọsọn̄ utom emi ẹdinọde mbufo. Eto emi ọsọn̄de idem isin̄wịneke, isiahake, inyụn̄ ibụn̄ọke ke ini ẹdade ẹbọp ufọk. Nte mbufo ẹdinamde n̄kpọ ye ekemmọ nditọete mbufo edinam ẹfiọk ke mbufo ẹma ẹbọ ukpep. Ndi se mbufo ẹsobode ayanam ẹtre ndida mme edumbet Abasi ndu uwem, mîdịghe ndi ẹyeka iso ẹnam se ẹkedade Ikọ Abasi ẹkpep mbufo? Ẹkeme ndidori ata akamba mbiomo ke eto emi ọsọn̄de idem. Nte eto etiede ke esịt esịt esinam enye ọsọn̄ idem. Kpasụk ntre, edu mbufo ediwụt nte mbufo ẹsọn̄de idem ẹketre. Jehovah akada mbufo edi mi man edinam mbufo ẹkop idem, ẹbọ ukpep emi edinamde ẹkeme ndinam utom emi ẹdinọde mbufo. Abasi anam esiemmọ, ntre ibọn̄ akam ite mbufo ẹnyụn̄ ẹnam udeme mbufo, ẹyak ‘Akwa Anditeme’ emi okụre ukpep mbufo.”

Mme Ifiọkutom ye Mme Ndụn̄ọde

Ke mme ini edinam ukụre ukpep Gilead, esinem etieti ndikop nto nditọ ufọkn̄wed. Nditọ ufọkn̄wed emi ẹma ẹnam ẹwụt nte mmọ ẹkekwọrọde ikọ ndondo emi. Ke uwụtn̄kpọ, ebe ye n̄wan kiet emi ẹtode France ẹma ẹbet ofụri hour itiokiet ke an̄wambehe ubomofụm nte mmọ ẹkesụk ẹdide Ufọkn̄wed Gilead emi. Mmọ ẹma ẹtọn̄ọ nneme ye owo iba emi ẹkenyụn̄ ẹbetde ubomofụm ke itie unyamudia. Ke ini kiet ke otu mmọ ọkọdọhọde ke ito Malawi, mmọ ẹma ẹkwọrọ ikọ ẹnọ enye ke usem Chichewa. Idem ama akpa ete emi tutu enye obụp mmọ nte mmọ ẹkesan̄ade ẹdiọn̄ọ usem mmimọ. Mmọ ẹma ẹtịn̄ ẹnọ enye ke mmimọ ima inam utom isụn̄utom ke Malawi. Ke ini owo enye eken ọkọdọhọde ke imọ ito Cameroon, mmọ ẹma ẹnyụn̄ ẹkwọrọ ikọ ẹnọ enye ke usem French. Emi ama akpa ete oro idem etieti. Iren iba emi ẹma ẹnen̄ede ẹkpono Mme Ntiense Jehovah.

Nicholas Ahladis, emi anamde utom ke Itieutom Emi Esede Aban̄a Ukabade N̄wed, ama anam ndụn̄ọde ye nditọ ufọkn̄wed iba ye iban mmọ. Ebe ye n̄wan kiet emi ẹkedade ẹnam ndụn̄ọde ẹma ẹkpọn̄ Australia ẹkenam utom isụn̄utom ke East Timor emi mîbịghike ekọn̄ okokụre do. Ebe ye n̄wan enye eken ẹma ẹkpọn̄ Korea ẹka ẹkenam utom ke Hong Kong. Ama enem mmọ ndimen kpukpru se ẹkekpepde mmọ ke ufọkn̄wed emi n̄kanam ke mme efakutom mmọ.

Ẹma ẹnọ nditọ ufọkn̄wed emi ẹkụrede ukpep mi n̄weditoro. Ekem eyen ufọkn̄wed kiet ama okot leta ekọm ke kpukpru ukpep emi mmọ ẹkebọde. Ke akpatre utịn̄ikọ esie, Brọda Lösch ama etịn̄ ndinem ikọ aban̄a akpanikọ. Enye ọkọdọhọ ke akpanikọ eye nte akpara ke ikpaenyọn̄, etie nte idịm ke desat, ye nte ukwak ubom ke inyan̄ emi oyobio adahade. Brọda Lösch ekeberi ikọ esie ntem: “Nso edidiọn̄ ke edi ntem ndifiọk akpanikọ. Wụt ke idi ata ke ndikpep akpanikọ, nyụn̄ n̄wam mbon en̄wen ẹdi nta n̄ko.”

 [Chart/​Ndise obio ke page 31]

IDAHA NDITỌ UFỌKN̄WED

Ibat idụt oro ẹtode 12

Isua emana ke ẹbaharede ukem ukem 36

Isua ifan̄ tọn̄ọ ẹkena baptism ke ẹbaharede ukem ukem 20

Isua oro ẹdude ke utom uyọhọ ini ke ebaharede ukem ukem 15

[Ndise obio]

(Ama oyom ndikụt nte enye enen̄erede etie, se n̄wed)

Idụt oro ẹnọde mmọ ẹka ẹdi:

IDỤT ORO ẸNỌDE MMỌ ẸKA

BELIZE

BENIN

CAMBODIA

CAMEROON

CAPE VERDE

CÔTE D’IVOIRE

DOMINICAN REPUBLIC

EAST TIMOR

ECUADOR

GABON

GEORGIA

GUINEA

HONG KONG

LIBERIA

MADAGASCAR

MALAWI

PERU

SAMOA

SÃO TOMÉ AND PRÍNCIPE

UNITED STATES OF AMERICA

ZIMBABWE

[Ndise obio ke page 31]

Ọyọhọ Otu 132 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible Eke Gilead

Ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.

(1) Iap, R.; Iap, J.; Ng, T.; Ng, P.; Laurino, F.; Laurino, B.; Won, S.; Won, S.

(2) Morales, N.; Morales, M.; Zanutto, J.; Zanutto, M.; Rumph, I.; Rumph, J.; Germain, D.; Germain, N.

(3) Atchadé, Y.; Atchadé, Y.; Thomas, C.; Thomas, E.; Estigène, C.; Estigène, P.

(4) Ehrman, D.; Ehrman, A.; Bray, J.; Bray, A.; Amorim, M.; Amorim, D.; Seo, Y.; Seo, Y.

(5) Simon, J.; Simon, C.; Seale, C.; Seale, D.; Erickson, J.; Erickson, R.

(6) McCluskey, D.; McCluskey, T.; Brown, A.; Brown, V.; Mariano, D.; Mariano, C.; Loyola, Y.; Loyola, C.

(7) Rutgers, P.; Rutgers, N.; Foucault, P.; Foucault, C.; Wunjah, J.; Wunjah, E.