Kpep N̄kpọ To Ikọ Abasi

Ndi Afo Emekeme Ndidu Uwem ke Nsinsi?

Ibuotikọ emi ọbọrọ mme mbụme emi ekemede ndidi emesibụp onyụn̄ owụt ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Ntak emi nnyịn mîdụhe uwem ibịghi?

Odu ndusụk ikụt emi ẹdude uwem isua 150, ndien ndusụk eto ẹdu isua 3,000. Edi nnyịn idụhe uwem ibịghi ntre. Kpa ye emi uwem nnyịn omụhọde ntem, imekeme ndikop inem uwem n̄kan ikụt m̀mê eto. Jehovah Abasi okobot nnyịn man ikeme ndikop inem ikwọ, inem mbre, inem udia, inem ukpepn̄kpọ, inem uka isan̄, nnyụn̄ nnam mme ufan. Abasi ama anam ọdọn̄ nnyịn ndidu uwem ke nsinsi.—Kot Ecclesiastes 3:11.

2. Ndi imekeme ndidu uwem ke nsinsi?

Jehovah odu ke nsinsi. Enye ikemeke ndikpa. Enye ọnọ owo uwem, onyụn̄ ekeme ndinam owo odu uwem ke nsinsi. (Psalm 36:9; Habakkuk 1:12) Ke adianade do, enye ọn̄wọn̄ọ ndinọ mbon oro ẹkopde uyo esie nsinsi uwem. Enye ayanam mbon emi ẹsọn̄de ẹfiak ẹsehe.—Kot Job 33:24, 25; Isaiah 25:8; 33:24.

Jesus ama anam mme utịben̄kpọ, onyụn̄ ada emi owụt ke Abasi ayanam nnyịn idu uwem inyụn̄ ikop nsọn̄idem ke nsinsi. Enye ama ọkọk ediwak orụk udọn̄ọ onyụn̄ akam anam mbon emi ẹkekpan̄ade ẹset.—Kot Luke 7:11-15, 18, 19, 22.

  3. Ini ewe ke ididu uwem ke nsinsi?

Abasi oyom nnyịn idu uwem ke nsinsi ke Paradise, iyomke idu ke ererimbot emi ufịk ye afai ẹyọhọde. Enye oyom nnyịn idu ke ifụre. (Psalm 37:9, 29; Isaiah 65:21, 22) Ke ẹma ẹkenam isọn̄ emi akabade edi Paradise, Abasi ayanam ediwak miliọn owo emi ẹkekpan̄ade ẹfiak ẹdidu uwem. Mbon emi ẹdisetde, emi ẹdimekde ndinam n̄kpọ Abasi, ẹyedu uwem ke nsinsi.—Kot Luke 23:42, 43; John 5:28, 29.

4. Nso ke ikpanam man idu uwem ke nsinsi?

Abasi ikpọn̄ ekeme ndinọ nnyịn nsinsi uwem. Ntem eyetịm ọfọn isan̄a ikpere enye inyụn̄ itịm idiọn̄ọ enye. Bible emen ndikpep n̄kpọ mban̄a Abasi odomo ye ndidia udia. (Matthew 4:4) Esinem owo ndidia udia, edi isimemke ndinyene udia nnyụn̄ nnam udia oro. Kpasụk ntre, ndikpep n̄kpọ mban̄a Abasi esisịne utom. Edi idụhe n̄kpọ en̄wen emi ọfọnde nte owo ndisan̄a n̄kpere Abasi nnyụn̄ nnyene nsinsi uwem.—Kot Luke 13:23, 24; John 6:27; 17:3.

Edieke oyomde ndifiọk n̄kpọ efen mban̄a emi, mbọk kot ibuot 3 ke n̄wed Nso ke Bible Enen̄ede Ekpep?, emi Mme Ntiense Jehovah ẹsiode.

[Se ẹwetde ẹban̄a ndise ke page 17]

Ana isịn ukeme ikpep n̄kpọ iban̄a Abasi