Mme Andikot N̄wed Nnyịn Ẹbụp Ẹte . . .

Ndi Ndibuọt Idem ke Abasi Esinam Ẹfre Uwa?

▪ Efre-uwa edi n̄kpọ emi owo esinamde man efre enyịn aban̄a mfịna esie, edi emi mîsiyakke owo ẹkere n̄kpọ ọfọn. Ke uwụtn̄kpọ, ndusụk owo ẹsin̄wọn̄ mmịn man ẹfre uwa. Ke nsonso oro, mmịn ekeme ndinam mmọ ẹbuọt idem ke idemmọ ẹnyụn̄ ẹfre ẹban̄a mfịna mmọ. Edi nte ini akade, mbon oro ẹkedade mmịn man ẹfre uwa ẹsisịn idem ke afanikọn̄. Ndi ndibuọt idem ke Abasi etie ntre?

Ndusụk owo ẹdọhọ ke mbuọtidem edi ndinịm kpukpru n̄kpọ ke akpanikọ. Mmọ ẹdọhọ ke mbon oro ẹbuọtde idem ke Abasi ẹsiyak mbon en̄wen ẹkere n̄kpọ ẹnọ mmọ, mîdịghe ke mmọ isiyomke ọkpọsọn̄ uyarade mbemiso ẹnịmde n̄kpọ ke akpanikọ. Utọ mme owo oro ẹdọhọ ke mbon oro ẹnyenede ọkpọsọn̄ mbuọtidem ke Abasi ẹsikpa edem ewụt akpanikọ.

Bible etịn̄ ekese n̄kpọ aban̄a owo ndibuọt idem ke Abasi. Edi idụhe ebiet emi enye ọdọhọde nnyịn inịm kpukpru n̄kpọ ke akpanikọ. Enye inyụn̄ idọhọke owo ekere n̄kpọ ọnọ owo en̄wen. Utu ke oro, enye ọdọhọ ke mbon oro ẹbuọtde idem ke kpukpru ikọ edi mme ọkọi. (Mme N̄ke 14:15, 18) Ekpedi ndisịme nditre ndidụn̄ọde ekikere oro owo ọnọde nnyịn mbemiso inyịmede. Oro ekpetie nte ndibọp enyịn ndomo ndibe ke usụn̄ emi ubomisọn̄ awakde, sia owo ọdọhọde inam ntre.

Bible idọhọke owo ọbuọt idem nnan nnan, edi ọdọhọ itịn̄ enyịn ikpeme mbak owo idibian̄a nnyịn. (Matthew 16:6) Nditịn̄ enyịn n̄kpeme ọwọrọ ndida “ukeme ukere n̄kpọ” nnyịn nnam n̄kpọ. (Rome 12:1) Bible ekpep nnyịn ete ida uyarade oro ikụtde ikọk ibuot inyụn̄ inam nti ubiere oro ẹnyenede nsọn̄ọ. Da ndusụk n̄kpọ oro apostle Paul ekewetde ke uwụtn̄kpọ.

Ke ini Paul ekewetde leta ọnọ ẹsọk esop ke Rome, enye ikoyomke mmọ ẹnịm ke Abasi odu n̄kukụre koro enye ọkọdọhọde mmọ ẹnịm. Utu ke oro, enye ọkọdọhọ mmọ ẹkere ẹban̄a mme n̄kpọ oro ẹwụtde ke Abasi odu. Enye ekewet ete: “Tọn̄ọ nte ẹkebot ererimbot, ẹtịm ẹkụt mme edu [Abasi] oro enyịn mîkwe, oro edi, nsinsi odudu esie ye idaha esie nte Abasi, koro ẹkụt mmọ ebe ke mme n̄kpọ oro enye anamde, mbak mmọ [oro edi, mbon emi ẹdọhọde ke Abasi idụhe] ẹdinyene n̄kpọ nditịn̄ nnyan̄a idem.” (Rome 1:20) Ukem usụn̄ oro ke Paul akada anam mbon Hebrew ẹkere n̄kpọ ke ini enye ekewetde leta ọnọ ẹsọk mmọ. Enye ọkọdọhọ ete: “Kpukpru ufọk ẹnyene andibọp, edi enye emi ọkọbọpde kpukpru n̄kpọ edi Abasi.” (Mme Hebrew 3:4) Ke ini Paul ekewetde leta ọnọ ẹsọk mme Christian ke Thessalonica, enye ọkọdọhọ mmọ ẹsasat se mmọ ẹnịmde ke akpanikọ. Enye okoyom mmọ ‘ẹdodụn̄ọde kpukpru n̄kpọ.’—1 Thessalonica 5:21.

Edieke owo ọbuọtde idem ke Abasi edi inyeneke se adade ọsọn̄ọ, oro ekeme ndikabade ntie nte n̄kpọ emi ẹdade ẹfre uwa. Utọ mbuọtidem oro ekeme ndinam ẹtụn owo usụn̄ tutu enye anam n̄kpọ emi edidade afanikọn̄ ọsọk enye. Paul ama ewet aban̄a ndusụk mbon ido ukpono eyo esie ete: “Ndi ntiense nnọ mmọ nte ke mmọ ẹnyene ifịk ẹban̄a Abasi; edi emi isan̄ake ye nnennen ifiọk.” (Rome 10:2) Ke ntre, enen̄ede ọfọn inam item oro Paul ọkọnọde esop ke Rome! Enye ekewet ete: “Ẹkpụhọde oto ke edinam ekikere mbufo edi obufa, man mbufo ẹkpedomo ẹfiọk uduak Abasi eke edide eti onyụn̄ enemde enye esịt onyụn̄ ọfọnde ama.” (Rome 12:2) Mbuọtidem oro inyenede ke ima ikenyene nnennen ifiọk Abasi idịghe efre-uwa, edi edi “akwa otuekọn̄” oro ekpemede nnyịn.—Ephesus 6:16.

[Ndise ke page 23]

Mbuọtidem ekeme ndidi otuekọn̄ oro ekpemede nnyịn