N̄kamana ke ekpri obio kiet emi ekerede Texcoco. Ini oro, ata ediwak efak ke obio nnyịn ekedi ntọn̄ ntọn̄, owo ikonyụn̄ iduọkke itai. Ima isikụt mbon emi ẹdụn̄de ke obio-in̄wan̄ ẹtan̄de n̄kpọ ke enan̄-mbiomo mmọ ẹdi ẹdinyam ke obio nnyịn. Ami n̄kedi ọyọhọ eyen itiaba ke otu nditọ usụkkiet ke ufọk nnyịn, ima inyụn̄ ibuene etieti. Ete mi ekesidiọn̄ ikpaukot ada ọbọk nnyịn. Edi enye ama akpa ke ini n̄kedide isua itiaba kpọt. Ọtọn̄ọde ke emi, eka mi ekesibọ ufen akama nnyịn.

Ete eka mi ekesibre ndido urụk, enye okonyụn̄ ada usụn̄ ke n̄kaikwọ emi ẹkesikwọde mme ikwọ ufọkabasi. Ata ediwak owo ke ufọk nnyịn ẹma ẹdiọn̄ọ ndibre nsio nsio n̄kpọmbre. Eka mi ekedi owo n̄kaikwọ ufọkabasi nnyịn, ndien eyeneka esie kiet ama esikwọ ikwọ onyụn̄ ebre ndido mbakara. Ima isima n̄kpọ Abasi etieti. Ami n̄kesinọ oku ufọkabasi ikan̄ ada ọfọp incense, n̄konyụn̄ nyom ndidi isụn̄utom ufọkabasi Catholic. Edi mma nnyụn̄ mma ndise en̄wan karet ke TV. Adan̄a nte n̄kesisede karet, ntre ke n̄ketie afai afai.

Ufọkn̄wed emi n̄kakade ke Puebla eketie nte ufọkn̄wed emi ẹsikpepde mme owo utom oku. N̄koyom ndidi oku. Edi se iketịbede ke Ufọkabasi Catholic ke ini n̄koyomde ndikụre n̄wed ama etek mi esịt. Nun kiet ama esibre ndisịme mbre ima ye ami. N̄kọnọhọ n̄kaiferi emi iso, edi se enye akanamde ama anam ọdọn̄ mi ndidọ n̄wan. N̄kpọ en̄wen n̄ko edi ke mma n̄kụt ediwak oku ẹdude ata uwem mbubịk. Nte ini akade, ikọdọn̄ke mi aba ndidi oku ufọkabasi.

 Mma ntọn̄ọ ndikpep ikwọ ke Ufọkn̄wed Ukpep Ikwọ ke Mexico. Ke mma n̄kokụre ukpep emi, mma ndọ n̄wan nnyụn̄ mbon nditọ inan̄. N̄kesikwọ ikwọ ke ini udia Ọbọn̄ Ufọkabasi Catholic nda nnọ ubon mi udia.

Ima isinyene mfịna ke ndọ nnyịn toto ke editọn̄ọ. Ami ye n̄wan mi ima isin̄wana en̄wan etieti akpan akpan ke ntak ufụp. Ikesitọn̄ọ ke utọk, ekem in̄wan̄wana. Ke akpatre, ima idian̄ade ndọ ke ima ikọdọ ndọ ke isua 13.

Mme Ntiense Jehovah iba ẹma ẹdi ndikwọrọ ikọ nnọ nnyịn mbemiso n̄kpọn̄de n̄wan mi. Akpa ini oro n̄kokụtde Mme Ntiense ekedi oro. Sia n̄kekerede ke mmenen̄ede ndiọn̄ọ Abasi, mma mfak mmọ mbụme man n̄wụt ke mmọ idiọn̄ọke Bible. Mma mbụp mmọ n̄kpọsọn̄ mbụme emi n̄kekerede ke owo ndomokiet ikemeke ndibọrọ. Edi idem ama akpa mi ndikụt mmọ ẹdade Bible ẹbọrọ mi. Do ndien ke n̄kokụt ke ndiọn̄ọke n̄kpọ ndomokiet. Edi mmọ ikesidịghe aba sia n̄wan mi ama ọdiọk uwem etieti ye mmọ, ami ke idemmi n̄konyụn̄ nnyeneke ini nnọ mmọ.

Isua ition ke oro ebede, Mme Ntiense Jehovah ẹma ẹfiak ẹdi ufọk nnyịn. Ini oro, mma mmen n̄wan en̄wen emi ekerede Elvira nsịn ke ufọk. Elvira ikafịnake Mme Ntiense emi, ntre, mma n̄keme ndikpep Bible ye mmọ ke ubọk ke ubọk. Kpa ye oro, ama enen̄ede ebịghi mbemiso n̄kemede nditre ndiọi uwem oro n̄kodude.

Mma ndifiọk ke ana nnen̄ede n̄kabade esịt edieke nyomde ndinam n̄kpọ Jehovah ke ofụri esịt. Akpa kan̄a, akana ntre utom ukwọ ikwọ udia Ọbọn̄ ke Ufọkabasi Catholic nnyụn̄ nyom utom en̄wen. (Ediyarade 18:4) Akana nnyụn̄ nsịn ndọ nnyịn ke n̄wed.

N̄kpọ kiet emi ọkọsọn̄de mi nditre ekedi ndiyat esịt ntịme ntịme. Itie Bible iba emi ẹken̄wamde mi ẹkedi Psalm 11:5, emi ọdọhọde ke Jehovah asasua afai, ye 1 Peter 3:7, emi ekekpepde mi ndinam n̄kpọ ye n̄wan mi ukpono ukpono edieke nyomde Jehovah okop akam mi. Nte n̄kosụk ntiede n̄kere mme itie Bible emi nnyụn̄ mbọn̄ akam nnọ Jehovah nte an̄wam mi, mma n̄keme nditre iyatesịt.

Uwem enem mi idahaemi ye ubon mi. Ke ndomo ndisan̄a n̄kpere nditọ emi akpa n̄wan mi akamande ọnọ mi, ke nnyụn̄ ndomo ndin̄wam n̄wan ye nditọ mi ẹma Abasi.

Ke ini n̄kedide eyenọwọn̄, n̄koyom ndidi oku nnyụn̄ n̄n̄wam mme owo. Edi idahaemi, uwem enem mi akan nte n̄kekerede. Nsikpep mme owo ikwọ nda ndu uwem. Mmenen̄ede n̄kọm Jehovah ke enye ndinyene ime ye ami, nnyụn̄ nnọ mi ifet ndikabade esịt ndi eti owo!