Ikebịghike, mma ntọn̄ọ ndisitiene n̄ka n̄kesin̄ede idem nnyụn̄ mmenede ukwak. Nte ini akakade, mma nsiak itie usịn̄ede idem ke San Leandro ke California ke United States, ndien nta mme emenede ukwak ẹma ẹsidi itie emi ẹdikpep mme owo nte ẹkpesịn̄erede idem ẹnyụn̄ ẹmenerede ukwak. Kiet ke otu mmọ ama akam ọbọ n̄kponn̄kan enọ ke America nte àtá emenede ukwak.

Ufan kiet ke itie usịn̄ede idem mi, emi ọkọfiọkde ke mmoyom ndikpep Bible, ama ọdọhọ ke imọdiọn̄ọ owo emi ekemede ndin̄wam mi. Ke ndan̄nsiere, owo Ntiense Jehovah kiet ama edi ufọk mi. Enye ama ada Bible ọbọrọ mme mbụme mi ke ofụri hour inan̄. Mma ndọhọ enye afiak edi mbubreyo usen oro, ndien ke enye ama ekedi, ima ineme n̄kpọ ke Bible tutu esịm ufọt okoneyo. Se n̄kekpepde ama enem mi, ntre mma mbụp enye m̀mê mmekeme nditiene enye eyo ama esiere man nse nte enye esikwọrọde ikọ. Ama akpa mi idem ndikụt nte enye adade Bible ọbọrọ mme owo mbụme. Mma mbiere ke se ndinamde edi oro!

Ntre, mma n̄kpọn̄ mbubehe mi nnyụn̄ nsisan̄a ye asiakusụn̄ * emi n̄kwọrọ ikọ. Ke May 1948, mma nna baptism ke akamba mbono oro ẹkenịmde ke Cow Palace ke San Francisco ke California. Kpa isua oro, mma n̄kabade asiakusụn̄.

Mma ndọhọ Mme Ntiense ẹka ẹkekwọrọ ikọ ẹnọ eka mi. Enye ama ama se enye okokopde ndien ikebịghike ama akabade edi kiet ke otu Mme Ntiense Jehovah. Okposụkedi emi ubon mmọ ẹkekọbọde enye, enye ama ọsọn̄ọ ada anam n̄kpọ Abasi tutu esịm ini n̄kpa esie ediwak isua ke ukperedem. Idụhe owo en̄wen ke ubon nnyịn emi edide Ntiense Jehovah.

Ke 1950, mma n̄wọrọ n̄kodụn̄ ke Grand Junction ke Colorado, ndien do ke n̄kosobo ye Billie. Enye akamana ke 1928 okonyụn̄ okpon ke ini oro n̄kpọ ọkọsọn̄de etieti ke ofụri ererimbot. Minnie eka esie ama esida utuenikan̄ okot Bible ọnọ enye kpukpru okoneyo. Billie ikọyọhọke isua inan̄ ini enye ọtọn̄ọde ndikot n̄wed, ama onyụn̄ ọfiọk ediwak mbụk Bible ke ibuot. Esisịt ini mbemiso 1949, eka esie ama ekpep Bible ye Mme Ntiense Jehovah onyụn̄ ọfiọk ke hell idịghe itie ndutụhọ, edi ke edi udi ofụri ubonowo. (Ecclesiastes 9:5, 10) Minnie ye ebe esie ẹma ẹkabade ẹdi Mme Ntiense Jehovah.

Ke 1949, Billie ama okụre n̄wed ke Boston onyụn̄ ọtọn̄ọ ndinen̄ede nsịn idem n̄kpep Bible. Utu ke ndidi titia ufọkn̄wed, enye ama ebiere ndiyak idem nnọ Abasi. Enye akana baptism ke mbono ofụri ererimbot oro ẹkenịmde ke 1950 ke An̄wambre Yankee  ke New York. Esisịt ini ke oro ebede, ima isobo, idọ ndọ, inyụn̄ itọn̄ọ ndikwọrọ ikọ ofụri ini.

Ikọtọn̄ọ utom ukwọrọikọ nnyịn ke Eugene ke Oregon, inyụn̄ inam ufan ye ediwak owo; ndusụk mmọ ẹsuk ẹdedi ufan nnyịn tutu esịm emi. Ke 1953, ima iwọrọ ikodụn̄ ke Grants Pass ke Oregon, in̄wam ekpri esop emi odude do. Kpa isua oro, ẹma ẹkot nnyịn ididụk Ufọkn̄wed Gilead ọyọhọ otu 23. Ufọkn̄wed emi okodu ekpere South Lansing ke New York, ndien to do sịm New York City edi n̄kpọ nte kilomita 400. Ndusụk Mme Ntiense Jehovah oro ẹkụrede ufọkn̄wed emi ke ẹsinọ ẹka idụt en̄wen ẹkekwọrọ ikọ. Ẹkot mmọ isụn̄utom.

Ke December 1954, ọfiọn̄ ition ke ima ikokụre ufọkn̄wed Gilead, ami ye Billie an̄wan mi ima idụk ekpri ubomofụm kiet ika Brazil. Hour kiet ke ima ikọtọn̄ọ isan̄, engine ubomufụm emi kiet ama abiara, ndien ima ikọduọ ke Bermuda edi n̄kpọ ikanamke nnyịn. Ima ifiak idaha, mfịna onyụn̄ afiak etịbe ndien nnyịn ikọduọ ke Cuba. Ke n̄kpọ nte hour 36 ama ekebe tọn̄ọ ikọtọn̄ọ isan̄, ima ikebehe ke ọfis Mme Ntiense Jehovah ke Rio de Janeiro ke Brazil.

Ke ima ikodu do ke esisịt ini, ami ye n̄wan mi ye isụn̄utom iba en̄wen ima ikpọn̄ do ika Bauru ke São Paulo. Nnyịn ikedi akpa mme isụn̄utom do. Mme owo ẹma ẹbe 50,000 ke obio oro, edi nnyịn kpọt ikedi Mme Ntiense Jehovah.

Ima itọn̄ọ ndikwọrọ ikọ ke ufọk ke ufọk, edi oku ufọkabasi Catholic ama ọtọn̄ọ ndibiọn̄ọ nnyịn. Enye ama esitiene nnyịn onyụn̄ ọdọhọ mme enyeneufọk ẹkûkpan̄ utọn̄ ẹnọ nnyịn. Edi ke urua ifan̄ kpọt, ubon kiet emi mme owo ẹkewakde etieti ẹma ẹnyịme nnyịn ikpep mmọ Bible. Nte ini akakade, mmọ ẹma ẹna baptism. Ikebịghike, mbon en̄wen ẹma ẹtọn̄ọ ndikpep n̄kpọ n̄ko.

Ubon oro ẹkenade baptism do ẹma ẹnyene iman emi ekedide etubom ke ọwọrọetop n̄ka kiet. Mma n̄kokụt mbon n̄ka emi ndọhọ mmọ ẹyak inịm mbono ke ufọk mmọ; mmọ ẹma ẹnyịme. Ke ini oku Ufọkabasi Catholic oro akakade ọkọdọhọ mbon n̄ka oro ẹdọhọ ke mmimọ inyịmeke aba, etubom n̄ka oro ama ọdọhọ mbon n̄ka mmọ ete: “Mbufo mînyịmeke mmọ ẹnịm mbono mi, mmọn̄ n̄wọrọ ke n̄ka emi.” Mmọ ẹma ẹnyịme.

Ke isua oro eketienede, oro edi, ke 1956, ẹma ẹkot nnyịn ididụk akamba mbono ke Santos ke São Paulo. N̄kpọ nte Mme Ntiense 40 ke esop nnyịn ẹma ẹdụk tren ẹka mbono oro. Ima inyọn̄ idikụt leta ke ufọk. Ẹkedọhọ ke ẹmek mi esenyịn oro asan̄ade-san̄a, emi ọwọrọde ke nnyene ndisisan̄a nse esop Mme Ntiense Jehovah. Ntem ke n̄kọtọn̄ọ utom emi ke Brazil nnyụn̄ nnam enye ke n̄kpọ nte isua 25. Iwakke ebiet emi nnyịn mîkodụkke ke idụt emi.

Ndika isan̄ ini oro ikememke. Ikesisan̄a ke ukot, iwat ke enan̄-ukwak, ke ukpatn̄kpọ, ke tren, ye ke bọs ika nsio nsio itie ke idụt emi. Kiet ke otu akpa itie oro ikakade ekedi Jaú ke São Paulo. Oku kiet ama ọkọwọrọ ọsọp nnyịn do.

Enye ama ọdọhọ nnyịn ete: “Ẹkûkwọrọ ikọ ẹnọ ‘erọn̄ mi!’”

Ima ibọrọ enye ite: “Mmọ idịghe erọn̄ fo, ẹdi erọn̄ Abasi.”

Ima idiomi ndibre fim oro ẹkotde The New World Society in Action. Fim emi akaban̄a nte inamde utom ukwọrọikọ ke ofụri ererimbot. Oku oro ama ọdọhọ mbon ufọkabasi esie ẹdisịn ntịme ke ebiet oro ẹdisiode fim oro. Ima isọsọp iketịn̄ inọ mme bodisi. Ke ini oku oro ye mbon ntịme esie ẹdisịmde ebiet oro ẹkesiode fim oro, mme bodisi emi ẹkedade ke inuaotop ẹma ẹnyan mmọ ikan̄ ke iso inyụn̄ iyakke mmọ ẹdụk ẹdisịn ntịme. Mbon oro ẹkesede fim oro ẹma ẹwak etieti, ẹma ẹnyụn̄ ẹnen̄ede ẹma fim oro.

 Ẹma ẹsisua ẹnyụn̄ ẹbiọn̄ọ utom nnyịn ke kpukpru itie oro ikọkwọrọde ikọ ini oro. Ke uwụtn̄kpọ, ke Brusque emi ekperede Blumenau ke Santa Catarina, ima isobo mme asiakusụn̄ iba emi ẹkenyụn̄ ẹkwọrọde ikọ ke ebiet emi ẹkọbọde mmọ etieti. Edi Abasi ama enen̄ede ọdiọn̄ mmọ ke ndikaka iso n̄kwọrọ ikọ kpa ye ukọbọ. Idahaemi, n̄kpọ nte isua 50 ẹbe, ndien esop awak ebe 60 ke ikpehe emi. Mmọ ẹnyụn̄ ẹnyene ata ediye Itie Mbono ke Itajaí.

Kiet ke otu n̄kpọ oro ẹkenemde nnyin akan ke utom nnyịn ke Brazil ekedi ndisidiana ye nditọete nnam ndutịm ikpọ mbono. Ke 1975 esịm 1977, ami n̄kedi esenyịn mbono ke ikpọ mbono oro ẹkenịmde ke akwa an̄wambre Morumbi. Ima idọhọ n̄kpọ nte esop ikie oro ẹkedude ke mbọhọ oro ẹnọ owo duop ke esop kiet kiet ẹdinam an̄wambre oro asana ke okoneyo oro ekesierede usen mbono oro.

Nte mbon bọl ẹkekpọn̄de an̄wambre oro, ẹma ẹkop ndusụk mmọ ẹsakde nditọete nnyịn ẹte: “Sese kpukpru n̄kpri iban oko ye ayan̄ ye n̄kpọ uyet isọn̄ mmọ. M̀mê mmọ ẹkere ke imekeme ndinam an̄wambre emi asana.” Edi etisịm ufọt okoneyo ima inam kpukpru itie ke an̄wambre oro asana! Esenyịn an̄wambre oro ama etịn̄ ye idatesịt ete: “Akpada ikọt mi ofụri urua kiet ndinam utom oro mbufo Mme Ntiense ẹkedade hour ifan̄ kpọt ẹnam do!”

Ke 1980, ete mi ama akpa, ndien ikebịghike, ima ifiak inyọn̄ United States man ikese eka mi enyịn. Enye okodụn̄ ke Fremont ke California. Ima iyom ekpri utom inam, oro edi, isan̄a okoneyo inam ufọk mme owo asana. Utom emi ama ayak ika iso ikwọrọ ikọ ofụri ini inyụn̄ in̄wam mbon Fremont oro ẹsemde usem Portuguese. Ekem ima iwọrọ ikodụn̄ ke San Joaquin Valley inyụn̄ ikwọrọ ikọ inọ mbon oro ẹsemde usem Portuguese ke Sacramento esịm Bakersfield. Idahaemi, n̄kpọ nte esop duop oro ẹsemde usem Portuguese ẹdu ke California.

Ke eka mi ama akakpa ke 1995, ima ikpọn̄ do ika Florida ikese ete an̄wan mi enyịn tutu esịm ini n̄kpa esie. Eka an̄wan mi ama akpakpa ke 1975. Ke 2000, ima iwọrọ ikodụn̄ ke obio-in̄wan̄ kiet emi edide desat onyụn̄ odude ke Colorado. Ima isikwọrọ ikọ ofụri ini inọ mbon Navajo ye mbon Ute emi ẹdide amanaisọn̄ mbon America. Edi akwa n̄kpọ mmọn̄eyet ama etịbe ke February 2014; edima an̄wan mi ama akpa.

Isua 65 edi emi tọn̄ọ owo Ntiense Jehovah akada Bible ọbọrọ ediwak mbụme oro n̄kobụpde enye! Esịt enem mi ke se enye akanamde emi ọnọ mi. Enen̄ede enem mi n̄ko nte n̄kafiakde nse se enye eketịn̄de man mfiọk m̀mê enen̄ede edi se Bible ekpepde. Nte n̄kasan̄ade ntọn̄ọ ndinam n̄kpọ Abasi edi oro, ndien emi enen̄ede ọfọn ye ami.