Ndi utọ mbụme emi esifịna fi? Esifịna ediwak owo ndien mme owo ke ofụri ererimbot ẹyom ndifiọk ibọrọ. Ndi afo ọmọfiọk ibọrọ mbụme emi?

Ata ediwak owo ẹfiọk. Ẹnam didie ẹfiọk? Bible enen̄ede ọbọrọ mme mbụme mmọ. Ndi akpama ndifiọk se Bible etịn̄de? Edieke edide ntre, emekeme ndidọhọ Mme Ntiense Jehovah * ẹdikpep Bible ye afo ke mfọn.

Ndusụk owo ẹkeme ndidọhọ ke mmimọ inyeneke ini ndikpep Bible, ke Bible ọsọn̄ akaha, mîdịghe ke mmimọ iyomke ẹsisan̄a ẹfịna mmimọ. Edi ndusụk owo ẹnyịme ndikpep Bible. Kop se ndusụk mmọ ẹtịn̄de mi:

• “Mma nsika ufọkabasi Catholic ye eke Protestant, n̄ka temple mbon Sikh, ndu ye n̄ka mọn̄k mbon Buddha, nnyụn̄ n̄ka ufọkn̄wed ntaifiọk n̄kekpep mme ukpepn̄kpọ ufọkabasi. Edi mmọ ikekemeke ndibọrọ ediwak mbụme oro n̄kenyenede mban̄a Abasi. Ekem, Ntiense Jehovah kiet ama edi ufọk mi. Mma nnen̄ede mma nte enye akadade Bible ọbọrọ mme mbụme mi, ntre mma nnyịme enye ekpep mi Bible.”—Gill, England.

• “Mma nsinyene ediwak mbụme, edi pastọ ufọkabasi nnyịn ikọbọrọke mi ọfọn. Edi Ntiense Jehovah kiet ama ada Bible kpọt ọbọrọ kpukpru mbụme mi. Ke ini enye okobụpde mi m̀mê nyama ndikpep Bible, mma nsọsọp nnyịme.”—Koffi, Benin.

• “Mma nnen̄ede nyom ndifiọk se isitịbede inọ mme akpan̄kpa. N̄kesikere ke mme akpan̄kpa ẹkeme ndinam owo n̄kpọ, edi mma nyom ndifiọk se Bible etịn̄de. Ntre, mma ntọn̄ọ ndikpep Bible ye ufan kiet emi ekedide Ntiense Jehovah.”—José, Brazil.

• “Mma ndomo ndikot Bible ke idemmi, edi ikan̄wan̄ake mi. Ekem, Mme Ntiense Jehovah ẹma ẹdinam nsio nsio prọfesi Bible an̄wan̄a mi. Mma nnyịme ndikpep Bible man mfiọk mme n̄kpọ en̄wen.”—Dennize, Mexico.

• “Mma nsikere m̀mê Abasi enen̄ede ama mi. Ntre, mma mbọn̄ akam nnọ Abasi emi ẹwakde nditịn̄ mban̄a ke Bible. Edem usen oro, Mme Ntiense Jehovah ẹma ẹdi ufọk mi, ndien mma nnyịme ndikpep Bible.”—Anju, Nepal.

Se mme owo emi ẹtịn̄de anam iti ikọ Jesus emi: “Mmọ oro ẹkerede ẹban̄a unana mmọ ke n̄kan̄ eke spirit ẹkop inemesịt.” (Matthew 5:3) Emi ọwọrọ ke Abasi okobot owo man ẹyom ẹnyụn̄ ẹfiọk imọ. Abasi kpọt ekeme ndinam ifiọk enye, ndien enye ada Bible emi edide Ikọ esie anam ifiọk enye.

Ntem, didie ke Mme Ntiense Jehovah ẹsikpep mme owo Bible? Didie ke afo ekeme nditiene mbọ ufọn? Ẹyebọrọ mme mbụme emi ke ibuotikọ emi etienede.