IBUOTIKỌ MAGAZINE EMI | NDI UFỌN OSỤK ODU NDIBỌN̄ AKAM?
Ndi Enyene Owo Emi Esikopde Akam?
Ndusụk owo ẹkere ke ndibọn̄ akam edi ubiatini, ke idụhe eke esikopde akam. Mbon en̄wen ẹsibọn̄ akam, edi ẹkere ke owo ibọrọke mmimọ. Ete kiet emi mînịmke ke Abasi odu ama etie ekere nte Abasi ekpetiede onyụn̄ ọbọn̄ akam ete: “Sụk sosioro uyo ise.” Enye ọkọdọhọ ke Abasi ikosioroke uyo.
Edi Bible ọdọhọ ke Abasi odu ye nte ke enye esikop akam. Kop se ẹketịn̄de mi ke eset ẹnọ mme owo: “Enye [Abasi] iditreke nditua fi mbọm ke ini okopde uyo eseme fo; enye eyeyere fi ke ndondo oro enye okopde.” (Isaiah 30:19) Itien̄wed Bible en̄wen ọdọhọ ete: “Akam ndinen owo enem [Abasi] esịt.”—Mme N̄ke 15:8.
Jesus ama ọbọn̄ akam ọnọ Ete esie, “ndien ẹma ẹyere enye.”—Mme Hebrew 5:7
Bible etịn̄ n̄ko aban̄a mbon oro Abasi okokopde onyụn̄ ọbọrọde akam mmọ. Mme Hebrew 5:7 ọdọhọ ke Jesus ama anam eben̄e ye “n̄kpeubọk . . . ọnọ Enye emi ekemede ndinyan̄a enye” onyụn̄ ọdọhọ ke “ẹma ẹyere enye.” Emekeme ndikot mban̄a mbon en̄wen emi Abasi ọkọbọrọde akam mmọ ke Daniel 9:21 ye 2 Chronicle 7:1.
Nso ndien isinam mme owo ẹkere ke owo ibọrọke akam mmimọ? Edieke iyomde ẹkop akam nnyịn, inaha ibọn̄ akam inọ mme nsunsu abasi m̀mê mme ete ete nnyịn, edi ana ibọn̄ inọ ata Abasi, oro edi, Jehovah. * N̄ko, Abasi oyom ‘iben̄e se ikemde ye uduak esie,’ oro edi, mme n̄kpọ emi enye amade. Edieke inamde ntem, enye iditreke ‘ndibiọn̄ utọn̄ ke eben̄e nnyịn.’ (1 John 5:14) Ntre, edieke iyomde ẹkop akam nnyịn, ọwọrọ ana idiọn̄ọ ata Abasi inyụn̄ ikpep se idide uduak esie.
Ediwak owo ẹnịm ke akam idịghe n̄kpọ emi ẹnamde sia ufọkabasi ẹnyụn̄ ẹdọhọ ẹnam, edi ke Abasi esikop onyụn̄ eyere akam. Ke uwụtn̄kpọ, Isaac emi otode Kenya ọdọhọ ete: “Mma mbọn̄ akam ndọhọ Abasi an̄wam mi ndiọn̄ọ Bible. Esisịt ini ke oro ebede, owo ama edi edin̄wam mi.” Ke Philippines, Hilda ama oyom nditre sika. Enye ama odomo nditre ediwak ini, edi ikemeke. Ndien ebe esie ama ọdọhọ enye ete, “Ntak mûbọn̄ke akam udọhọ Abasi an̄wam fi?” Enye ama anam item ebe esie emi. Enye ọdọhọ ete: “Idem ama akpa mi ndikụt nte Abasi akan̄wamde mi. Sika ama ọtọn̄ọ ndidorode mi. Mma n̄keme ndien nditre.”
Abasi eben̄e idem ndin̄wam fi ke se ededi oro eben̄ede enye ama akam edi se eben̄ede ekem ye uduak esie.
^ ikp. 6 Bible ọdọhọ ke Abasi ekere Jehovah.
