FIAK se se owo iba emi ẹtịn̄de. Ewe ke afo ekere ke edi akpanikọ? Ediwak owo ẹnịm eke Saul owo Tarsus, emi ẹsinyụn̄ ẹkotde apostle Paul. Ikọ emi enem mmọ onyụn̄ ọsọn̄ọ mmọ idem. (Utom 17:26, 27) Bible etịn̄ ediwak n̄kpọ en̄wen emi owụtde ke imekeme ndidiọn̄ọ Abasi. Ke uwụtn̄kpọ, ke ini Jesus ọkọbọn̄de akam, enye ama etịn̄ ke mbet esie ẹkeme ndidiọn̄ọ Abasi ẹnyụn̄ ẹbọ edidiọn̄ esie.—John 17:3.

Edi ntaifiọk utọ nte Philo ikenịmke emi ke akpanikọ. Mmọ ẹkedọhọ ke nnyịn ikemeke-keme ndidiọn̄ọ Abasi sia usụn̄ esie in̄wan̄ake owo. Ewe ke idida?

Edi akpanikọ ke Bible ọdọhọ ke ndusụk n̄kpọ emi aban̄ade Abasi in̄wan̄ake owo. Ke uwụtn̄kpọ, nnyịn idiọn̄ọke nte Abasi odude uwem ebịghi eketre ye nte ekikere esie okon̄de eketre; ọniọn̄ esie onyụn̄ ayan̄a owo ifiọk. Nnyịn nditre ndidiọn̄ọ mme n̄kpọ emi ikemeke ndikpan nnyịn ndidiọn̄ọ Abasi. Ke nditịm ntịn̄, nditie n̄kere mban̄a mmọ ẹdikam in̄wan̄wam nnyịn ‘isan̄a ikpere Abasi.’ (James 4:8) Ẹyak ineme ndusụk n̄kpọ emi aban̄ade Abasi emi mîn̄wan̄ake nnyịn, ndien iyeneme n̄ko mme n̄kpọ oro nnyịn ikemede ndidiọn̄ọ mban̄a enye.

NTE ABASI ODUDE UWEM EBỊGHI EKETRE: Bible ọdọhọ ke Abasi odu ke “nsinsi nsinsi.” (Psalm 90:2) Emi ọwọrọ ke Abasi inyeneke ntọn̄ọ idinyụn̄ inyeneke utịt. Bible ọdọhọ n̄ko ke “isua esie awak ke ibat akan nte ẹkemede ndidụn̄ọde.”—Job 36:26.

Nte afo ọbọde ufọn: Abasi ọn̄wọn̄ọ ke iyanam fi odu uwem ke nsinsi edieke afo ọdiọn̄ọde imọ. (John 17:3) Ndi ekpenịm emi ke akpanikọ edieke Abasi ke idemesie mîkpodụhe uwem ke nsinsi? “Nsinsi Edidem” kpọt ekeme ndinam owo odu uwem ke nsinsi.—1 Timothy 1:17.

EKIKERE ABASI: Bible ọdọhọ ke owo “ikemeke ndidụn̄ọde ifiọk” Abasi sia ekikere esie okon̄ akan ekikere nnyịn. (Isaiah 40:28; 55:9) Imosụk ise Bible obụpde ete: “Anie ọfiọk ekikere Jehovah, man ekpeteme Enye?”—1 Corinth 2:16.

Nte afo ọbọde ufọn: Abasi esikop nsio nsio akam emi mme owo ẹbọn̄de, idem ọkpọkọm mmọ ẹbọn̄ ukem ini. (Psalm 65:2) Enye esikam okụt kpukpru akadan̄abasi emi ẹduọde ke isọn̄. Ndi n̄kpọ ekeme ndiwak Abasi n̄kaha ke ibuot tutu enye idiọn̄ọke fi inyụn̄ ikopke akam emi ọbọn̄de ọnọ enye? Ihih, sia ekikere esie inyeneke adan̄a. Idịghe se ẹtetịn̄, afo ‘ọmọsọn̄ urua akan ediwak akadan̄abasi.’—Matthew 10:29, 31.

USỤN̄ ABASI: Bible ọdọhọ ke owo ikemeke “[ndifiọk] utom oro ata Abasi anamde ọtọn̄ọde ke ntọn̄ọ tutu esịm utịt.” (Ecclesiastes 3:11) Ntre, tutu amama, nnyịn idifiọkke kpukpru n̄kpọ iban̄a Abasi. Owo inyụn̄ ikemeke “ndifiọk mme usụn̄ esie” sia ọniọn̄ esie ayan̄a owo ifiọk. (Rome 11:33) Edi, Abasi enyịme ndiyarade usụn̄ esie nnọ mbon oro ẹyomde ndinem enye esịt.—Amos 3:7.

Nte afo ọbọde ufọn: Idụhe nte mûdukpepke mbufa n̄kpọ uban̄a Abasi ye usụn̄ esie ke ini ekpepde Bible. Emi ọwọrọ ke imekeme ndisan̄a n̄kpere Ete nnyịn ke heaven ke nsinsi.

Sia ndusụk n̄kpọ emi aban̄ade Abasi mîn̄wan̄ake nnyịn, ndi emi ọwọrọ ke nnyịn ikemeke ndidiọn̄ọ enye? Ihih. Ediwak n̄kpọ do ke Bible emi ẹkemede ndinam nnyịn inen̄ede idiọn̄ọ Abasi. Se ndusụk mmọ mi:

ENYỊN̄ ABASI: Bible ọdọhọ ke Abasi ọnọ idemesie enyịn̄. Abasi ọdọhọ ete: “Ami ndi Jehovah. Enyịn̄ mi edi oro.” Enyịn̄ Abasi odu n̄kpọ nte itie 7,000 ke Bible. Idụhe enyịn̄ en̄wen emi awakde ntem ke Bible.—Isaiah 42:8.

Nte afo ọbọde ufọn: Kop se Jesus eketịn̄de mi ke akam: “Ete nnyịn emi odude ke heaven, yak ẹnam enyịn̄ fo asana.” (Matthew 6:9) Afo n̄ko emekeme ndisikot enyịn̄ Abasi ke ini ọbọn̄de akam. Jehovah ayanyan̄a kpukpru mbon oro ẹkponode enyịn̄ esie.—Rome 10:13.

EBIETIDỤN̄ ABASI: Bible etịn̄ aban̄a enyọn̄ ye isọn̄. Nnyịn mme owo idụn̄ mi ke isọn̄ ndien mme spirit ẹdụn̄ ke enyọn̄. (John 8:23; 1 Corinth 15:44) Bible esiwak ndida ikọ oro “heaven” ntịn̄ mban̄a ebiet emi mme spirit ẹdụn̄de. “Ebietidụn̄” Abasi emi okobotde kpukpru n̄kpọ odu ke heaven.—1 Ndidem 8:43.

Nte afo ọbọde ufọn: Emi anam etịm ọfiọk Abasi; anam ọfiọk ke enye idụhe ke kpukpru ebiet nte ndusụk owo ẹdọhọde. Jehovah edi ata Owo  onyụn̄ enyene akpan ebietidụn̄. Edi “idụhe baba n̄kpọ kiet oro Abasi obotde eke edịbede enye ke enyịn.”—Mme Hebrew 4:13.

UTỌ OWO EMI ABASI EDIDE: Bible etịn̄ utọ owo emi Jehovah edide. Ke uwụtn̄kpọ, 1 John 4:8 ọdọhọ ke “Abasi edi ima.” Akananam enye isụhu nsu. (Titus 1:2) Abasi isinamke asari. Enye esitua owo mbọm isinyụn̄ isọpke iyatesịt. (Exodus 34:6; Utom 10:34) Ndien ekeme ndikpa fi idem ndifiọk ke Abasi oyom mbon oro ẹkponode enye ẹdi “ata ufan esie.”—Psalm 25:14.

Nte afo ọbọde ufọn: Afo emekeme ndidi ufan Jehovah. (James 2:23) Nte edide edidiọn̄ọ utọ owo emi Abasi edide, ntre ke mme n̄kpọ ke Bible ẹdinen̄ede an̄wan̄a fi.

Ikpanaha ikere ke nnyin ikemeke ndidiọn̄ọ Jehovah Abasi sia Bible etịn̄ ediwak n̄kpọ aban̄a enye. Enye onyụn̄ oyom nnyịn idiọn̄ọ imọ. Bible ọdọhọ ete: “Edieke afo oyomde enye, enye ayayak fi okụt enye.” (1 Chronicle 28:9) Mbọk kot Bible nyụn̄ tie kere se okotde man ọdiọn̄ọ Abasi. Edieke anamde emi, Bible ọdọhọ ke Abasi “ayasan̄a ekpere” fi.—James 4:8.

Edi omosụk ekeme ndikere m̀mê edisasan̄a didie idi ufan Abasi sia mûdiọn̄ọke kpukpru n̄kpọ uban̄a enye. Kere ise: Ndi ana owo ọfiọk kpukpru n̄kpọ aban̄a ibọk mbemiso enye edi ufan dọkta? Ihih! Ata edima ufan dọkta ekeme ndidi owo emi mîfiọkke n̄kpọ ndomokiet iban̄a ibọk. Edi mmọ mbiba ẹkeme ndidi itai ye aban̄. Se ikam idide akpan n̄kpọ edi ke ufan dọtka oro ọfiọk utọ owo emi ufan esie edide onyụn̄ ọfiọk se enye amade ye se enye asuade. Kpasụk ntre, Bible ekeme ndin̄wam fi ọfiọk utọ owo emi Jehovah edide, ndien se anade ọdiọn̄ọ edi oro man edi ufan Abasi.

Bible etịn̄ ediwak n̄kpọ aban̄a Abasi, ndien mme n̄kpọ emi ayan̄wam nnyịn idiọn̄ọ Abasi. Ndi akpama ndifiọk mme n̄kpọ en̄wen mban̄a Jehovah Abasi? Mme Ntiense Jehovah ẹsikpep mme owo Bible ke mfọn. Mbọk yom usụn̄ sobo ye mmọ ke edem mbufo mîdịghe ka ikpehe Intanet nnyịn emi, www.dan124.com/efi.