Enan̄-mbakara inan̄ ke ẹfehe ẹdi. Ẹkeme ndida ke anyan ebiet n̄kop ntịm-ikpat mmọ. Se Bible etịn̄de aban̄a enan̄-mbakara emi ye mme andiwat mmọ odoro owo uten̄e. Akpa enan̄-mbakara edi afia, ndien andiwat enye edi obufa edidem emi ẹnọde ubọn̄. Enan̄-mbakara emi etienede enye ke edem adat nte ikan̄, ndien ẹnọ andidoro enye ke edem odudu ndisio emem mfep ke isọn̄. Ọyọhọ enan̄-mbakara ita ebre nte n̄kan̄, ndien andidoro enye ke edem akama udomon̄kpọ emi owụtde ke udia ayanana etieti. Ọyọhọ inan̄ edi ntọn̄ntọn̄ enan̄-mbakara emi etiede udọn̄ọ udọn̄ọ. Emi owụt ke udọn̄ọ ye nsio nsio n̄kpọ en̄wen oyowot ata ediwak owo, ndien andidoro enye ke edem ekere N̄kpa. Udi etiene enye ke edem onyụn̄ emen ata ediwak owo.​—Ediyarade 6:​1-8.

“Idem ama enyek mi akpa ini oro n̄kokotde mban̄a mme awat enan̄-mbakara inan̄ oro. N̄kekere ke Usen Ikpe ekpere ndien ke ndibọhọke sia mmen̄keben̄eke idem.”​—Crystal.

“Ama enem mi tutu ndikot mban̄a mme awat enan̄-mbakara inan̄ emi. Ke mma n̄kọdiọn̄ọ se mmọ ẹdade ẹban̄a, n̄kukụt emi ama enen̄ede an̄wan̄a mi.”​—Ed.

Ke ini okotde aban̄a mme awat enan̄-mbakara inan̄ emi ẹtịn̄de ẹban̄a ke n̄wed Ediyarade, ndi etie fi nte eketiede Crystal? Mîdịghe ndi etie fi nte eketiede Ed? N̄kukụt oro aban̄ade mme awat enan̄-mbakara oro edi kiet ke otu n̄kukụt emi ediwak owo ẹdiọn̄ọde. N̄kukụt emi odu ke n̄wed Ediyarade emi edide akpatre n̄wed ke Bible. Ndi ọmọfiọk ke emekeme ndidia ufọn edieke n̄kukụt emi an̄wan̄ade fi? Nso ufọn ke edidia? Abasi ọdọhọ ke oyokop inemesịt edieke okotde, ekpepde n̄kpọ oto, onyụn̄ anamde se idude ke n̄wed Ediyarade emi.​—Ediyarade 1:​1-3.

N̄kukụt emi aban̄ade mme awat enan̄-mbakara inan̄ esinam ndusụk owo ndịk, edi Abasi iyomke n̄kukụt emi anam fi ndịk. Ediwak owo ẹma n̄kukụt emi sia enye anam mmọ ẹtetịm ẹbuọt idem ye Abasi ẹnyụn̄ ẹdori enyịn ke n̄kpọ ọyọfọn ke ini iso. Enye ekeme ndin̄wam fi n̄ko. Mbọk kot ibuotikọ oro etienede.