NDINỌ ukpep oro enyenede uforo esịne editịn̄ ikọ mfiak ntịn̄. Ke ini etịn̄de akpan n̄kpọ awak ebe ini kiet, otuowo ọyọsọp eti enye. Edieke afiakde etịn̄ ekikere ke usụn̄ oro okpụhọrede esisịt, enye akam ekeme ndin̄wan̄a ata mfọn mfọn.

Edieke mme andikpan̄ utọn̄ nnọ fi mîtịghi se afo etịn̄de, ikọ fo idikarake se mmọ ẹnịmde ke akpanikọ m̀mê nte mmọ ẹdude uwem. Eyedi mmọ ẹyeka iso ndikere mban̄a mme akpan n̄kpọ oro afo okodoride san̄asan̄a nsọn̄uyo.

Jehovah, Akwa Anditeme nnyịn enịm uwụtn̄kpọ edifiak ntịn̄ n̄kpọ ọnọ nnyịn. Enye ama ọnọ idụt Israel Ibet Duop. Ebede ke etịn̄ikọ oro edide angel, enye ama anam idụt oro okop mme ewụhọ oro ke Obot Sinai. Ke ukperedem enye ama ewewet mmọ ọnọ Moses. (Ex. 20:1-17; 31:18; Deut. 5:22) Ke ndausụn̄ Jehovah, Moses ama afiak okot mme ewụhọ oro ọnọ idụt oro mbemiso mmọ ẹkedụkde Isọn̄ Un̄wọn̄ọ, ndien ke ndausụn̄ edisana spirit, Moses ama ewet enye enịm, nte ẹkụtde ke Deuteronomy 5:6-21. Ewụhọ oro ẹkenọde Israel ama esịne se ẹkeyomde ẹto mmọ nte mmọ ẹma, ẹnyụn̄ ẹnam n̄kpọ Jehovah ke ofụri esịt, ofụri ukpọn̄, ye ofụri odudu. Ẹma ẹfiak ẹtịn̄ emi ndien ndien. (Deut. 6:5; 10:12; 11:13; 30:6) Ntak-a? Koro nte Jesus eketịn̄de, enye ekedi “akamba ye ebe-iso item.” (Matt. 22:34-38) Ebede ke prọfet Jeremiah, Jehovah ama eti mbon Judah awak ebe utịm ike-20 adan̄a nte edide akpan n̄kpọ ndikop uyo esie ke kpukpru se enye okowụkde mmọ. (Jer. 7:23; 11:4; 12:17; 19:15) Ndien ebede ke Ezekiel, Abasi ama etịn̄ awak ebe utịm ike-60 ete ke mme idụt “ẹyefiọk ẹte ke [imọ idi] Jehovah.”—Ezek. 6:10; 38:23.

Ke n̄wetnnịm n̄kpọ aban̄ade utom ukwọrọikọ Jesus, nnyịn imokụt n̄ko nte ẹfiakde ẹtịn̄ n̄kpọ uforo uforo. Ke uwụtn̄kpọ, Gospel inan̄ ẹdu—kiet kiet etịn̄de mme akpan n̄kpọntịbe oro ẹbụkde ke Gospel kiet efen m̀mê akande oro, edi obụkde mme n̄kpọntịbe emi ke usụn̄ oro okpụhọrede esisịt ọkpọn̄ eken. Ke ukpepn̄kpọ esie, Jesus ama esitịn̄  akpan item kiet awak ebe ini kiet, edi ke nsio nsio usụn̄. (Mark 9:34-37; 10:35-45; John 13:2-17) Ndien ke adan̄aemi okodude ke Obot Olive usen ifan̄ mbemiso n̄kpa esie, Jesus ama ada edifiak ntịn̄ odori nsọn̄uyo ke akpan item emi: “Ẹkpeme . . . koro mbufo mîfiọkke usen eke Ọbọn̄ mbufo [edidide].”—Matt. 24:42; 25:13.

Ke An̄wautom. Ke ini afo ọnọde mme owo ikọ ntiense, afo omodori enyịn nte ke mmọ ẹyeti se afo etịn̄de. Ndifiak ntịn̄ ikọ uforo uforo ekeme ndin̄wam ndisịm utịtmbuba oro.

Ediwak ini, edifiak ntịn̄ ikọ ke ini nneme akade iso ayan̄wam ndinam enye ọsọn̄ọ odu owo ke ekikere. Ntem, ke ama okokot itie N̄wed Abasi, afo emekeme ndidori nsọn̄uyo ebe ke ndisio akpan ikpehe n̄wụt nnyụn̄ mbụp, “Ndi omokụt nte ẹsịnde mme ikọ oro?”

Ẹkeme ndida akpatre udịmikọ ke nneme nnam n̄kpọ uforo uforo n̄ko. Ke uwụtn̄kpọ, afo emekeme ndidọhọ: “Akpan n̄kpọ oro n̄kerede ke afo eyeti ke nneme nnyịn edi . . . ” Ndien ekem fiak tịn̄ enye ibio ibio. Enye ekeme ndidi se ikade ntem: “Uduak Abasi edi nte ke ẹyenam isọn̄ akabade edi paradise. Uduak oro iditreke ndisu.” Mîdịghe emekeme ndidọhọ: “Bible owụt in̄wan̄-in̄wan̄ ete ke nnyịn idu uwem ke ukperedem ini akani editịm n̄kpọ emi. Edieke anade nnyịn ibọhọ utịt esie, oyom nnyịn ifiọk se Abasi oyomde oto nnyịn.” Mîdịghe ekeme ndidi: “Nte nnyịn ima ikokụt, Bible ọnọ nti item ke nte ẹkpeyọde mme mfịna ubon.” Ke ndusụk idaha afo emekeme ndifiak ntịn̄ sụk se idude ke Bible nte akpan n̄kpọ oro anade ẹti. Nte ededi, oyom ẹbem iso ẹkere man ẹnam emi uforo uforo.

Ke mfiakn̄ka, ọkọrọ ye ukpepn̄kpọ Bible, edifiak ntịn̄ ekeme ndibuana mme mbụme ndụn̄ọde.

Ke ini item Bible mîsọpke in̄wan̄a owo m̀mê ọsọn̄de owo ndida enye nsịn ke edinam, ekeme ndiyom afo etịn̄ n̄kpọ oro awak ebe ini kiet. Domo nditịn̄ enye ke nsio nsio usụn̄. Iyomke nneme oro ọnọniọn̄, edi ekpenyene ndisịn udọn̄ nnọ eyen ukpepn̄kpọ ndika iso n̄kere n̄kpọ oro. Ti ete ke utọ edifiak ntịn̄ oro ke Jesus akada an̄wam mme mbet esie ndikan udọn̄ ediyom ndidi akpa.—Matt. 18:1-6; 20:20-28; Luke 22:24-27.

Ke Ini Ọnọde Utịn̄ikọ. Edieke afo adade ke mbot utịn̄ikọ ọnọ utịn̄ikọ,  uduak fo idịghe sụk ndinọ ntọt. Afo oyom enye an̄wan̄a otuowo, oyom mmọ ẹti, ẹnyụn̄ ẹda enye ẹsịn ke edinam. Man anam oro, fiak tịn̄ n̄kpọ nte ọfọnde.

Nte ededi, edieke afo afiakde etịn̄ mme akpan n̄kpọ akaha, otuowo ekeme nditre ndikpan̄ utọn̄ nnọ fi. Da ntịn̄enyịn mek mme akpan n̄kpọ oro ẹdotde ẹdori san̄asan̄a nsọn̄uyo. Nte ido edide, emi esiwak ndidi mme akpan n̄kpọ oro adade atat utịn̄ikọ fo, edi mmọ ẹkeme n̄ko ndisịne mme ekikere efen oro ẹdinyenede san̄asan̄a ufọn ẹnọ otuowo fo.

Man ada edifiak ntịn̄ ikọ anam n̄kpọ, afo emekeme ndibem iso ntịn̄ mme akpan n̄kpọ fo ke ntọn̄ọikọ. Nam ntre ebe ke mbio mbio ikọ oro ẹnọde ntatara ekikere ẹban̄a se afo editịn̄de, ye mme mbụme, m̀mê mbio mbio uwụtn̄kpọ oro ẹwụtde mme mfịna oro ẹyomde usọbọ. Afo emekeme ndisiak ibat akpan n̄kpọ oro ẹdude onyụn̄ etịn̄ mmọ ke adiana ke adiana. Ekem tat mme akpan n̄kpọ oro kiet kiet ke idem utịn̄ikọ fo. Emekeme ndifiak ndori nsọn̄uyo ke idem utịn̄ikọ fo ebe ke ndifiak ntịn̄ akpan n̄kpọ kiet kiet mbemiso ebede aka efen. Mîdịghe emekeme ndinam emi ebe ke ndida uwụtn̄kpọ oro abuanade nte ẹkemede ndida akpan n̄kpọ oro nnam n̄kpọ. Emekeme ndidori nsọn̄uyo efen efen ke mme akpan n̄kpọ fo ebe ke ndifiak ntịn̄ mmọ ke utịtikọ, osiode mmọ owụt ebe ke ndiwụt ukpụhọde, ndibọrọ mme mbụme oro ẹkedemerede, m̀mê nditịn̄ ibio ibio mban̄a usọbọ mme mfịna oro ekemende owụt.

Ke adianade ye se ẹtịn̄de ke enyọn̄ emi, etịn̄ikọ oro enyenede mbufiọk eyetịn̄ enyịn ese owo kiet kiet ke otuowo esie. Edieke ndusụk ekikere mîn̄wan̄ake ndusụk mmọ, etịn̄ikọ ọyọfiọk. Edieke n̄kpọ oro edide akpan n̄kpọ, enye ayafiak etịn̄. Nte ededi, ekeme ndidi edifiak ntịn̄ mme ukem ikọ oro ẹketịn̄de idiyọhọke uduak esie. Ndinọ ukpep esịne se ikande oro. Ana enye okpụhọde ekekem ye idaha. Ekeme ndiyom enye adian mme n̄kpọ oro mîkesịneke ke utịn̄ikọ esie. Afo ndikpep ndinọ se otuowo oyomde ke usụn̄ emi eyenen̄ede owụt uforo oro afo enyenede nte andikpep.