Edima Andikot:

“Ditiene mi.” (Mark 10:21) Jesus Christ ada ikọ emi okot nnyịn ete itiene imọ. Ndi afo emeyere ikot esie emi? Ndiyere ikot emi eyenen̄ede otụk uwem fo. Ntak-a?

Jehovah ọkọnọ ikpọn̄-ikpọn̄ edibon Eyen esie edi isọn̄ man edinọ uwem esie nte ufak. (John 3:16) Ke adianade ye Eyen oro ndikpa nnọ nnyịn, enye ama owụt nnyịn nte ikpodude uwem. Enye ama aka iso ọsọn̄ọ ada ke kpukpru n̄kpọ oro enye akanamde, onyụn̄ anam Ete esie adat esịt. Jesus ama owụt nnyịn n̄ko nte ikpekpebede Ete esie. Eyen emi ama etịm owụt mme usụn̄ ye uduak Ete esie ke ikọ ye ke edinam esie.—John 14:9.

Bible ọdọhọ ke Jesus ama enịm ‘uwụtn̄kpọ ọnọ nnyịn man ikpetiene nde ikpat esie ketket.’ (1 Peter 2:21) Edieke iyomde nditetịm nsan̄a n̄kpere Jehovah, edieke iyomde ndidu uwem oro etịmde enyene se ọwọrọde idahaemi, edieke inyụn̄ iyomde ndika iso nsan̄a ke usụn̄ oro adade esịm nsinsi uwem, do ana itiene nde ikpat Christ ketket.

Man itọn̄ọ isan̄ emi, oyom imehe ye nte Jesus okodude uwem ke isọn̄. Ntre, yak idụn̄ọde se ẹwetde ke Bible ẹban̄a Jesus. Nditie n̄kere mme n̄kpọ oro Jesus eketịn̄de onyụn̄ anamde, nnyụn̄ n̄kere nte nnyịn ikemede ndikpebe enye ke ikọ ye ke edinam, ayanam itịm ikụt nte ikpetienede enye.

N̄wed emi akpakam anam ima oro afo amade Jesus ye Jehovah etetịm okpon. Ima oro akpakam onụk fi nditiene nde ikpat Jesus ketket man akpanam Jehovah adat esịt kemi ye ke nsinsi.