IBUOT 13
“Ami Mmama Ete”
1, 2. Nso ke apostle John eketịn̄ aban̄a akpatre mbubreyo oro mme apostle ẹkedude ye Jesus?
AKANIEREN kiet edebi eton̄wed ke mmọn̄n̄wed; enye eti mme n̄kpọ emi ẹketịbede. Enye ekere John, ndien enye ikpọn̄ osụhọ ke otu mme apostle Jesus Christ. John emi edide n̄kpọ nte isua 100 idahaemi ke ekere se iketịbede ke n̄wọrọnda mbubreyo kiet ke n̄kpọ nte isua 70 emi ẹkebede, kpa akpatre mbubreyo emi enye ye mme apostle eken ẹkedude ye Jesus mbemiso enye akpade. Sia edisana spirit Abasi adade John usụn̄, enye ekeme nditi nnyụn̄ n̄wet kpukpru se iketịbede.
2 Ke okoneyo usen oro, Jesus ama etịn̄ in̄wan̄-in̄wan̄ ke ẹmọn̄ ẹwot imọ. John ikpọn̄-ikpọn̄ etịn̄ ntak emi Jesus ọkọdọhọde ke imọ imọn̄ inyịme ndikpa ibak ibak n̄kpa oro, ete: “Man ererimbot ọfiọk ete ke ami mmama Ete, idem kpa nte Ete ọkọnọde mi ewụhọ ete nnam, kpa ntre ke ami nnam. Ẹdaha ke enyọn̄, ẹyak nnyịn ikpọn̄ ebiet emi.”—John 14:31.
3. Didie ke Jesus okowụt ke imọ imama Ete imọ?
3 “Ami mmama Ete.” Idụhe se ikebehede Jesus ikan emi. Enye ikesikwọhọ-kwọ emi nte ikwọ. Ke nditịm ntịn̄, John 14:31 edi n̄kukụre itie ke Bible emi Jesus etịn̄de in̄wan̄-in̄wan̄ ke imama Ete imọ. Nte Jesus okodude uwem ama owụt ke enye ama Ete esie. Se enye akanamde kpukpru usen ama owụt ke enye ama Jehovah. Uko, n̄kopitem, ye ime Jesus ẹma ẹwụt ke enye ama Abasi. Ima okonụk enye anam ofụri se enye akanamde ke utom ukwọrọikọ esie.
4, 5. Orụk ima ewe ke Bible ọdọhọ ẹnyene, ndien nso ke ẹkeme nditịn̄ mban̄a ima oro Jesus akamade Jehovah?
4 Mfịn, ndusụk owo ẹkeme ndikere ke ima edi ndebe ndebe edu. Mmọ ẹkeme ndikere mban̄a ima emi ẹsitịn̄de ke uto, ẹsikwọde ke ikwọ, m̀mê mfụmmfụm ima ke ufọt eren ye n̄wan. Bible etịn̄ aban̄a ima eren ye n̄wan ke usụn̄ oro owụtde ukpono, idịghe ke oburobụt usụn̄ oro mme owo ẹsitịn̄de mfịn. (Mme N̄ke 5:15-21) Edi Ikọ Abasi etịn̄ ekese aban̄a orụk ima en̄wen. Ima enye emi idịghe ọkpọsọn̄ udọn̄ emi ẹnyenede ẹban̄a n̄kpọ m̀mê ima ibio ini; idịghe ima oro ẹkerede-kere. Enye abuana esịt ye ekikere. Orụk ima emi oto ọwọn̄esịt, nti edumbet ẹkara enye, ndien ẹda nti edinam ẹfiọk orụk ima emi. Enye idịghe mfụmmfụm ima. Ikọ Abasi ọdọhọ ke orụk “ima [emi] idibehe ifep tutu amama.”—1 Corinth 13:8.
5 Ke otu kpukpru mme owo emi ẹkenam ẹdude uwem, Jesus ama Jehovah akan. Idụhe owo ndomokiet emi anamde ewụhọ oro Jesus ọkọdọhọde ke edi n̄kponn̄kan ke otu kpukpru mme ewụhọ Abasi nte Jesus. Ewụhọ oro edi: “Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo ye ke ofụri ukeme fo.” (Mark 12:30) Jesus akasan̄a didie enyene orụk ima emi? Nso ke enye akanam man aka iso enen̄ede ama Abasi ke ini enye okodude ke isọn̄? Ndien didie ke nnyịn ikeme ndikpebe enye?
Mbịghi-N̄kan ye Akakan Ima
6, 7. Nnyịn isan̄a didie ifiọk ke Mme N̄ke 8:22-31 etịn̄ aban̄a Eyen Abasi, iban̄ake ọniọn̄ emi edide edu?
6 Ndi akanam amanam utom ye ufan fo onyụn̄ edikụt ke utom oro anam mbufo mbiba ẹnen̄ede ẹkpere kiet eken? Nte emi ekenemde fi ekeme ndinam ọfiọk se ikanamde Jehovah ye ikpọn̄-ikpọn̄ edibon Eyen esie ẹma kiet eken. Imetịn̄ ediwak ini iban̄a Mme N̄ke 8:30, edi ẹyak ida se idude ke mme ufan̄ikọ eken idụn̄ọde se idude ke itien̄wed oro. Imokụt nte ẹdade odudu spirit ẹtịn̄ ke ufan̄ikọ 22 esịm 31 ẹban̄a ọniọn̄ nte n̄kpọ eke enye edide owo. Isan̄a didie ifiọk ke ẹtịn̄ ikọ emi ẹban̄a Eyen Abasi?
7 Ọniọn̄ ọdọhọ ke ufan̄ikọ 22 ete: “Jehovah okobot mi nte ntọn̄ọ usụn̄ esie, kpa ntọn̄ọ utom esie eke eset.” Idịghe ọniọn̄ emi edide edu etịn̄ ikọ emi, koro owo ‘ikobotke-bot’ edu emi. Enye inyeneke ntọn̄ọ kpa nte Jehovah mînyeneke ntọn̄ọ, koro Jehovah enyenyene edu emi kpukpru ini. (Psalm 90:2) Nte ededi, Eyen Abasi ekedi “akpan ke otu kpukpru edibotn̄kpọ.” Ẹkebobot enye; enye ekedi ntọn̄ọ kpukpru utom Jehovah. (Colossae 1:15) N̄wed Mme N̄ke owụt ke Eyen ama ododu mbemiso ẹkebotde enyọn̄ ye isọn̄. Sia enye edide Ikọ, oro edi, Etịn̄ikọ ke ibuot Abasi, enye ama owụt ọniọn̄ Jehovah ke mfọnmma usụn̄.—John 1:1.
8. Nso ke Eyen akanam ke anana-ibat isua oro enye okodude ke heaven mbemiso enye ekedide isọn̄, ndien nso ke ikpekere iban̄a ke ini isede n̄kpọ-obot?
8 Nso ke Eyen akanam ke anana-ibat isua oro enye okodude ke heaven mbemiso enye ekedide isọn̄? Ufan̄ikọ 30 ọdọhọ ke enye okodu Abasi ke n̄kan̄ nte “ata anamutom.” Nso ke oro ọwọrọ? Colossae 1:16 ọbọrọ ete: “Ẹkebot kpukpru n̄kpọ eken ke heaven ye ke isọn̄ oto ke enye . . . Ẹkebot kpukpru n̄kpọ eken oto ke enye ẹkenyụn̄ ẹbot ẹnọ enye.” Ntre Jehovah, kpa Andibot, akada Eyen esie, Ata Anamutom, obot kpukpru mme n̄kpọ eken—ọtọn̄ọde ke mme angel ke heaven tutu esịm akaka ekondo, ọkọrọ ye isọn̄ ye mme utịbe utịbe uduot eto ye unam emi ẹdude ke esịt, tutu esịm akakan ke otu kpukpru mme edibotn̄kpọ ke isọn̄, oro edi, owo. Ke ndusụk usụn̄, imekeme ndimen nte Ete ye Eyen ẹdianade kiet ndomo ye nte ewet mbuwed ufọk adianade kiet anam utom ye ọbọpufọk emi enyịmede ndibọp ufọk oro nte ewet mbuwed ufọk oyomde. Ke ini n̄kpọ-obot ekededi enyenede nnyịn ndyọ, oro esinam inọ Akwa Andibot itoro. (Psalm 19:1) Nte ededi, emi ekeme nditi nnyịn n̄ko nte Andibot ye “ata anamutom” esie ẹkopde inemesịt ndidiana kiet nnam utom ke anana-ibat isua.
9, 10. (a) Nso ikanam Jehovah ye Eyen esie ẹnen̄ede ẹma kiet eken? (b) Nso ikeme ndinam fi etetịm ekpere Ete fo eke heaven?
9 Ke ini mme anana-mfọnmma owo iba ẹnamde utom ọtọkiet, mmọ ẹsinyene ntuaha ndusụk ini. Ikedịghe ntre ye Jehovah ye Eyen esie! Eyen ama anam utom ye Ete ke anana-ibat isua, onyụn̄ ‘adara ndidu ke iso esie kpukpru ini.’ (Mme N̄ke 8:30) Ih, enye ama adara ndidu ye Ete esie, Ete esie ama onyụn̄ adara ndidu ye enye. Ntem, Eyen ama etetịm ebiet Ete esie onyụn̄ ekpebe mme edu Abasi. Imosụk ise nte Ete ye Eyen ẹkenen̄erede ẹma kiet eken! Enen ndidọhọ ke emi edi mbịghi-n̄kan ye akakan ima ke ofụri ekondo.
10 Edi nso ke oro ọwọrọ ọnọ nnyịn? Afo emekeme ndikere ke imọ idikemeke ndikpere Jehovah ntre tutu amama. Imọfiọk ke idụhe owo nnyịn ndomokiet emi okponde itie nte Eyen esie. Edi, imenyene n̄wọrọnda ifet. Ti ke Jesus ndikanam utom ye Ete esie akanam enye etetịm ekpere Enye. Ima amanam Jehovah ọnọ nnyịn ifet ndidi ‘nsan̄autom esie.’ (1 Corinth 3:9) Nte ikpebede uwụtn̄kpọ Jesus ke utom ukwọrọikọ nnyịn, ikpenyene nditi kpukpru ini ke idi nsan̄autom Abasi. Emi ayanam itetịm ikpere Jehovah. Ndi odu ifet ekededi oro akande emi?
Se Jesus Akanamde man Aka Iso Enen̄ede Ama Jehovah
11-13. (a) Ntak emi ikpadade ima nte odu-uwem n̄kpọ, ndien ke ini Jesus ekedide eyenọwọn̄, nso ke enye akanam man aka iso enen̄ede ama Jehovah? (b) Didie ke Eyen Abasi okowụt ke imọ imama ndikpep n̄kpọ nto Jehovah ke ini enye okodude ke heaven ye ke ini enye ekedide isọn̄?
11 Ke ediwak usụn̄, ima oro odude ke esịt nnyịn etie nte odu-uwem n̄kpọ. Ima etie nte ediye flawa emi oyomde ẹbọk ẹnyụn̄ ẹse ẹban̄a man enye ọkọri onyụn̄ esehe. Edieke nnyịn mîbọkke inyụn̄ ise iban̄a enye, enye ayakpa. Jesus ikadaha ima oro enye amade Jehovah inam mbubru. Enye ama aka iso ama Ete esie ke ofụri ini oro enye okodude ke isọn̄. Ẹyak ise nte enye akanamde emi.
12 Fiak kere se iketịbede ke ini Jesus eketịn̄de ikọ ke temple ke Jerusalem ke ini enye ekedide eyenọwọn̄. Ti ke enye ọkọdọhọ ete ye eka esie oro ẹketịmerede esịt ẹban̄a enye ete: “Ntak emi mbufo ẹkpesan̄ade ẹyom mi? Nte mbufo ikọfiọkke ite nnyene ndidu ke ufọk Ete mi?” (Luke 2:49) Jesus okosụk edi eyenọwọn̄, ndien ana in̄wan̄-in̄wan̄ nte ke enye iketịghi kan̄a nte n̄kpọ eketiede ke heaven mbemiso enye ekedide isọn̄. Kpa ye oro, enye ama enen̄ede ama Ete esie, Jehovah. Enye ama ọfiọk ke ẹsiwụt utọ ima oro ke ndituak ibuot nnọ Jehovah. Ntre idụhe ebiet efen ke isọn̄ oro Jesus akamade nte ufọk Ete esie, kpa ufọk edisana utuakibuot. Enye ama esima ndika do, onyụn̄ ama ndidu mbịghi. Akan oro, enye ama esitiene abuana ke se ẹkesinamde do. Ama ọdọn̄ enye ndikpep n̄kpọ mban̄a Jehovah nnyụn̄ ntịn̄ se enye ọkọfiọkde mban̄a enye. Enye ama ọtọtọn̄ọ ndinam oro mbemiso ekesịmde isua 12, ikonyụn̄ itreke ke ama ekesịm isua 12.
13 Ke ini Eyen Abasi okodude ke heaven, enye ama esisịn ifịk ekpep n̄kpọ oto Ete esie. Ntịn̄nnịm ikọ oro odude ke Isaiah 50:4-6 owụt ke Jehovah ama ọnọ Eyen esie san̄asan̄a ukpep kaban̄a utom esie nte Messiah. Okposụkedi emi utọ ukpep oro akabuanade ndikpep mban̄a ndusụk afanikọn̄ emi ẹdisịmde enye nte Enye Emi Jehovah Eyetde Aran, enye ama esịn ifịk ọbọ ukpep emi. Ke ukperedem, ke Jesus ama ekedi isọn̄ onyụn̄ ọkọri akabade akwa owo, enye okosụk amama ndisika ufọk Ete esie; enye ama esitiene abuana ke edinam utuakibuot ye edikpep mme owo n̄kpọ do nte Jehovah okoyomde ẹnam. Ntem, Bible ọdọhọ ke Jesus ama esika temple ye synagogue kpukpru ini. (Luke 4:16; 19:47) Edieke nnyịn mîyomke ima oro imade Jehovah akpa, oyom isidụk mme mbono esop Christian kpukpru ini, kpa ebiet emi isituakde ibuot inọ Jehovah inyụn̄ inamde ifiọk oro inyenede iban̄a enye ye esịtekọm oro inyenede inọ enye etetịm okpon.
“Enye ọdọk obot ikpọn̄ ndikọbọn̄ akam”
14, 15. (a) Ntak emi Jesus ekesiyomde ndidu ikpọn̄ ndusụk ini? (b) Didie ke mme akam oro Jesus ọkọbọn̄de ọnọ Ete esie ẹkewụt ke enye ama ekpere onyụn̄ okpono Ete esie?
14 Jesus ama esibọn̄ akam n̄ko kpukpru ini man aka iso enen̄ede ama Jehovah. Okposụkedi emi enye ekesitiede ufan ufan esinyụn̄ amade ndidu ye mme owo, enye ama esinyụn̄ ama ndidu ikpọn̄. Ke uwụtn̄kpọ, Luke 5:16 ọdọhọ ete: “Enye osụk odu ikpọn̄ ke desat onyụn̄ ọbọn̄ akam.” Matthew 14:23 ọdọhọ n̄ko ete: “Ekem, ke ama ọkọnọ otuowo ẹnyọn̄ọ, enye ọdọk obot ikpọn̄ ndikọbọn̄ akam. Okposụkedi eyo ama ọkọsọn̄, enye odu do ikpọn̄.” Ke mme ini emi ye mme idaha efen, Jesus okoyom ndidu ikpọn̄, idịghe koro enye akasuade ndidu ye mme owo, edi edi koro enye okoyom ndidu ikpọn̄ ye Jehovah nnyụn̄ ntịn̄ ikọ ifụre ifụre ye Enye ke akam.
15 Ndusụk ini, Jesus ama esidọhọ “Abba, Ete” ke ini ọbọn̄de akam. (Mark 14:36) Ke eyo Jesus, mbonubon ẹkesikot ete ubon “Abba” ke ntak emi ẹmade enye. Ikọ emi ekedi kiet ke otu akpa ikọ emi eyen ekekpepde. Kpa ye oro, enye ekedi ikọ ukpono. Ke adan̄aemi ikọ oro okowụtde nte Jesus ekenen̄erede ekpere edima Ete esie, enye ama owụt n̄ko nte enye ekenen̄erede okpono odudu ukara Ete esie, Jehovah. Kpukpru akam Jesus oro ẹwetde ke Bible ẹnam nnyịn ifiọk nte enye ekekperede okonyụn̄ okponode Ete esie. Ke uwụtn̄kpọ, ke John ibuot 17, apostle John ama ewet anyan akam ofụri esịt emi Jesus ọkọbọn̄de ke akpatre okoneyo oro Enye okodude ke isọn̄. Enen̄ede edi n̄kpọ nsịnudọn̄ ndidụn̄ọde akam oro, onyụn̄ edi akpan n̄kpọ ndikpep ndibọn̄ akam ntre—idịghe ke ndifiak ntịn̄ se Jesus eketịn̄de, edi ke ndiyom usụn̄ ndisitịn̄ ikọ ke ofụri esịt ye Ete nnyịn eke heaven adan̄a ediwak ini nte ikekeme. Ndinam ntre ayanam ika iso itetịm ima enye.
16, 17. (a) Didie ke se Jesus ekesitịn̄de okowụt ke enye ama Ete esie? (b) Didie ke Jesus okowụt nte Ete esie esitatde ubọk?
16 Nte ima ikokokụt, Jesus ikesitịn̄ke kpukpru ini ite “Ami mmama Ete.” Nte ededi, se enye ekesiwakde nditịn̄ ama owụt ke enye ama Ete esie. Didie? Jesus ke idemesie ọkọdọhọ ete: “Mmotoro fi an̄wan̄wa, Ete, Ọbọn̄ enyọn̄ ye isọn̄.” (Matthew 11:25) Ke ini ikekpepde ọyọhọ Ikpehe 2 ke n̄wed emi, ima ikụt ke Jesus ama esima nditoro Ete esie ke ndin̄wam mme owo ẹfiọk Enye. Ke uwụtn̄kpọ, enye ekemen Jehovah odomo ye ete emi ekenen̄erede ọdọn̄ enye ndifen nnọ otụtutọn̄ eyen esie tutu enye etetie ebet eyen oro akabarede esịt mi ọnyọn̄ edi, ndien ke adan̄aemi adade okụt eyen emi ke anyan usụn̄, enye efehe ebịne enye onyụn̄ akawan̄a enye. (Luke 15:20) Anie okpokot itien̄wed oro ndien se Jesus etịn̄de aban̄a ima ye edifen nnọ Jehovah itụkke enye?
17 Jesus ama esiwak nditoro Ete esie ke ntatubọk Esie. Enye ama ada mme anana-mfọnmma ete ye eka ọnọ uwụtn̄kpọ ndiwụt ke nnyịn imekeme ndinịm ke Ete nnyịn ọyọnọ nnyịn edisana spirit kpukpru ini oro iben̄ede enye. (Luke 11:13) Jesus ama etịn̄ n̄ko aban̄a idotenyịn oro Ete esie _ọnọde ke ntatubọk. Jesus ama esinen̄ede ama nditịn̄ mban̄a idotenyịn oro enye ekenyenede ndifiak n̄kodu Ete esie ke n̄kan̄ ke heaven. (John 14:28; 17:5) Enye ama asian mme anditiene enye idotenyịn oro Jehovah ọnọde “ekpri otuerọn̄” Christ, oro edi, idotenyịn ndidu ke heaven nnyụn̄ ntiene Edidem emi edide Messiah n̄kara. (Luke 12:32; John 14:2) Enye ama ada idotenyịn edidu uwem ke Paradise ọdọn̄ anamidiọk oro okoyomde ndikpa esịt. (Luke 23:43) Jesus ndiketịn̄ mban̄a akwa ntatubọk Ete esie ke mme afan̄ emi ama enen̄ede an̄wam enye aka iso etetịm ama Jehovah. Ediwak mme anditiene Christ ẹkụt ke idụhe n̄kpọ ndomokiet emi anamde mmọ ẹtetịm ẹma Jehovah m̀mê emi etịmde ọsọn̄ọ mbuọtidem mmọ ke Jehovah nte mmọ nditịn̄ mban̄a enye ye idotenyịn oro enye ọnọde mbon oro ẹmade enye.
Ndi Afo Ayama Jehovah nte Jesus Akamade?
18. Nso idi ata akpan usụn̄ oro ikpetienede Jesus, ndien ntak?
18 Ke otu kpukpru usụn̄ oro anade itiene Jesus, idụhe akpan usụn̄ efen oro akande emi: Nnyịn inyene ndima Jehovah Abasi ke ofụri esịt, ukpọn̄, ukeme, ye ekikere nnyịn. (Luke 10:27) Ndinyene orụk ima emi ke esịt kpọt ikemke, ana inanam iwụt n̄ko. Jesus ikenyeneke orụk ima emi ke esịt kpọt inọ Ete esie m̀mê ndiketetịn̄ kpọt ete, “Ami mmama Ete.” Enye ọkọdọhọ ete: “Man ererimbot ọfiọk ete ke ami mmama Ete, idem kpa nte Ete ọkọnọde mi ewụhọ ete nnam, kpa ntre ke ami nnam.” (John 14:31) Satan ọkọdọhọ ke idụhe owo ndomokiet emi edinamde n̄kpọ Jehovah ke ntak ima. (Job 2:4, 5) Jesus ama ọnọ mfọnn̄kan ibọrọ ke ubi ubi edidọk Satan emi ke ndinam n̄kpọ uko uko n̄wụt ererimbot adan̄a nte imọ imade Ete imọ. Enye ama okop item tutu ayak uwem esie ọnọ. Ndi afo eyetiene Jesus? Ndi oyowụt ererimbot ke imọ imenen̄ede ima Jehovah Abasi ntre?
19, 20. (a) Mme akpan ntak ewe ke inyene ndisidụk mme mbono esop nnyịn kpukpru ini? (b) Didie ke ikpese ndikpep n̄kpọ ke idem nnyịn, ntie n̄kere, nnyụn̄ mbọn̄ akam?
19 Enen̄ede oyom inyene orụk ima oro man isọn̄ idem ke n̄kan̄ eke spirit. Ntem, Jehovah anam ndutịm ọnọ nnyịn ndituak ibuot ke usụn̄ oro edinamde nnyịn inen̄ede ima imọ. Ke ini odụkde mme mbono esop, ti ke afo odu do ndituak ibuot nnọ Abasi fo. Mme ikpehe utuakibuot oro ẹsịne ndidu ke ini ẹbọn̄de akam, ndikwọ mme ikwọ itoro, nditịm n̄kpan̄ utọn̄, nnyụn̄ ntiene mbuana ke se ẹnamde ke mbono esop edieke ekemede. Utọ mbono esop oro ẹnọ fi ifet ndisịn udọn̄ nnọ ekemmọ mme Christian. (Mme Hebrew 10:24, 25) Ndituak ibuot nnọ Jehovah kpukpru ini ke mme mbono esop nnyịn ayan̄wam fi etetịm ama Abasi.
20 Ndikpep n̄kpọ ke idemfo, ntie n̄kere se ekpepde, nnyụn̄ mbọn̄ akam ẹkeme ndin̄wam fi ke afan̄ emi n̄ko. Da mme n̄kpọ emi nte se idin̄wamde fi ekeme ndidu ikpọn̄ ye Jehovah. Nte afo ekpepde Ikọ Abasi onyụn̄ etiede ekere se ekpepde, Jehovah ke anam fi ọfiọk ekikere esie. Nte afo ọbọn̄de akam, afo ke an̄wan̄a esịt fo ọnọ enye. Ti ete ke akam idịghe ikpîkpu ediben̄e Abasi n̄kpọ. Akam edi n̄ko ifet oro afo enyenede ndikọm Jehovah ke mme edidiọn̄ oro enye ọdiọn̄de fi nnyụn̄ ntoro enye ke mme utịbe utịbe utom esie. (Psalm 146:1) Ke adianade do, nditoro Jehovah an̄wan̄wa ye idatesịt ye ifiopesịt edi mfọnn̄kan usụn̄ ndikọm enye nnyụn̄ n̄wụt ke afo amama enye.
21. Ima oro imade Jehovah edi akpan n̄kpọ adan̄a didie, ndien nso ke idineme ke mme ibuot oro ẹtienede?
21 Ndima Abasi edi akpan n̄kpọ oro edinamde fi enyene nsinsi inemesịt. Se Adam ye Eve ẹkpekenamde man mmọ ẹkụt unen edi oro, edi mmọ ikanamke oro. Ndima Abasi edi ata akpan n̄kpọ oro anade afo anam man ekeme ndibe nnyụn̄ nyọ idomo ekededi. Enye edi ata akpan n̄kpọ oro anamde owo edi anditiene Jesus. Nte ededi, ima oro imade Abasi enyene ebuana ye ima oro imade ekemmọ owo. (1 John 4:20) Ke mme ibuot oro ẹditienede, nnyịn iyodụn̄ọde nte Jesus okowụtde ke imama mme owo. Edi ke ibuot oro etienede, iyeneme ntak emi ediwak owo ẹkekemede ndisan̄a n̄kpere Jesus.
