Ibuot 7

Fiak Demede Akpa Ima Oro!

EPHESUS

1. Ewe esop ke ẹnọ akpa etop Jesus ẹsọk, ndien nso ke enye afiak eti mme esenyịn?

 AKPA etop Jesus enyene esop oro odude ke Ephesus, emi inioro ekedide obio oro uforo odude ke mben esụk Asia Minor emi ekperede isuo Patmos. Enye ọnọ John ewụhọ ete: “Nọ n̄wed ẹsọk angel ufọk Abasi ẹmi ẹdude ke Ephesus, ete: Ntem ke Enye, emi omụmde ntantaọfiọn̄ itiaba akama ke ubọk nnasia Esie, onyụn̄ asan̄ade ke ufọt udiọk-utuenikan̄ o-gold itiaba, ọdọhọ ete.” (Ediyarade 2:1) Nte edide ke etop itiokiet eken, mi Jesus odụri ntịn̄enyịn owụt n̄kpọ oro owụtde idaha odudu esie. Enye eti mme esenyịn ke Ephesus ete ke kpukpru mbiowo ẹdu ke idak ukpeme imọ ye nte ke imọ ke idụn̄ọde kpukpru esop. Tutu edisịm eyo nnyịn, enye amakaiso ndiwụt ima ima itie ibuot emi, ekpemede mbiowo ndien ke mfọnido ọbọkde kpukpru mmọ oro ẹbuanade ye esop emi. Ke ini ke ini, enye esinam ukpụhọde ke mme ndutịm esop man un̄wana ekeme ndidọdiọn̄ nyama. Ih, Jesus edi Etubom Ekpemerọn̄ oro ekpemede otuerọn̄ Abasi.—Matthew 11:28-30; 1 Peter 5:2-4.

2. (a) Kaban̄a nso nti n̄kpọ ke Jesus okotoro esop mbon Ephesus? (b) Ewe item eke apostle Paul ke mbiowo Ephesus ẹkenịm nte an̄wan̄ade?

² Jesus onịm ndien uwụtn̄kpọ, ke mîbọhọke iba ke otu ofụri etop esie itiaba oro ke nditọn̄ọ ye ufiop ufiop ikọ itoro. Kaban̄a mbon Ephesus, enye ọnọ etop emi: “Mmọfiọk mme utom fo, ye ọkpọsọn̄ en̄wan, ye ime fo; mmonyụn̄ mfiọk nte ukemeke ndibiom mme idiọkowo, okonyụn̄ odomo mmọemi ẹkotde idem mme apostle, ndien mîdịghe, okonyụn̄ ayarade ọfiọk ete mmọ ẹdi mme osu nsu; omonyụn̄ enyene ime, okonyụn̄ obiom ukụt kaban̄a enyịn̄ Mi, unyụn̄ ukabakede ukpa mba.” (Ediyarade 2:2, 3) Ediwak isua ke mbemiso, apostle Paul ama odụri mbiowo Ephesus utọn̄ aban̄a “mme idiọk unam,” kpa mbon nsọn̄ibuot oro ẹtịmerede otuerọn̄, ama onyụn̄ ọdọhọ mbiowo oro ete “ẹkpeme,” ẹtienede uwụtn̄kpọ imọ oro mîkpaha mba. (Utom 20:29, 31) Sia Jesus otorode mmọ kemi ke ntak ọkpọsọn̄ utom ye ime mmọ ye emi mmọ mîkakpaha mba, anaedi mmọ ẹma ẹsịn item oro ke edinam.

3. (a) Didie ke “mme apostle abian̄a” ẹyom usụn̄ ndibian̄a mme anam-akpanikọ ke eyo nnyịn? (b) Nso item oro aban̄ade mbon nsọn̄ibuot ke Peter ọkọnọ?

³ Ke usen Ọbọn̄, n̄ko, “mme apostle abian̄a” ẹmebiọn̄ọde ẹnyụn̄ “ẹtịn̄ ukwan̄ ikọ, man ẹdụri mbet ẹtiene mmọ.” (2 Corinth 11:13; Utom 20:30; Ediyarade 1:10) Mmọ ẹdọhọ ke kpukpru ntịme ntịme isio n̄ka ido ukpono ẹfọn, ẹte ke Abasi inyeneke esop, ẹnyụn̄ ẹneni ẹte ke Jesus ikọbọhọ ukara Obio Ubọn̄ ke 1914. Prọfesi oro ke 2 Peter 3:3, 4 osu mmọ ke idem: “Ke ukperedem ini mbon nsahi ẹyeda nsahi ẹdi; mmọ ẹyesan̄a ke mme idiọkitọn̄ mmọ, ẹnyụn̄ ẹdọhọ ẹte, Edidi eke Enye ọkọn̄wọn̄ọde ete iyedi enye? Koro tọn̄ọ nte mme ete ẹkede idap, kpukpru n̄kpọ ẹtie kpasụk nte ẹketiede toto ke editọn̄ọ ererimbot.”

4. (a) Didie ke ntan̄idem ye nsọn̄ibuot eke mbon nsahi ẹwụt idem? (b) Mme Christian mfịn ẹwụt ẹte ke mmimọ ibiet mbon Ephesus ke ndinam nso mban̄a mme nsunsu andibiọn̄ọ?

⁴ Mbon nsahi ẹmi ẹsọn̄ ibuot ke ekikere edinọ an̄wan̄wa ikọ ntiense mban̄a mbuọtidem mmọ. (Rome 10:10) Mmọ ẹmenyene ibetedem ẹto mme ọkwọrọ ederi  Christendom ye un̄wam mme n̄wedmbụk n̄kpọntịbe ye mme ufọkutom TV ndida nsuan nsunsu ntọt mban̄a n̄kani nsan̄a mmọ. Mme anam-akpanikọ ẹsisọp ndikụt nte ke ikọ ye edu uwem mbon abian̄a ẹmi idịghe akpanikọ. Ukem nte mbon Ephesus, mme Christian mfịn “[i]kemeke ndibiom mme idiọkowo,” ntre mmọ ẹma ẹsio mbon ẹmi ẹfep ke esop mmọ. a

5. (a) Nso mmemme ke Jesus ọkọdọhọ nte mbon Ephesus ẹnyenede? (b) Mme ikọ ewe ke akpakana mbon Ephesus ẹti?

⁵ Nte ededi, idahaemi, nte enye anamde ye esop ition ke otu itiaba oro, Jesus osio akwa mfịna kiet owụt. Enye ọdọhọ mbon Ephesus ete: “Edi mmenyene se ndade mbiom fi, emi ọkọkpọn̄de akpa ima fo.” (Ediyarade 2:4) Ikpakanaha mmọ ẹkpu ke n̄kan̄ enyeemi, koro Paul ama ọnọnọ n̄wed ẹsọk mmọ ke isua 35 oro ẹkebede, etịn̄de otụk “akwa ima eke Enye [Abasi] akamade nnyịn,” enye n̄ko ama akpak mmọ ete: “Ẹdi mme andikpebe Abasi, nte ndima nditọ; ẹnyụn̄ ẹsan̄a ke ima, kpa nte Christ n̄ko akamade mbufo.” (Ephesus 2:4; 5:1, 2) Akande oro, akpakana mme ikọ Jesus ẹsọn̄ọ ẹsịne mmọ ke esịt tak-tak: “Jehovah Abasi nnyịn, edi Jehovah kiet. Afo nyụn̄ ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo, ye ke ofụri odudu fo.” (Mark 12:29-31) Mbon Ephesus ẹma ẹduọk akpa ima oro.

6. (a) Edide nnyịn idi mbon oro ibịghide m̀mê idi mbufa nsan̄a ke esop, ewe n̄kpọndịk ye mme ntụhọ ke ana nnyịn ikpeme idem? (b) Nso ke ima oro nnyịn inyenede inọ Abasi okponụk nnyịn ndinam?

⁶ Edide nnyịn idi mbon oro ibịghide m̀mê idi mbufa nsan̄a ke esop, ana nnyịn ikpeme man ikûduọk akpa ima oro ikenyenede inọ Jehovah. Didie ke ẹkeme ndiduọk ima emi? Nnyịn imekeme ndiyak ima oro imade utom idịbi udia nnyịn, udọn̄ ndikọ uwak okụk, m̀mê ndisịn idem ke unọ idem inemesịt akabade edi akwa n̄kpọ ke uwem nnyịn. Ntre nnyịn imekeme ndikabade nnyene udọn̄ ke n̄kpọ obụkidem n̄kan n̄kpọ eke spirit. (Rome 8:5-8; 1 Timothy 4:8; 6:9, 10) Ima oro inyenede inọ Jehovah ekpenyene ndinụk nnyịn ndinen̄ede mme utọ udọn̄ ntre nnyụn̄ ‘mbem iso nyom Obio Ubọn̄ Abasi ye edinen ido esie,’ man ‘ikpobon n̄kpọuto inịm inọ idem nnyịn ke heaven.’—Matthew 6:19-21, 31-33.

7. (a) Nso ikponụk nnyịn ke utom oro inamde inọ Jehovah? (b) Nso ke John eketịn̄ aban̄a ima?

⁷ Yak edi ata ntotụn̄ọ ima oro inyenede inọ Jehovah onụk nnyịn kpukpru ini ndinam utom esie. Ẹyak nnyịn inyene ufiop ufiop esịtekọm iban̄a kpukpru se Jehovah ye Christ ẹnamde ẹnọ nnyịn. Nte John ke idemesie ekewetde ke ukperedem ete: “Ima  odu ke orụk usụn̄ emi, itoho ke emi nnyịn ikamade Abasi, edi oto ke emi Abasi akamade nnyịn, onyụn̄ osiode Eyen Esie ọdọn̄, ete, edidi usio-isop mme idiọkn̄kpọ nnyịn.” John akaiso asian nnyịn ete: “Abasi edi ima; ndien owo emi odụn̄de ke ima ododụn̄ ke Abasi, Abasi onyụn̄ ododụn̄ enye ke idem.” Ẹyak nnyịn ikûdedei iyak ima oro inyenede inọ Jehovah ye Ọbọn̄ Jesus Christ, ye odu-uwem Ikọ Abasi akpa! Idịghe ke ifịk ifịk utom oro inamde inọ Abasi kpọt ke nnyịn ikeme ndiwụt ima emi, edi imekeme ndiwụt n̄ko ke ndisụk ibuot nnọ ‘item emi nnyịn ikọbọde ke ubọk Esie, ete, owo emi amade Abasi edima eyenete esie n̄ko.’—1 John 4:10, 16, 21; Mme Hebrew 4:12; se n̄ko 1 Peter 4:8; Colossae 3:10-14; Ephesus 4:15.

“Nam Se Akanamde ke Akpa”

8. Jesus ọkọdọhọ ke mbon Ephesus ẹkpenam n̄kpọ didie?

⁸ Ana mbon Ephesus oro ẹfiak ẹdemede ima oro mmọ ẹkenyenede inikiet ko, edieke mmọ mîyomke nditak. “Mmọdo,” Jesus asian mmọ ete, “ti itie emi ọkọduọde ọkpọn̄, nyụn̄ kabade esịt, nyụn̄ nam se akanamde ke akpa; mîdịghe ntre, mmọn̄ ndi ke ọtọ fo, nyenyụn̄ mmen udiọk-utuenikan̄ mfep ke itie esie, ke afo mûkabakede esịt.” (Ediyarade 2:5) Didie ke mme Christian ke esop Ephesus ẹkebọ ikọ ẹmi? Nnyịn ifiọkke. Nnyịn imodori enyịn ite ke mmọ ẹma ẹkabade esịt ẹnyụn̄ ẹkụt unen ke ndifiak ndemede ima oro mmọ ẹkenyenede ẹnọ Jehovah. Edieke mmọ mîkanamke ntre, adan̄aoro utuenikan̄ mmọ okponịme ẹkpenyụn̄ ẹmen udiọk-utuenikan̄ mmọ ẹfep. Mmọ ẹkpeduọk ifet oro mmọ ẹkenyenede ndinam akpanikọ ayama.

9. (a) Nso ikọ nsịnudọn̄ ke Jesus ekenyene ọnọ mbon Ephesus? (b) Didie ke mme esop ẹkekpu nditiene item oro Jesus ọkọnọde ẹsọk mbon Ephesus ke John ama akakpa?

⁹ Nte ededi, Jesus enyene ikọ nsịnudọn̄ emi ọnọ mbon Ephesus: “Edi emenyene emi, ẹte asasua utom mme Nicolaitan, emi Ami nde nsuade.” (Ediyarade 2:6) Ke nsụhọde n̄kaha, mmọ ẹma ẹsua edisiak isio n̄ka, kpa nte Ọbọn̄ Jesus Christ asuade enye. Nte mme isua ẹkebede, nte ededi, ediwak esop ẹma ẹkpu nditiene mme ikọ Jesus oro. Ima oro mmọ mîkenyeneke inọ Jehovah, inọ akpanikọ, inọ kiet eken ama osụn̄ọ ke mmọ ndifiọrọ ndụk ekịm eke spirit. Mmọ ẹma ẹbahade idemmọ ẹsịn ke ediwak isio n̄ka oro ọyọhọde ye utọk. “Mme Christian” ewetn̄wed oro mîkenyeneke ima inọ Jehovah ẹma ẹkam ẹsio enyịn̄ Abasi ẹfep ke mme uwetn̄kpọ Greek eke Bible. Unana ima n̄ko ama efet ufan̄ ọnọ ukpepn̄kpọ mbon Babylon ye eke mbon Greek, utọ nte hell ikan̄, purgatory, ye Abasi-Ita-ke-Kiet, ke enyịn̄ Ido Ukpono Christ. Sia mîkenyeneke ima inọ Abasi ye akpanikọ, ediwak mbon oro ẹkedọhọde ke idi Christian ẹma ẹtre ndikwọrọ eti mbụk Obio Ubọn̄ Abasi. Mmọ ẹma ẹdidu ke idak ukara otu ibụk ibụk mme ọkwọrọ ederi oro ẹkewụkde obio ubọn̄ mmọ mi ke isọn̄.—Men 1 Corinth 4:8 domo.

10. Idaha ido ukpono ke Christendom eketie didie ke 1918?

¹⁰ Ke ini ikpe ọkọtọn̄ọde ke ufọk Abasi ke 1918, mme ọkwọrọ ederi mbon usiak isio n̄ka eke Christendom ke ẹkenọ Ekọn̄ Ererimbot I an̄wan̄wa ibetedem, ẹkpakde mbon Catholic ye mbon Protestant ke edem mbiba ndiwot kiet eken. (1 Peter 4:17) Utu ke ndinam n̄kpọ nte esop mbon Ephesus oro ẹkesuade se isio n̄ka eke Nicolaitan akanamde, mme enyene-ntuaha ukpepn̄kpọ oro Abasi mîmaha ẹyọyọhọ mme ido ukpono Christendom ke anyanini, ndien mme ọkwọrọ ederi mmọ ẹma ẹmek ndinyene ebuana ye ererimbot, emi Jesus ọkọdọhọde ete ke mme mbet imọ ikpedịghe ubak ererimbot. (John 15:17-19) Mme esop mmọ, ẹmi mîfiọkke iban̄a ibuotikọ Bible, kpa Obio Ubọn̄ Abasi, ikedịghe mme udiọk-utuenikan̄ oro akpanikọ N̄wed Abasi ayamade, mme andibuana ke mmọ ikonyụn̄ idịghe ubak temple Jehovah eke spirit. Mme ọwọrọiso irenowo (ye iban) mmọ ikedịghe mme ntantaọfiọn̄, edi ẹkeyarade mmọ nte ẹdide mbon “ata abiatibet.”—2 Thessalonica 2:3; Malachi 3:1-3.

11. (a) Ewe otu Christian ke n̄kpọntịbe ererimbot ke 1918 ikesịn ikọ oro Jesus ọkọnọde mbon Ephesus ke edinam? (b) Nso ke otu John ẹkenam ọtọn̄ọde ke 1919 akaiso?

¹¹ Nte ededi, otu John, ẹma ẹwọrọ ẹdi ke  ntịme ntịme eyo eke akpa ekọn̄ ererimbot, ye ima ẹnyenede ẹnọ Jehovah ye akpanikọ oro okonụkde mmọ ndinam n̄kpọ esie ye ọkpọsọn̄ ifịk. Mmọ ẹma ẹkpan mbon oro ẹkedomode nditọn̄ọ isio n̄ka ke ndituak ibuot nnọ akpa etieibuot Watch Tower Society, Charles T. Russell, ke enye ama akakpa ke 1916. Ke ẹma ẹkeda ukọbọ ye ukụt ẹnọ mmọ ntụnọ, otu Christian ẹmi ke in̄wan̄în̄wan̄ usụn̄ ẹma ẹbọ ubiereikpe oro Eteufọk mmọ ọkọdọhọde “omotịm anam” ye ikot ndidụk ke idara esie. (Matthew 25:21, 23) Otode ke mme n̄kpọntịbe ererimbot, ye mme ifiọkutom idemmọ, mmọ ẹma ẹfiọk edisu idiọn̄ọ oro Jesus ọkọnọde ndiwụt edidu esie oro enyịn mîkwe ke ukara Obio Ubọn̄. Ọtọn̄ọde ke 1919 akaiso, mmọ ẹma ẹka iso iso ke ndibuana ke n̄kaiso edisu akwa prọfesi Jesus: “Ẹyenyụn̄ ẹkwọrọ gospel Ubọn̄ Abasi emi ke ofụri ekondo nte ntiense ẹnọ kpukpru mme idụt, ndien adan̄aoro ke utịt eyedi.” (Matthew 6:9, 10; 24:3-14) Edieke edide ima oro mmọ ẹkenyenede ẹnọ Jehovah ama osụhọde ke ndusụk usụn̄, ẹma ẹnam enye obụbede asak ọtọn̄ọde ke ini oro kaiso.

12. (a) Ke onịm-mbụk mbono kiet ke 1922, nso ikot ikọwọrọ? (b) Ewe enyịn̄ ke mme Christian akpanikọ ẹkeda ẹnyene ke 1931, ndien mmọ ẹkekabade esịt ẹban̄a nso?

¹² Ke onịm-mbụk mbono kiet, emi owo 18,000 ke otu mme Christian ẹmi ẹkedụkde, ke Cedar Point, Ohio, U.S.A., September 5-13, 1922, ikot oro ama ọwọrọ: “Ẹfiak ke an̄wautom, O mbufo nditọ ata edikon̄ Abasi! . . . Ana ererimbot ọfiọk ete ke Jehovah edi Abasi ye nte ke Jesus Christ edi Edidem ndidem ye Ọbọn̄ mbọn̄. . . . Mmọdo ẹtan̄a, ẹtan̄a, ẹtan̄a, Edidem ye obio ubọn̄ esie.” Ẹma ẹnam ọsọn̄urua enyịn̄ Jehovah ototịm ọwọrọ iso. Ke 1931 mme Christian ẹmi, ẹkesopde idem ke mbono ke Columbus, Ohio, U.S.A., ẹma ẹdara ndinyịme nnyụn̄ nda enyịn̄ oro Abasi owụtde ke prọfesi Isaiah—Mme Ntiense Jehovah. (Isaiah 43:10, 12) Ye nsiondi esie eke March 1, 1939, ẹma ẹkpụhọ enyịn̄ akpan n̄wedmbụk n̄kpọntịbe eke esop emi ẹkot Enyọn̄-Ukpeme Ọnọ Ntọt Obio Ubọn̄ Jehovah, ke ntre ẹnọde Andibot nnyịn ye ubọn̄ ubọn̄ ukara esie akpa ukpono. Mme Ntiense Jehovah, ye obufa ima oro ẹnyenede ẹnọ Jehovah, ẹma ẹkabade esịt ẹkpọn̄ usụn̄ ekededi oro mmọ ẹkekpude ke akpa ndikpono nnyụn̄ mmenede utịbe utịbe enyịn̄ ye Obio Ubọn̄ esie ke enyọn̄.—Psalm 106:6, 47, 48.

“Owo eke Akande”

13. (a) Nso edidiọn̄ ikana ibet mbon Ephesus oro edieke mmọ ‘ẹkande’? (b) Mme Christian oro ke Ephesus ẹkpesan̄a didie ‘ẹkan’?

¹³ Ke akpatre, nte enye anamde n̄ko ke mme etop esie eken, Jesus odụri ntịn̄enyịn owụt spirit Abasi nte adade Jesus anam ẹdiọn̄ọ mme utịp edinam akpanikọ. Enye ọdọhọ mbon Ephesus ete: “Yak owo eke enyenede utọn̄ okop se spirit ọdọhọde mme ufọk Abasi. Owo eke akande, nyenọ enye ndidia mfri eto uwem, emi odude ke Paradise Abasi.” (Ediyarade 2:7) Mbon oro ẹnyenede utọn̄ ukop ikọ ẹyenyene udọn̄ ndikpan̄ utọn̄ nnọ etop oro, ẹfiọkde ẹte ke enye ikotoho Jesus edi okoto Jehovah, Ọbọn̄ Andikara ke idemesie ebe ke edisana spirit, m̀mê anamutom odudu Esie. Mmọ ẹdisan̄a didie ‘ẹkan’? Ke nditiene nde-ikpat Jesus ket-ket, oro okomụmde nsọn̄ọnda akama tutu  osịm n̄kpa, okonyụn̄ ekemede ndidọhọ ete: “Ẹsọn̄ esịt; Ami n̄kakan ererimbot.”—John 8:28; 16:33; se n̄ko 1 John 5:4.

14. “Paradise Abasi” oro Jesus eketịn̄de aban̄a enyene ndida mban̄a nso?

¹⁴ Sia mmọ mînyeneke idotenyịn ndomokiet ndidu uwem ke paradise isọn̄, ẹsan̄a didie ẹnọ mme Christian oro ẹyetde aran, utọ nte mbon Ephesus oro, utịp ndidia mfri “eto uwem, emi odude ke Paradise Abasi”? Emi ikpedịghe Paradise oro ẹfiakde ẹwụk ke isọn̄, sia ẹkedepde mme Christian 144,000 oro ẹyetde aran, ẹsịnede mbon oro ke esop Ephesus, ẹsio ke otu ubonowo ndikara ye Eyenerọn̄, Christ Jesus, ke Obot Zion eke heaven nte nditọ spirit. (Ephesus 1:5-12; Ediyarade 14:1, 4) Ntre, anaedi se ẹtịn̄de ẹtụk mi edi ke obio heaven emi ebietde in̄wan̄-esa, oro mme andikan ẹmi ẹdade ẹnyene. Do, “ke Paradise Abasi,” ih, ke ata iso Jehovah ke idemesie, mme andikan ẹmi, ẹnọde uwem unana n̄kpa ẹyekaiso ẹdu uwem ke nsinsi, nte ẹwụtde mi oto ke mmọ ndidia mfri eto uwem.

15. Ntak emi nsịnudọn̄ oro Jesus ọnọde ete ẹkan edide akpan n̄kpọ oro ebehede akwa otuowo mfịn?

¹⁵ Nso, ndien, kaban̄a mme anam-akpanikọ eke isọn̄ oro ẹn̄wamde owo 144,000 oro ẹyetde aran? Akwa otuowo eke nsan̄a Mme Ntiense ẹmi ke ẹkan n̄ko. Edi idotenyịn mmọ edi ndidu ke paradise isọn̄, ke ebiet emi mmọ ẹdin̄wọn̄de “akpammọn̄ uwem” ẹnyụn̄ ẹkụt ukọkudọn̄ọ ke “ikọn̄ eto oro” ẹtọde ke mben akpa oro. (Ediyarade 7:4, 9, 17; 22:1, 2) Edieke afo edide kiet ke otu emi, afo n̄ko akpakam owụt ufiop ufiop ima fo ọnọ Jehovah onyụn̄ enyene edikan ke mbuọtidem. Ntem afo emekeme ndinyene inemesịt eke nsinsi uwem ke Paradise isọn̄.—Men 1 John 2:13, 14 domo.

[Ikọ idakisọn̄]

[Mme Mbụme Ukpepn̄kpọ]

[Ekebe ke page 36]

Ima Ima Itoro Ẹnọde Jehovah ye Eyen Esie

Ke n̄wedikwọ oro ikọt Jehovah ẹkesiode ke 1905, ikwọ oro ẹkedade ẹtoro Jesus ama awak utịm ikaba akan ikwọ oro ẹkedade ẹtoro Jehovah Abasi. Ke n̄wedikwọ mmọ eke 1928, ibat ikwọ oro ẹkedade ẹtoro Jesus ama ekpere ndidi ukem ye ibat ikwọ oro ẹkedade ẹtoro Jehovah. Edi ke obufa n̄wedikwọ eke 1984, ẹkpono Jehovah ke ikwọ awakde utịm ikanan̄ akan eke Jesus. Emi odu ke n̄kemuyo ye ikọ Jesus oro: “Ete omokpon akan Mi.” (John 14:28) Ima ẹnyenede ẹnọ Jehovah ana okpon akan, adianade ye ntotụn̄ọ ima ẹnyenede ẹnọ Jesus ye esịtekọm kaban̄a ọsọn̄urua uwa esie ye itieutom esie nte Akwa Oku ye Edidem Abasi.

[Chart ke page 34]

Ido Unọ Item Jesus

(mme ibuotn̄wed ye mme ufan̄ikọ oro ẹsiakde ke Ediyarade)

Etop Odudu Ntọn̄ọikọ Ẹnam ẹdiọn̄ọ Edinen̄ede Mme edidiọn̄

ẹnọde unọ itoro mfịna ye/m̀mê oro ẹdide

esop item in̄wan̄în̄wan̄ nsịnudọn̄ ke akpatre

Ephesus 2:1 2:2, 3 2:4 2:5, 6 2:7

Smyrna 2:8 2:9 — 2:10 2:11

Pergamum 2:12 2:13 2:14, 15 2:16 2:17

Thyatira 2:18 2:19 2:20, 21 2:24, 25 2:26-28

Sardis 3:1 — 3:1, 2 3:3, 4 3:5

Philadelphia 3:7 3:8 — 3:8-11 3:12

Laodicea 3:14 — 3:15-17 3:18-20 3:21