Ini ewe ke n̄wan ọkpọbọbọ ọfọn̄ibuot anam n̄kpọ Abasi, ndien ntak-a? Yak ineme se spirit Abasi akanamde apostle Paul ewet aban̄a n̄kpọ emi. Enye ama etịn̄ se idin̄wamde nnyịn ibiere n̄kpọ emi ke usụn̄ oro enemde Abasi esịt. (1 Corinth 11:​3-16) Paul ama asiak n̄kpọ ita oro anade ikere iban̄a: (1) ini oro n̄wan ọkpọbọbọde ọfọn̄ibuot, (2) itie oro enye ọkpọbọbọde ọfọn̄ibuot, ye (3) ntak emi enye ọkpọbọbọde ọfọn̄ibuot.

Ini. Paul ama asiak ini iba: ini n̄wan ọbọn̄de akam ye ini enye etịn̄de prọfesi. (Ufan̄ikọ 4, 5) Ndibọn̄ akam nnọ Jehovah edi usụn̄ kiet emi ituakde ibuot inọ enye. Ke ini ikpepde mme owo Bible mfịn, prọfesi ke itịn̄ oro. Edi ndi Paul ọkọdọhọ ke ana n̄wan ọbọbọ ọfọn̄ibuot ini ekededi oro enye ọbọn̄de akam m̀mê ekpepde owo Bible? Ihih. Itie oro n̄wan ọbọn̄de akam m̀mê ekpepde owo Bible edibiere m̀mê akpana enye ọbọbọ ọfọn̄ibuot.

Itie. Paul ama asiak itie iba​—ke ubon ye ke esop. Enye ọdọhọ ete: “Erenowo onyụn̄ edi ibuot ọnọ n̄wan; . . . n̄wan ekededi eke ọbọn̄de akam m̀mê etịn̄de prọfesi ye ibuot in̄wan̄ esuene enye emi edide ibuot ọnọ enye.” (Ufan̄ikọ 3, 5) Ke ubon, Jehovah emek ebe ete edi ibuot ọnọ n̄wan esie. Edieke n̄wan anamde utom oro Jehovah ọnọde ebe esie, edi iwụtke ke imokpono odudu oro Abasi ọnọde ebe esie, enye esuene ebe esie.  Ke uwụtn̄kpọ, edieke enye ekpepde owo Bible ke ini ebe esie odude, ana enye ọbọbọ ọfọn̄ibuot ndiwụt ke imokpono odudu oro Abasi ọnọde ebe imọ. Ana enye anam emi m̀mê ebe esie ana baptism m̀mê inaha, sia ebe edi ibuot ufọk. * Edieke enye ọbọn̄de akam m̀mê ekpepde owo n̄kpọ ke ini ekpri eyen esie emi ama akana baptism odude, ana enye ọbọbọ ọfọn̄ibuot n̄ko. Idịghe nte ke eyen emi edi ibuot ufọk, edi edi ke ntak odudu oro ẹnọde irenowo oro ẹnade baptism ke esop.

Paul ama etịn̄ aban̄a eke esop ete: “Edieke owo ekededi etiede nte eneneni n̄kpọ emi ke ntak ido en̄wen, nnyịn inyeneke ido en̄wen, mme esop Abasi inyụn̄ inyeneke.” (Ufan̄ikọ 16) Iren oro ẹnade baptism ẹsida usụn̄ ke esop Christian. (1 Timothy 2:​11-14; Mme Hebrew 13:17) Irenowo ikpọn̄ ke ẹmek mbiowo ye mme asan̄autom unamutom, Abasi onyụn̄ emek mmọ ẹse ẹban̄a mme erọn̄ esie. (Utom 20:28) Ndusụk ini, n̄kpọ ekeme ndinam ẹdọhọ eyenete an̄wan anam n̄kpọ oro akpanade erenowo oro odotde emi ama akana baptism anam. Ke uwụtn̄kpọ, ekeme ndiyom enye enịm mbono an̄wautom sia erenowo oro anade baptism, emi onyụn̄ odotde, mîdụhe. Mîdịghe ekeme ndidi enye ekpep owo Bible ke ini erenowo oro anade baptism odude. * Sia n̄kpọ iba oro ẹdide n̄kpọ emi irenowo ẹsinamde ke esop Christian, ana enye ọbọbọ ọfọn̄ibuot man owụt ke imọ inam utom oro irenowo ẹkpenamde.

Edi enyene ediwak n̄kpọ emi asan̄ade n̄kpọ ye ndituak ibuot nnọ Abasi, emi owo mîdọhọke ke ana n̄wan ọbọbọ ọfọn̄ibuot. Ke uwụtn̄kpọ, owo idọhọke ke ana n̄wan ọbọbọ ọfọn̄ibuot ke ini ọbọrọde mbụme ke mbono esop, ke ini asan̄ade ye ebe esie m̀mê erenowo en̄wen oro anade baptism ọkwọrọ ikọ, m̀mê ke ini enye ekpepde nditọ esie oro mînaha baptism n̄kpọ m̀mê ọbọn̄de akam ye mmọ ke itie ebe esie mîdụhe. Edieke eyenete an̄wan osụk enyenede mbụme  en̄wen ke n̄kpọ emi, ndien enye inyụn̄ ifiọkke se akpanamde ke idaha enye oro, enye ekeme ndinam ndụn̄ọde mban̄a oro. * Edieke enye mîsụk ifiọkke se akpanamde, idiọkke enye ndibọbọ ọfọn̄ibuot, nte ẹwụtde ke ndise emi, edieke esịt esie ọdọhọde enye anam ntre.

Ntak. Ẹtịn̄ ntak iba emi eyenete an̄wan ọkpọbọbọde ọfọn̄ibuot ke ufan̄ikọ 10. Itie oro ọdọhọ ke “n̄wan [ekpenyene] idiọn̄ọ nsụkibuot ke ibuot esie ke ntak mme angel.” Akpa ntak edi ke ndibọbọ ọfọn̄ibuot edi “idiọn̄ọ nsụkibuot.” Ndibọbọ ọfọn̄ibuot edi usụn̄ kiet emi n̄wan owụtde ke imokpono odudu oro Jehovah ọnọde irenowo emi ẹnade baptism ke esop. Emi ediwụt ke enye ama Jehovah Abasi onyụn̄ ama ndikop uyo esie. Ikọ oro “ke ntak mme angel,” edi ọyọhọ ntak iba emi akpanade n̄wan ọbọbọ ọfọn̄ibuot. Didie ke n̄wan ndibọbọ ọfọn̄ibuot ebehe mme angel?

Mme angel ẹsima ẹsụk ibuot ẹnọ Jehovah ke heaven ye ke isọn̄. Mmọ ẹsikpep n̄kpọ ẹto nte mme anana-mfọnmma owo ẹsụkde ibuot ẹnọ Abasi, sia mmọ n̄ko ẹnyene ndisụk ibuot nnọ ndutịm oro Jehovah anamde. Ndusụk mme angel ikenyịmeke ndika iso nnam emi. (Jude 6) Mme angel ẹkeme ndikụt nte eyenete an̄wan emi ọfiọkde n̄kpọ, onyụn̄ enyenede ọniọn̄ ye ikike akan erenowo oro ama akana baptism, akade iso osụk ibuot ọnọ erenowo oro. Ndusụk ini, n̄wan emi esidi owo emi ẹyetde aran, emi editienede Christ ikara ke heaven inyụn̄ ikpon itie ikan mme angel. Ata eti uwụtn̄kpọ ke mme angel ẹsikụt iban ẹnịmde emi! Kpukpru nditọete iban ẹnyene akwa ifet ndiwụt adan̄a nte mmimọ isụkde ibuot inọ Abasi ke ndinam akpanikọ nnyụn̄ nsụhọde idem ke iso ediwak miliọn nti angel!