SESE mme frawa ye ndatndat ‘almond’ ẹkọride ke esan̄, mme eto emi. Emi edi esan̄ Aaron. Mme frawa emi ye ndatndat mfri ẹkekọri ke esan̄ Aaron ke okoneyo kiet kpọt. Yak ise ntak.

Nditọ Israel ke ẹyo ke wilderness ke ndusụk ini idahaemi. Ndusụk mmọ ikereke ite Moses ekpedi adausụn̄, mme nte ke Aaron ekpedi akwa oku. Koʹrah edi kiet oro ekerede ntre, ukem oro ye Daʹthan, A·biʹram ye mme etubom 250 eken. Kpukpru mmọ emi ẹdi ẹdidọhọ Moses: ‘Ntak emi afo onịmde idem fo okon̄ akan nnyịn?’

Moses ọdọhọ Koʹrah ye mme anditiene enye: ‘N̄kpọn̄ usenubọk da n̄kpọ ukama ikan̄ dọn̄ incense ke esịt! Ndien di ke ataya Jehovah. Nnyịn iyekụt mmọ oro Jehovah edimekde.’

Ke ndan̄nsiere, Koʹrah ye mme anditiene enye 250 ẹdi ke ataya. Ediwak mmọ eken ẹdi man ẹda ye mmọ. Jehovah ayat esịt etieti. Moses ete, ‘Ẹwọrọ ke ataya mme idiọk owo emi.’ ‘Ẹkutụk n̄kpọ ndomokiet enyenede mmọ.’ Mme owo ẹkop uyo, ẹnyụn̄ ẹwọrọ ke ataya Koʹrah, Daʹthan ye A·biʹram.

Ndien Moses ete: ‘Ye emi, mbufo ẹyediọn̄ọ mmọ oro Jehovah emekde. Isọn̄ eyeberede onyụn̄ emen mme idiọk owo emi.’

Ke ndo ndo oro Moses etrede ikọ esie, isọn̄ eberede. Ataya Koʹrah ye mme n̄kpoduoho esie ye Daʹthan ye A·biʹram ye mme nsan̄a mmọ ẹsụhọde ke esịt, ndien isọn̄ eberi ababa mmọ. Ke mme owo ẹkopde mfiori mmọ oro ẹduọde ẹdụk isọn̄, mmọ ẹfiori: ‘Ẹfehe! Isọn̄ ekeme ndimen nnyịn n̄ko!’

Koʹrah ye nsan̄a esie 250 ke ẹsụk ẹdu ẹkpere ataya. Ntre Jehovah ọdọn̄ ikan̄ edi, ndien kpukpru mmọ ẹtak. Ndien Jehovah ọdọhọ E·le·aʹzar eyen Aaron ada n̄kpọ ukama ikan̄ mmọ oro ẹkpade onyụn̄ anam mbat mbat ufụkn̄kpọ ọnọ itie uwa. Ufụkn̄kpọ itie uwa emi eyedi n̄kpọ ntọt ọnọ nditọ Israel nte baba owo efen ke ebede Aaron ye nditọ esie inyeneke ndinam n̄kpọ nte mme oku nnọ Jehovah.

Edi Jehovah oyom ndinam otịm an̄wan̄a nte edi Aaron ye nditọ esie ke imọ imek nte mme oku. Ntre enye ọdọhọ Moses: ‘Nam adausụn̄ esien Israel kiet kiet ada esan̄ esie edi. Nam Aaron ada esan̄ esie edi ke ibuot esien Levi. Ndien nịm esan̄ emi kiet kiet ke ataya ke iso ekebe ediomi. Esan̄ owo oro mmekde nte oku eyekọri frawa.’

Ke mi Moses esede ke ndan̄ nsiere, sese, esan̄ Aaron enyene mme frawa emi ye ndatndat almond ọkọride oto enye! Nte omokụt ndien ntak Jehovah akanamde esan̄ Aaron ọkọri mme frawa?