MBON ẹmi ẹdu ke afanikọn̄. Ana mmọ ẹnyọn̄, midịghe ẹyewot mmọ. Mmọ ẹdi mbon uyep Israel, ndien n̄wan oro an̄wamde mmọ edi Raʹhab. Raʹhab odụn̄ mi ke ufọk ke ibibene obio Jerʹi·cho. Yak ifiọk ntak mbon ẹmi ẹdude ke afanikọn̄.

Nditọ Israel ẹben̄e idem ndibe Akpa Jordan ndụk ke isọn̄ Caʹnaan. Edi mbemiso mmọ ẹdụkde, Joshua ọdọn̄ mbon uyep iba. Enye asian mmọ: ‘Ẹka ẹkese isọn̄ ye obio Jerʹi·cho.’

Ke ini mbon uyep ẹdụkde Jerʹi·cho, mmọ ẹka ufọk Raʹhab. Edi owo asian edidem Jerʹi·cho ete: ‘Nditọ Israel iba ẹdụk ẹdi okoneyo mfịn ndiyep isọn̄.’ Ke okopde emi, edidem ọdọn̄ mme owo ẹbịne Raʹhab, ndien mmọ ẹwụk enye ẹte: ‘Sio mme owo oro afo esịnde ke ufọk di!’ Edi Raʹhab ama odịp mbon uyep ke enyọn̄ ọkọm esie. Ntre enye ete: ‘Mme owo ẹma ẹdi ufọk mi, edi n̄kọfiọkke ebiet mmọ ẹtode. Mmọ ẹma ẹnyọn̄ ke n̄kụteyo, mbemiso ẹkeberi inua otop obio. Ke mbufo ẹsọpde, mbufo ẹmekeme ndisịm mmọ!’ Ntre mme owo oro ẹka ẹbịne mmọ.

Ke mmọ ẹma ẹkedaha, Raʹhab ọsọp aka ọkọm. Enye ọdọhọ mbon uyep, ‘Mmọfiọk Jehovah eyenọ mbufo isọn̄ emi.’ ‘Nnyịn imokop nte enye akanamde Ididuot Inyan̄ asat ke mbufo ẹkpọn̄de Egypt, ye nte mbufo ẹkewotde ndidem Siʹhon ye Og. Ami mmọfọn mfọn ye mbufo, ntre ẹn̄wọn̄ọ ẹnọ mi mbọk, nte mbufo ẹyefọn mfọn ye ami. Ẹnyan̄a ete mi ye eka mi, ye nditọ eka mi iren ye iban.’

Mbon uyep ẹn̄wọn̄ọ ẹte iyenam, edi ana Raʹhab anam n̄kpọ. Mbon uyep ẹte ‘Da ididuot urụk emi tebe ke window fo, nnyụn̄ tan̄ kpukpru iman fo sịn ke ufọk ye afo. Ndien ke nnyịn kpukpru ifiakde idi ndida Jerʹi·cho, nnyịn iyekụt urụk emi ke window fo ndien idiwotke baba owo ke ufọk fo.’ Ke mbon uyep ẹfiakde ẹtiene Joshua, mmọ ẹsian enye kpukpru se ikotịbede.