KE DAVID ọtọn̄ode ndikara ke Jerusalem, Jehovah ọnọ udịm ekọn̄ esie uwak edikan mme asua mmọ. Jehovah ama ọn̄wọn̄ọ ndinọ nditọ Israel isọn̄ Caʹnaan. Ndien ke emi, ye un̄wam Jehovah, ofụri isọn̄ oro ẹken̄wọn̄ọde ẹnọ akabade eke mmọ ndien.

David edi eti andikara. Enye ama Jehovah. Ntre kiet ke otu akpa n̄kpọ enye anamde ke ama akada Jerusalem edi ndida ekebe ediomi Jehovah ndi do. Ndien enye oyom ndibọp temple ndisịn enye.

Ke David ọsọn̄de akan, enye anam idiọk ndudue. David ọfiọk ke akwan̄a ndida n̄kpọ owo efen. Edi mbubreyo kiet, ke enye odude ke ọkọm ufọk ubọn̄ esie, enye ese isọn̄ okụt ata ediye an̄wan. Enyịn̄ esie edi Bath-sheʹba, ndien ebe esie edi owo ekọn̄ kiet ẹkotde U·riʹah.

David otịm oyom Bath-sheʹba tutu anam ẹda enye ẹdi ufọk ubọn̄ esie. Ebe esie adaha ndin̄wana ekọn̄. Ọfọn, David anam ima ye enye ndien ekem enye okụt ete enye oyomo. Otịm afịna David tutu enye ọdọn̄ etop ọnọ Joʹab etubom ẹkọn̄ ndinam ẹnịm U·riʹah ke iso ekọn̄ emi ediwotde enye. Ke U·riʹah akpade, David ọdọ Bath-sheʹba.

Jehovah otịm ayat esịt ye David. Ntre enye ọdọn̄ Nathan asan̄autom esie asian enye aban̄a mme idiọkn̄kpọ esie. Afo emekeme ndikụt Nathan do etịn̄de ikọ ọnọ David. David otịm ọfụhọ aban̄a se akanamde, ntre Jehovah iwotke enye. Edi Jehovah ete: ‘Koro afo akanamde mme idiọkn̄kpọ emi, afo eyenyene uwak afanikọn̄ ke ufọk fo.’ Ndien nso afanikọn̄ ke David enyene ntem!

Ke mbemiso, eyen Bath-sheʹba akpa. Ekem, akpan David, Amʹnon ada eyenete esie Taʹmar okodu ikpọn̄ ndien anam ima ye enye ke ufịk. Abʹsa·lom eyen David otịm ayat esịt ke emi tutu enye owot Amʹnon. Ekem, Abʹsa·lom ọbọ uma ediwak owo, ndien anam idemesie edidem. Ke akpatre, David akan ke ekọn̄ ye Abʹsa·lom, emi ẹwotde. Ih, David enyene ekese afanikọn̄.

Ke ufọt kpukpru n̄kpọ ntịbe emi, Bath-sheʹba aman eyeneren ẹkotde Solomon. Ke David ọsọn̄de onyụn̄ ọdọn̄ọde, eyeneren esie Ad·o·niʹjah odomo ndinam idemesie edidem. Ke oro, David anam oku ẹkotde Zadok ọtọhọ Solomon aran ke ibuot ndiwụt nte Solomon edidi edidem. Ibịghike, David akpa ke osimde isua 70. Enye akakara ke isua 40, edi ke emi, Solomon edi edidem Israel.