SESE owo oro ke esịt mmọn̄. Enye odu ke akwa mfịna, nte idụhe? Iyak oro ọmọn̄ emen enye! Nte ọmọfiọk owo oro enye edide? Enye ekere Joʹnah. Yak ise nte enye akasan̄ade odụk akwa mfịna ntre.

Joʹnah edi prọfet Jehovah. Ibịghike nte E·liʹsha akakpa, Jehovah ọdọhọ Joʹnah ete: ‘Ka akwa obio Ninʹe·veh. Idiọkn̄kpọ mbon oro ẹdude do okpon etieti, ndien nyom afo etịn̄ ọnọ mmọ aban̄a enye.’

Edi Joʹnah iyomke ndika. Ntre enye odụk ubom oro akade ebiet efen ọkpọn̄ Ninʹe·veh. Jehovah inemke esịt ye Joʹnah ke ndifehe. Do Enye anam akwa oyobio otịbe. Enye ọdiọk tutu ubom oyom ndisịp. Mme awat ubom ẹkop ndịk etieti, do mmọ ẹseme ẹkot mme abasi mmọ ndin̄wam.

Ke akpatre Joʹnah ọdọhọ mmọ ete: ‘Ami n̄kpono Jehovah Abasi emi akanamde enyọn̄ ye isọn̄. Ndien mfehe n̄kpọn̄ ndinam se Jehovah ọkọdọhọde mi nnam.’ Do mme awat ubom ẹbụp ẹte: ‘Nnyịn inam fi nso man oyobio emi etre?’

Joʹnah ọdọhọ ete, ‘Ẹduọk mi ke inyan̄, ndien inyan̄ eyefiak ana sụn̄.’ Mme awat ubom iyomke ndinam oro, edi nte oyobio osụk ọdiọkde akan, mmọ ndien ẹsio Joʹnah ke ubom ẹduọk. Idahaoro oyobio odop, ndien inyan̄ afiak ana sụn̄.

Nte Joʹnah eden̄ide ke mmọn̄, akamba iyak emen enye emen. Edi enye ikpaha. Enye odu ke idịbi iyak oro okoneyo ita ye uwemeyo ita. Joʹnah eseme etieti ke nditre ndikop uyo Jehovah nnyụn̄ n̄ka Ninʹe·veh. Ntre nte ọmọfiọk se enye anamde?

Joʹnah ọbọn̄ akam ọnọ Jehovah oyom un̄wam. Ekem Jehovah anam iyak oro ọkọkpọhi enye onịm ke obot. Ke oro ebede Joʹnah aka Ninʹe·veh. Nte emi ikpepke nnyịn nte edide akpan n̄kpọ ndinam sededi oro Jehovah ọdọhọde?