EYENAN̄WAN oro afo okụtde mi edi isua 12. Jesus ke omụm ubọk esie, eka ye ete esie ẹda ẹkpere. Nte afo ọmọfiọk ntak mmọ ẹnemde esịt ntre? Yak nnyịn ifiọk.

Ete eyenan̄wan oro edi akpan owo ẹkotde Jaʹi·rus. Usen kiet, eyenan̄wan esie ọdọn̄ọ ndien ẹnịm enye ke bed. Edi idem osụk ọdiọk enye. Enye akam ọdọdọn̄ọ akan. Esịt otịmede Jaʹi·rus ye n̄wan esie etieti, koro etie nte ekpri eyenan̄wan mmọ ọmọn̄ akpa. Enye edi n̄kukụre eyenan̄wan mmọ. Ntre Jaʹi·rus aka ndiyom Jesus. Enye ama okop mme utịbe n̄kpọ oro Jesus anamde.

Ke Jaʹi·rus okụtde Jesus, akwa otu owo ẹkan enye ẹkụk. Edi Jaʹi·rus ebe ke ufọt otu owo onyụn̄ ọduọ Jesus ke ukot. Enye ọdọhọ, ‘Eyenan̄wan mi ọdọn̄ọ ata etieti.’ Enye eben̄e, ete, ‘Mbọk di dinam idem ọsọn̄ enye.’ Jesus ete imọ iyedi.

Nte mmọ ẹkade, otu owo ẹkaiso ẹberi kiet eken man ẹsan̄a ẹkpere. Inikiet, Jesus atuak ada, obụp ete, ‘Anie okotụk mi?’ Jesus okop nte odudu ọwọrọde enye ke idem, ntre enye ọfiọk ete owo ama otụk imọ. Edi anie owo? Edi n̄wan kiet oro ọkọdọn̄ọde etieti ke n̄kpo nte isua 12. Enye ama editụk ọfọn̄ Jesus, ndien okop nsọn̄idem!

Emi anam Jaʹi·rus ọsọn̄ idem akan, koro enye okụt nte ememde ọnọ Jesus ndikọk udọn̄ọ. Edi idahaoro isụn̄utom edi. Enye ọdọhọ Jaʹi·rus, ‘Kufịna Jesus aba. Eyenan̄wan fo akpa.’ Jesus okop emi ndien ọdọhọ Jaʹi·rus: ‘Kukere, enye eyekop nsọn̄idem.’

Ke mmọ ẹsịmde ufọk Jaʹi·rus ke akpatre, mme owo ke ẹtua ye akwa mfụhọ. Edi Jesus ete: ‘Ẹkutua. Eyen oro ikpahakpa. Enye akam edede.’ Edi mmọ ẹsak Jesus nsahi, koro mmọ ẹfiọkde ke enye akpa.

Jesus ndien ada ete ye eka eyen oro ye mme apostle esie ita odụk ubet oro eyen emi anade. Enye omụm ubọk esie onyụn̄ ọdọhọ: ‘Daha ke enyọn̄!’ Ndien enye eset kpa nte afo okụtde mi. Ndien enye adaha ke enyọn̄ asan̄a akanade! Oro esịn eka ye ete esie ẹkopde inemesịt ata etieti.

Emi idịghe akpa owo oro Jesus akanamde eset ke n̄kpa. Akpa owo oro Bible etịn̄de aban̄a edi eyeneren ebeakpa ke obio Naʹin. Ekem, Jesus n̄ko anam Lazarus, eyeneka Mary ye Martha eset. Ke Jesus akarade nte edidem Abasi, enye eyenam ata ediwak mme akpa n̄kpa ẹset. Nte nnyịn ikpenemke esịt iban̄a oro?