USEN kiet, Jesus ọdọhọ owo kiet ete enye ekpenyene ndima mbọhọidụn̄ esie. Owo oro obụp Jesus: ‘Anie edi mbọhọidụn̄ mi?’ Ọfọn, Jesus ọfiọk se owo emi ekerede. Owo oro ekere ete kpasụk mbon orụk esie ye ido ukpono edi mme mbọhọidụn̄ esie. Ntre yak ise se Jesus ọdọhọde enye.

Ndusụk ini Jesus ọnọ ukpep ke ndinọ mbụk. Ntem ke enye anam ke emi. Enye ọnọ mbụk aban̄a owo Jew ye owo Sa·marʹi·a. Nnyịn ima ikpekpep ite ke ekese mme Jew imaha mbon Sa·marʹi·a. Ọfọn, mbụk Jesus edi emi:

Usen kiet owo Jew kiet ama odu ọsụhọrede ke usụn̄ obot aka Jerʹi·cho. Edi mbon n̄wo ẹwọrọ ẹmụm enye. Mmọ ẹbọ okụk esie ẹnyụn̄ ẹmia enye tutu ekpere n̄kpa.

Ekem, oku Jew edi ke usụn̄ oro. Enye ama okụt owo oro ẹkemiade. Afo ekere ete enye akanam nso? Kam se, enye osịbe usụn̄ ebe n̄kan̄ eken ọnyọn̄ esie. Ekem, ata owo ido ukpono efen edi. Enye ekedi Levite. Nte enye ama ebet? Baba, enye ikebetke ndin̄wam owo emi ekemiade n̄ko. Afo emekeme ndikụt oku oro ye Levite ke anyan usụn̄ ko.

Edi se owo oro odude mi ye owo ekemiade. Enye edi owo Sa·marʹi·a. Ndien enye ke an̄wam owo Jew oro. Enye ke odori ibọk ke mme unan esie. Ekem, Enye emen owo Jew aka ebiet enye ekemede ndiduọk odudu nnyụn̄ n̄kop nsọn̄idem.

Ke ama okokụre mbụk emi, Jesus ọdọhọ owo oro okobụpde enye mbụme ete: ‘Ewe ke otu mbita emi ke afo ekere nte akanamde nte mbọhọidụn̄ owo oro ẹkemiade? Ndi oku, Levite, mme owo Sa·marʹi·a?’

Owo oro ọbọrọ: ‘Owo Sa·marʹi·a. Enye ama ọfọn ido ye owo oro ẹkemiade.’

Jesus ete: ‘Afo emenen. Ntre ka kanam nte enye akanamde ye mbon efen.’

Nte afo umaha usụn̄ nte Jesus ọnọde ukpep? Nnyịn imekeme ndikpep ata ediwak akpan n̄kpọ ke nnyịn ikpan̄de utọn̄ inọ se Jesus ọdọhọde ke Bible, nte nnyịn ikemeke?