JESUS edi emi ke Obot Olive. Irenowo inan̄ oro ye enye ẹdi mme apostle esie. Mmọ ẹdi nditọ eka oro, Andrew ye Peter, n̄ko James ye John, nditọ eka. Oro edi temple Abasi ke Jerusalem oro afo ekemede ndikụt ko anyan usụn̄.

Osịm usen iba tọn̄ọ nte Jesus akawat ke ass odụk Jerusalem. Edi Tuesday. Ke abakde akan ke usen oro, Jesus ama odu ke temple. Do mme oku ẹma ẹdomo ndimụm Jesus n̄wot. Edi ndịk ama anam mmọ ndinam emi koro mme owo ẹmade Jesus.

Jesus ama okot mme adaiso ido ukpono oro ‘Mbufo mme urụkikọt ye nditọ urụkikọt.’ Ndien Jesus ama ọdọhọ ete Abasi eyemia mmọ ufen ke ntak kpukpru mme idiọkn̄kpọ oro mmọ ẹkenamde. Ke oro ebede, Jesus ọdọk edi ke Obot Olive, ndien mme apostle inan̄ emi ẹtọn̄ọ ndibụp enye mme mbụme. Nte ọmọfiọk se mmọ ẹbụpde Jesus?

Mme apostle ẹbụp ẹban̄a mme n̄kpọ ini iso. Mmọ ẹfiọk ke Jesus eyetre ofụri idiọkn̄kpọ ke isọn̄. Edi mmọ ẹyom ndifiọk ini emi editịbede. Ini ewe ke Jesus edifiak edi edikara nte edidem?

Jesus ọdiọn̄ọ ete ke mme anditiene enye ke isọn̄ idikemeke ndikụt enye ke ini enye afiakde edi. Emi edi koro enye edidu ke heaven, ndien mmọ idikemeke ndikụt enye do. Ntre Jesus asian mme apostle esie ndusụk n̄kpọ oro editịbede mi ke isọn̄ ke ini enye akarade nte Edidem ke heaven. Nso idi usụk mme n̄kpọ ẹmi?

Jesus ete ke ikpọ ekọn̄ ẹyedu, ediwak owo ẹyẹdọn̄ọ ẹnyụn̄ ẹkpa biọn̄, ubiatibet eyetịm ọdiọk, ndien ikpọ unyekisọn̄ ẹyedu. Jesus ọdọhọ n̄ko ete ke ẹyẹkwọrọ mbụk aban̄ade obio ubọn̄ Abasi ke kpukpru ebiet ke isọn̄. Nte nnyịn imokụt mme n̄kpọ emi ẹtịbede ke eyo nnyịn? Ih! Ntre nnyịn imekeme nditịm nnịm nte ke Jesus ke akara ke heaven. Ibịghike enye eyetre ofụri idiọk ido ke isọn̄.