UKPEPN̄KPỌ 06
Uwem Ọkọtọn̄ọ Didie?
Abasi edi “ntọn̄ọ uwem.” (Psalm 36:9) Ndi emenịm ikọ oro? Ndusụk owo ẹdọhọ ke uwem ọkọtọn̄ọ ke idemesie. Ikọ mmọ ọwọrọ ke owo ikobotke-bot mme n̄kpọ. Edi edieke edide Abasi okobot mme n̄kpọ, ọwọrọ enyene ntak emi enye okobotde mmọ. a Se ke idemfo se Bible etịn̄de aban̄a nte uwem ọkọtọn̄ọde, ye ntak emi se Bible etịn̄de esịnede ifiọk.
1. Enyọn̄ ye isọn̄ akasan̄a didie edidu?
Bible ọdọhọ ete: “Ke editọn̄ọ, Abasi okobot enyọn̄ ye isọn̄.” (Genesis 1:1) Ediwak ntaifiọk (scientist) ẹdọhọ ke enyọn̄ ye isọn̄ ẹnyene ntọn̄ọ. Abasi akanam didie obot mmọ? Enye akada edisana spirit esie—odudu esie emi enye esidade anam n̄kpọ kpukpru ini—obot kpukpru n̄kpọ, esịnede kpukpru ntantaọfiọn̄ ye ererimbot.—Genesis 1:2.
2. Nso ikanam Abasi obot isọn̄ emi?
Jehovah ‘ikobotke isọn̄ ke ikpîkpu, okobot enye man ẹdụn̄ ke esịt.’ (Isaiah 45:18) Enye okobot isọn̄ man mme owo ẹdụn̄ ke nsinsi ẹnyụn̄ ẹkop inemesịt. (Kot Isaiah 40:28; 42:5.) Ntaifiọk ẹdọhọ ke ererimbot emi edi ata san̄asan̄a itie, ke idụhe ebiet en̄wen emi ọfọnde ye owo nte isọn̄ emi.
3. Nso inam owo okpụhọde ye unam?
Abasi okobot mme odu-uwem n̄kpọ ke ama okobot isọn̄ ama. Abasi ekebem iso obot mbiet, eto, ye unam. Ndien ekem, “Abasi obot owo ke mbiet esie.” (Kot Genesis 1:27.) Nso inam owo okpụhọde ye kpukpru se idude ke isọn̄? Abasi okobot nnyịn ke mbiet esie; nnyịn imekeme ndima mme owo nnyụn̄ nnam se inende nte enye. Enye ama obot nnyịn man ikeme ndikpep nsio nsio usem, inyụn̄ ima ndiye n̄kpọ ye ndinem ikwọ. N̄kpọ en̄wen oro anamde ikpụhọde ye unam edi ke imekeme ndima Abasi nnyụn̄ nnam n̄kpọ esie.
SỊN IDEM KPEP
Se se iwụtde ke ẹkebobot mme n̄kpọ, ye ntak emi se Bible etịn̄de aban̄a nte ẹkebotde mme n̄kpọ esịnede ifiọk. Ikụreke ke oro, oyokụt ke nnyịn ndikeme ndima mme owo nnyụn̄ ntua mmọ mbọm ekpep nnyịn akpan n̄kpọ aban̄a Abasi.
4. Ẹkebobot kpukpru n̄kpọ
Mme owo ẹsise mme odu-uwem n̄kpọ ke ererimbot emi ẹda ẹbot nsio nsio n̄kpọ ẹnyụn̄ ẹbọ ubọn̄. Edi anie ikpọbọ ubọn̄ mme n̄kpọ oro mmọ ẹsisede do? Se VIDIO emi, ekem ẹbọrọ mbụme emi ẹnyụn̄ ẹneme ẹban̄a enye.
-
Nso ke mme owo ẹsise ẹda ẹbot nsio nsio n̄kpọ?
Imọdiọn̄ọ ke kpukpru ufọk enyene andibọp. Nso kaban̄a kpukpru se iyọhọde ererimbot emi? Kot Mme Hebrew 3:4, ekem ẹbọrọ mbụme emi ẹnyụn̄ ẹneme ẹban̄a mmọ:
-
Nso ye nso ke afo esinen̄ede ama ke otu mme n̄kpọ oro ọyọhọde isọn̄ emi?
-
Ndi owụt ifiọk ndinịm ke se ikụtde ke enyọn̄ ye ke isọn̄ ẹnyene andibot? Nso inam ọdọhọ ntre?
Ndi ọmọdiọn̄ọ?
Akpaka jw.org okokụbọde “Ndi Ekebobot?” ye “Se Nsio Nsio Ntaifiọk Ẹtịn̄de Ẹban̄a Nte Uwem Ọkọtọn̄ọde,” oyokụt ediwak n̄kpọ ye vidio aban̄a se inemede emi.
“Kpukpru ufọk ẹnyene andibọp, edi enye emi ọkọbọpde kpukpru n̄kpọ edi Abasi”
5. Se Bible etịn̄de aban̄a nte ẹkebotde n̄kpọ esịne ifiọk
Okpokot Genesis ibuot 1, Bible etịn̄ nte isọn̄ emi akasan̄ade edidu ye nte uwem ọkọtọn̄ọde. Ndi se Bible etịn̄de do edi akpanikọ? Se VIDIO emi, ekem ẹbọrọ mbụme emi ẹnyụn̄ ẹneme ẹban̄a mmọ.
-
Ndi se Bible etịn̄de ọwọrọ ke ẹkebot isọn̄ ye ofụri se idude ke esịt ke usen 6, emi usen kiet kiet edide hour 24 kpọt?
-
Ndi emekere ke se Bible etịn̄de aban̄a nte ẹkebotde n̄kpọ edi akpanikọ, onyụn̄ owụt ifiọk? Nso inam ọdọhọ ntre?
Kot Genesis 1:1, ekem ẹbọrọ mbụme emi ẹnyụn̄ ẹneme ẹban̄a enye:
-
Ntaifiọk ẹdọhọ ke enyọn̄ ye isọn̄ ẹnyene ntọn̄ọ. Ndi se mmọ ẹtịn̄de oro asan̄a ye se osụk okotde oro ke Bible?
Ndusụk owo ẹsidọhọ ke Abasi akanam n̄kpọ kiet oforo n̄kpọ en̄wen tutu kpukpru n̄kpọ ẹdidu. Kot Genesis 1:21, 25, 27, ekem ẹbọrọ mbụme emi ẹnyụn̄ ẹneme ẹban̄a mmọ:
-
Ndi Bible ọdọhọ ke Abasi okobot odu-uwem-n̄kpọ kiet, ekem anam enye oforo iyak, oforo unam, tutu ediforo owo? Mîdịghe ndi Abasi okobobot kpukpru mmọ ke “orụk” mmọ? b
6. Owo okpụhọde ye kpukpru se idude ke isọn̄
Jehovah ikobotke owo nte okobotde unam. Kot Genesis 1:26, ekem ẹbọrọ mbụme emi ẹnyụn̄ ẹneme ẹban̄a enye:
-
Sia ẹkebotde nnyịn ke mbiet Abasi, nnyịn ndikeme ndima mme owo nnyụn ntua owo mbọm owụt ke Jehovah edi nso utọ Abasi?
NDUSỤK OWO ẸSIDỌHỌ ẸTE: “Se Bible etịn̄de aban̄a nte ẹkebotde n̄kpọ idịghe akpanikọ.”
-
Afo ekere didie? Nso inam ọdọhọ ntre?
SE IKPEPDE
Jehovah okobot enyọn̄ ye isọn̄ ye mme odu-uwem n̄kpọ.
Se M̀mê Emeti
-
Bible ọdọhọ ke enyọn̄ ye isọn̄ akasan̄a didie edidu?
-
Ndi Abasi akanam n̄kpọ kiet oforo nsio nsio n̄kpọ, mîdịghe ndi enye okobobot mmọ?
-
Nso inam owo okpụhọde ye unam?
KPEP N̄KPỌ EN̄WEN
Se nte mme n̄kpọ emi ikụtde ke ekondo owụtde ke Andibot odu.
Se nte ete anamde se Bible etịn̄de aban̄a nte ẹkebotde n̄kpọ an̄wan̄a eyen esie.
Bible ete ẹkebobot n̄kpọ, ndusụk owo ẹte n̄kpọ okofoforo, ewe inen?
Dụn̄ọde se m̀mê ọkpọ nsio nsio unam emi ẹkedude ke ata eset owụt ke ẹkebobot n̄kpọ m̀mê ke n̄kpọ okofoforo.
Mbụme Ition Oro Ẹkpebụpde Ẹban̄a Nte Uwem Ọkọtọn̄ọde (ekpri n̄wed)
a Ukpepn̄kpọ 25 etịn̄ ntak emi Jehovah Abasi okobotde owo.
b Ikọ Bible oro, “orụk” owụt ke idịghe utọ kiet, ke awak utọ.
Ekeme Ndidi Ayama Mmọ Emi N̄ko
MBỤME EMI ẸSIWAKDE NDIBỤP
Didie ke Mme Ntiense Jehovah Ẹsikpep Mme Owo Bible?
Emekeme ndikama Bible ekededi ke ini ekpepde n̄kpọ ye Mme Ntiense Jehovah. Akpama, emekeme ndikot ofụri mbon ubon fo, m̀mê ufan fo ekededi editiene ekpep.
