AKPATRE n̄wed Bible oro ẹkotde Ediyarade ọnọ ofụri ubonowo idotenyịn. Apostle John ekewet n̄wed emi, ndien enye ọdọn̄ọ mme n̄kukụt oro ẹdisịmde utịt ke ini emi Jehovah edisude uduak esie.

Ke akpa n̄kukụt, Jesus oro ẹkenamde eset otoro onyụn̄ enen̄ede ndusụk esop. Ọyọhọ n̄kukụt iba anam ifiọk nte ebekpo Abasi eke heaven etiede, emi mme edibotn̄kpọ eke spirit ẹdade ẹtoro enye.

Nte uduak Abasi akade iso ndisu, Eyenerọn̄, Jesus Christ, ọbọ ikpan̄wed emi enyenede ufịkn̄kpọ itiaba. Ke ini enye adian̄arede inan̄ ke otu ufịkn̄kpọ emi, mme awat enan̄ mbakara ẹwọrọ ẹdi. Akpa edi Jesus emi awatde afia enan̄ mbakara onyụn̄ ayara anyanya nte Edidem. Ekem mme andiwat nsio nsio uduot enan̄ mbakara eken emi ẹdade ẹban̄a ekọn̄, akan̄, idiọk udọn̄ọ ẹtiene, ndien kpukpru emi ẹtịbe ke mme akpatre usen editịm n̄kpọ emi. Ke ini ẹdian̄arede ọyọhọ ufịkn̄kpọ itiaba, ẹfụri ukotowo itiaba emi ẹdade ẹban̄a editan̄a ubiereikpe Abasi. Emi osụn̄ọ ke ndamban̄a ufen itiaba, m̀mê iyatesịt Abasi.

Obio Ubọn̄ Abasi, emi John okụtde nte nsekeyen erenowo emi amanade, ọtọn̄ọ ndikara ke heaven. Ekọn̄ asiaha, ẹnyụn̄ ẹsion̄o Satan ye mme demon esie ẹduọn̄ọ ke isọn̄. Ẹkop ọkpọsọn̄ uyo ofioride ete: “Mbọm isọn̄”! Devil asan̄a ye akwa ifụtesịt, sia ọdiọn̄ọde ete ke ini imọ edi ibio.—Ediyarade 12:12.

John okụt eyenerọn̄, oro edi Jesus, nte adade ye owo 144,000 emi ẹmekde ke otu ubonowo. Mmọ emi ẹyetiene Jesus ‘ẹkara nte ndidem.’ Ntem, n̄wed Ediyarade owụt nte ke mme andibuana ke mfri oro ẹken̄wọn̄ọde ẹdidi owo 144,000.—Ediyarade 14:1; 20:6.

Ẹtan̄ ndidem ofụri isọn̄ ẹbok ọtọkiet ẹben̄e Armageddon, “ekọn̄ akwa usen Abasi Ata Ọkpọsọn̄.” Mmọ ẹn̄wana ekọn̄ ye Jesus emi etiede ke afia enan̄ mbakara onyụn̄ adade udịmekọn̄ heaven usụn̄. Ẹsobo kpukpru mme andikara ererimbot emi. Ẹkọbi Satan ndien Jesus ye owo 144,000 oro ẹkara isọn̄ ke “tọsịn isua.” Tọsịn isua oro ẹma ẹbe, ẹyesobo Satan ẹfep.—Ediyarade 16:14; 20:4.

Nso ke ẹdinam ẹnọ ubonowo ke Tọsịn Isua oro Christ ye mme nsan̄a esie ẹdikarade? John ewet ete: “[Jehovah] ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. Mme akpa n̄kpọ ẹma ẹbe ẹfep.” (Ediyarade 21:4) Isọn̄ ayakabade edi Paradise!

Ntem ke n̄wed Ediyarade ada etop Bible esịm utịt. Obio Ubọn̄ Messiah ayanam enyịn̄ Jehovah asana onyụn̄ enen̄ede owụt unen Esie ndikara ke nsinsi nsinsi!

—Ẹda ẹto n̄wed Ediyarade.