Jehovah * akadian akpa ndọ ke isọn̄ emi. Bible ọdọhọ ke enye ama okobot akpa n̄wan ama, enye ama “ada enye ọsọk” Adam. Esịt ama enem Adam tutu enye ọdọhọ ete: “Emi . . . edi ọkpọ eke otode ọkpọ mi ye obụk eke otode obụk mi.” (Genesis 2:22, 23) Jehovah osụk oyoyom mme ọdọ ndọ ẹkop inemesịt ntre.

Ekeme ndidi afo ekekere ke mbufo idinyeneke mfịna ndomokiet ẹma ẹdọdọ ndọ. Edi ọkpọkọm ebe ye n̄wan ẹma kiet eken nte nso, mmọ ẹdisụk inyenyene mfịna ndusụk ini. (1 Corinth 7:28) Edieke anamde item Bible emi ẹwetde ke ekpri n̄wed emi, ndọ mbufo eyenem etieti.—Psalm 19:8-11.

BIBLE ỌDỌHỌ ETE: Ebe edi ibuot ufọk.—Ephesus 5:23.

Jehovah ọdọhọ fi enen̄ede ese n̄wan fo enyịn. * (1 Peter 3:7) Enye okobot enye man enye esin̄wam fi, onyụn̄ oyom fi ama n̄wan fo onyụn̄ okpono enye. (Genesis 2:18) N̄wed Abasi ọdọhọ ke afo enyene ndinen̄ede mma n̄wan fo n̄kan nte amade idemfo.—Ephesus 5:25-29.

Jehovah oyom n̄wan enen̄ede okpono ebe esie onyụn̄ an̄wam enye ekeme ndinam utom esie nte ibuot ufọk. (1 Corinth 11:3; Ephesus 5:33) Ana n̄wan osụk ibuot ọnọ ebe esie onyụn̄ ebere ye enye ke ofụri esịt. (Colossae 3:18) Edieke anamde emi, ebe fo edida fi nte n̄kpọuto, Jehovah edinyụn̄ ada fi ntre.—1 Peter 3:1-6.

SE AKPANAMDE:

• Dọhọ n̄wan fo etịn̄ se enye akpamade fi anam man edi ata eti ebe. Nen̄ede kpan̄ utọn̄ kop se enye editịn̄de nyụn̄ domo ndinam se enye ọdọhọde fi

• Nyene ime. Ayada ini mbemiso mbufo mbiba ẹnen̄erede ẹdiọn̄ọ se ẹkpenamde man ẹnem kiet eken esịt

BIBLE ỌDỌHỌ ETE: Kere ban̄a se ibehede n̄wan fo. (Philippi 2:3, 4) Da enye nte ọsọn̄urua enọ; ti ke Jehovah oyom ikọt esie ẹtie “sụn̄sụn̄ ye kpukpru owo.” (2 Timothy 2:24) Ikọ emi ẹtịn̄de ke ini owo mîtiehe ikere esibiak owo ‘nte akan̄kan̄ ekịm owo,’ edi “edeme mbon ọniọn̄ ọkọk unan.” Ntre, diọn̄ọ nte etịn̄de ikọ ye n̄wan fo. (Mme N̄ke 12:18) Spirit Jehovah ayan̄wam fi etịn̄ ikọ emi enemde enye ke idem onyụn̄ owụtde ke amama enye.—Galatia 5:22, 23; Colossae 4:6.

SE AKPANAMDE:

• Mbemiso enemede akpan n̄kpọ ye n̄wan fo, ben̄e Abasi an̄wam fi osụhọde esịt onyụn̄ okop se enye editịn̄de

• Nen̄ede kere se editịn̄de ye nte edinịmde uyo itịn̄

BIBLE ỌDỌHỌ ETE: Afo ye n̄wan fo ẹdi “obụk kiet” tọn̄ọ ke usen emi mbufo ẹkedọde ndọ. (Matthew 19:5) Edi ti ke afo edi erenowo, enye edi n̄wan. Irenowo ye iban isikereke n̄kpọ ukem ukem. Ntre, ana mbufo ẹkpekpep ndinyene ekikere kiet. (Philippi 2:2) Ana mbufo ẹnyene uyo kiet ke ini ẹyomde ndinam n̄kpọ. Ẹsitie ntre ẹneme se ẹyomde ndinam man ẹkụt unen. Ẹyak Bible ada mbufo usụn̄ ke ini ẹyomde ndibiere akpan n̄kpọ.—Mme N̄ke 8:32, 33.

SE AKPANAMDE:

• Sitịn̄ se afo ekerede nọ n̄wan fo, yak okûdi se oyomde ẹnam kpọt m̀mê se afo ama ekebebiere

• Edieke owo ọdọhọde anam n̄kpọ ọnọ imọ, neme kan̄a ye n̄wan fo mbemiso enyịmede