Jesus odu ebịghi esịt ke “edem Jordan oko,” emi ekerede Perea. (John 10:40) Idahaemi enye ọmọn̄ asan̄a aka Jerusalem.

Jesus idisan̄ake ikpọn̄. Mme mbet esie ye “akwa otuowo” emi esịnede mme ọbọ a-tax ye mme anamidiọk ẹsan̄a ye enye. (Luke 14:25; 15:1) Mme Pharisee ye mme scribe emi ẹsikụtde ndudue ke se Jesus ekpepde onyụn̄ anamde ẹtiene ẹsan̄a n̄ko. Ke Jesus ama ọkọnọ uwụtn̄kpọ aban̄ade erọn̄ oro okosopde, eyen oro ọkọwọrọde ọkpọn̄ ufọk, ye owo inyene ye Lazarus, anaedi kpukpru mme Pharisee ye mme scribe emi ẹsan̄ade ye Jesus mi ẹnyene ediwak n̄kpọ ndikere mban̄a.—Luke 15:2; 16:14.

Enyene se Jesus etịn̄de idahaemi ye mme mbet esie, ndien etie nte imam emi mme asua esie ẹkesakde enye anam enye etịn̄ emi. Ndusụk n̄kpọ emi enye etịn̄de ẹdi se enye ama eketetịn̄ ke ini mmọ ẹkedude ke Galilee.

Ke uwụtn̄kpọ, Jesus ọdọhọ ete: “Owo ikemeke ndinyan̄a, ana n̄kpọ iduọ ẹdu. Edi mbọm owo eke adade mmọ edi! . . . Ẹtịm ẹkpeme idem mbufo. Edieke eyenete fo eduede fi sua nọ enye, ndien edieke enye atuade n̄kpọfiọk fen nọ enye. Idem ọkpọkọm enye edue fi utịm ikatiaba ke usen onyụn̄ afiak edi etiene fi utịm ikatiaba, edidọhọ ete, ‘Mmatua n̄kpọfiọk,’ afo enyene ndifen enye.” (Luke 17:1-4) Akpatre ikọ emi Jesus etịn̄de mi anam Peter eti mbụme emi enye okobụpde aban̄a ndifen nnọ eyenete esie utịm ikatiaba.—Matthew 18:21.

Ndi mme mbet ẹyekeme ndinam se Jesus etịn̄de emi? Ke ini mmọ ẹdọhọde enye ẹte, “Nam mbuọtidem nnyịn etetịm okpon,” enye ọdọhọ mmọ ete: “Edieke mbufo ẹnyenede mbuọtidem eke etiede nte n̄kpasịp mustard, mbufo ẹkpedọhọ obubịt eto mulberry emi ẹte, ‘Wụhọde ka kowụhọ ke inyan̄!’ ndien enye okpokop uyo mbufo.” (Luke 17:5, 6) Ih idem ọkpọkọm owo enyene ekpri mbuọtidem, enye ekeme ndinam ikpọ n̄kpọ.

Ke Jesus ama eketịn̄ emi ama enye anam mme apostle esie ẹdiọn̄ọ ntak emi ọfọnde owo ndisụhọde idem nnyụn̄ ntre ndida idem ke n̄kpọ n̄kaha. Enye ọdọhọ mmọ ete: “Anie ke otu mbufo emi enyenede ofụn eke ofụn̄de isọn̄ m̀mê ọbọkde erọn̄ edidọhọ enye ke ini enye otode in̄wan̄ ọnyọn̄ edi, ete, ‘Di mi inikiet ditie ke okpokoro udia’? Utu ke oro, nte ididọhọke enye ite, ‘Nam udia mbubreyo nọ mi ndia, nyụn̄ bọbọ mbọbọ san̄a utom nọ mi tutu ndia nnyụn̄ n̄n̄wọn̄ n̄kpọ mma, ekem afo ayadia onyụn̄ ọn̄wọn̄ okwo’? Nte enye ọyọkọm ofụn oro koro anamde se ẹkenọde enye anam? Ntre mbufo, n̄ko, ke ini mbufo ẹnamde kpukpru se ẹnọde mbufo ẹnam, ẹdọhọ ẹte, ‘Nnyịn idi ifịn eke mînyeneke ufọn. Nnyịn inam se ikpanamde.’”—Luke 17:7-10.

Ana kpukpru mme asan̄autom Abasi ẹdiọn̄ọ ke ana mmimọ inịm n̄kpọ Abasi akpa ke uwem mmimọ. N̄kpọ efen n̄ko edi nte ke ana kpukpru mmọ ẹti ifet emi mmọ ẹnyenede ndituak ibuot nnọ Abasi nnyụn̄ ndi ikọt esie.

Etie nte edi Jesus etetịn̄ ikọ emi ama, owo emi Mary ye Martha ẹdọn̄de utom edisịm. Iban iba emi ẹdi nditọeka Lazarus, mmọ ẹnyụn̄ ẹdụn̄ ke Bethany ke Judea. Owo oro ọdọhọ Jesus ete: “Ọbọn̄, sese! owo emi afo amade ọdọdọn̄ọ.”—John 11:1-3.

Okposụkedi emi Jesus okopde ke Lazarus ufan esie ọdọn̄ọ idiọk idiọk, enye ifụhọke. Utu ke oro enye ọdọhọ ete: “Udọn̄ọ emi idịghe udọn̄ọ n̄kpa, edi edi man ayarade ubọn̄ Abasi, man okpoto ke enye ẹnọ Eyen Abasi ubọn̄.” Jesus osụk odu do usen iba, ekem enye ọdọhọ mme mbet esie ete: “Ẹyak nnyịn ifiak ika Judea.” Edi mmọ ẹbụp enye ẹte: “Rabbi, ndondo emi ke mbon Judea ẹkeyom nditọn̄ọ fi ke itiat, ndien ndi oyom ndifiak n̄ka do?”—John 11:4, 7, 8.

Jesus ọbọrọ mmọ ete: “Nte un̄wana usen idịghe hour duopeba? Edieke owo ekededi asan̄ade ke uwemeyo enye idituahake n̄kpọ ndomokiet, koro enye okụtde un̄wana ererimbot emi. Edi edieke owo ekededi asan̄ade ke okoneyo, enye ayatuaha n̄kpọ, koro un̄wana mîdụhe enye ke idem.” (John 11:9, 10)  Ikọ Jesus ọwọrọ ke ini emi Abasi ọkọdọhọde imọ ikwọrọ ikọ ikụreke kan̄a. Ana enye aka iso ọkwọrọ ikọ idem ke ekpri ini oro osụhọde tutu ekem ini emi Abasi ekenịmde.

Jesus adian do ete: “Lazarus ufan nnyịn aka ndiduọk odudu, edi ami mmọn̄ n̄ka do man n̄kedemede enye ke idap.” Mme mbet ẹdọhọ enye ẹte: “Ọbọn̄, edieke edide enye aka ndiduọk odudu, enye oyokop nsọn̄idem.” Etie nte mmọ ẹtịn̄ ntem sia mmọ ẹkerede ke Lazarus onyụn̄ ọduọk odudu sia idem esie mîsọn̄ke. Edi Jesus ọdọhọ mmọ in̄wan̄-in̄wan̄ ete: “Lazarus akpa . . . Edi ẹyak nnyịn ika ibịne enye.”—John 11:11-15.

Thomas ọdiọn̄ọ ke ẹkeme ndiwot Jesus ke Judea. Edi enye osụk oyom ndisan̄a ye Jesus man ọsọn̄ọ enye idem. Ntem enye ọdọhọ mme mbet eken ete: “Ẹyak nnyịn n̄ko ika, man nnyịn ikakpa ye enye.”—John 11:16.