Ibịghike Elizabeth ọmọn̄ aman eyen. Mary iman esie odụn̄ ye enye ke ọfiọn̄ ita. Idahaemi ini unyọn̄ ekem, Mary ọmọn̄ afiak ọtọn̄ọ anyan isan̄ esie. Enye odụn̄ ke Nazareth. Ọfiọn̄ itiokiet ẹte ibe, enye n̄ko ayaman eyen erenowo.

Esisịt ini ke Mary ama ọkọnyọn̄, Elizabeth aman eyen. N̄kpọ inamke eka inamke eyen, idem onyụn̄ ọsọn̄ mmọ mbiba. Esịt enem Elizabeth ye Zechariah etieti! Ke ini Elizabeth emende eyen esie owụt mme mbọhọidụn̄ ye iman esie, mmọ ẹnen̄ede ẹdat esịt.

Abasi ọkọdọhọ nditọ Israel ẹsinịm eyen erenowo mbobi ke ini enye esịmde usen itiaita, ndien ini oro n̄ko ke ẹsisio eyen oro enyịn̄. (Leviticus 12:2, 3) Ndusụk owo ẹkere ke ẹkpesio eyen emi enyịn̄ ete esie, Zechariah. Edi Elizabeth ọdọhọ ete: “Baba-o! enye edikere John.” (Luke 1:60) N̄kọ emeti ke angel Gabriel ọkọdọhọ mmọ ẹsio eyen oro John.

Mbọhọidụn̄ ye iman mmọ ẹfan̄a ẹnyụn̄ ẹdọhọ ẹte: “Baba owo kiet ke otu iman fo ikereke enyịn̄ emi.” (Luke 1:61) Mmọ ẹda ubọk ẹbụp Zechariah m̀mê enye oyom eyen esie ekere didie. Zechariah ọdọhọ ẹnọ imọ itiatn̄wed, ndien enye ewet: “John edi enyịn̄ esie.”—Luke 1:63.

Ke Zechariah ama ekewet enyịn̄ emi ẹdikotde eyen esie, enye afiak ọtọn̄ọ nditịn̄ ikọ ndien. N̄kọ emeti ke enye akakabade imụm ke ntak emi enye mîkenịmke se angel oro eketịn̄de ete ke Elizabeth ayaman eyen erenowo. Idahaemi, ke ini Zechariah ọtọn̄ọde ndifiak ntịn̄ ikọ, idem akpa mbọhọidụn̄ esie etieti; mmọ ẹnyụn̄ ẹtọn̄ọ ndibụp kiet eken ẹte: “Nso ke ekpri eyen emi edidi?” (Luke 1:66) Mmọ ẹkụt ke Abasi akanam ẹsio John enyịn̄ emi.

Edisana spirit anam Zechariah ọdọhọ ete: “Itoro enyene Jehovah Abasi Israel, koro enye ọmọwọn̄ọde ntịn̄enyịn esie ọnọ ikọt esie onyụn̄  anyan̄a mmọ. Ndien enye amanam nnụk edinyan̄a etịbe ọnọ nnyịn ke ufọk asan̄autom esie David.” (Luke 1:68, 69) “Nnụk edinyan̄a” oro Zechariah etịn̄de aban̄a mi edi Ọbọn̄ nnyịn Jesus, emi mîkamanake kan̄a ini oro. Zechariah ọdọhọ ke Abasi edida Enye ‘anyan̄a nnyịn osio ke ubọk mme asua nnyịn, ọyọnọ nnyịn ifet ndinam edisana utom nnọ imọ ye unana ndịk ke nsọn̄ọnda ye edinen ido ke iso esie ke ofụri eyouwem nnyịn.’—Luke 1:74, 75.

Zechariah etịn̄ prọfesi aban̄a utom oro eyen esie edinamde ete: “Amaedi afo, ekpri eyen, ẹdikot fi prọfet Ata Edikon̄, koro afo eyebem Jehovah iso aka ndidiọn̄ usụn̄ esie, ndinọ ikọt esie ifiọk edinyan̄a ebe ke edifen mme idiọkn̄kpọ mmọ, oto ke esịt mbọm Abasi nnyịn. Mbọm emi ayanam usiere oto ke enyọn̄ esịm nnyịn, ndiyama nnọ mmọ eke ẹtiede ke ekịm ye mfụt n̄kpa, ndinọ ukot nnyịn ndausụn̄ uforo uforo ke usụn̄ emem.” (Luke 1:76-79) Ndi prọfesi emi inemke fi?

Anaedi Mary ekesịm ufọk mmọ ke Nazareth. N̄kọ emeti ke enye idọhọ ebe kan̄a. Nso ke ẹdinam enye ke ini ẹfiọkde ke enye asan̄a ye idịbi?