Jesus ama ọfọn ama. Enye ikenyeneke mfịna emi mme owo ẹsinyenede. Kpa ye oro, enye ikemenke iso ifep ke ini mme owo ẹnyenede mfịna m̀mê ndidọhọ, ‘mbubehe mbufo edi oro.’ Edi enye ama esitua mme owo mbọm onyụn̄ anam n̄kpọ emi mme owo mîkpamaha ndinam man an̄wam mmọ. Se nte enye akanamde emi ke Ibuot 32, 37, 57, 99.

Kpukpru owo—n̄kpri ye ikpọ—ẹma ẹsisan̄a ẹkpere Jesus sia enye ikesinamke n̄kpọ nte owo emi mînyeneke ini inọ owo, m̀mê ndinam n̄kpọ n̄kwe owo n̄kwe owo. Ama esinem mme owo ndidu ye Jesus sia mmọ ẹma ẹkụt ke enye enen̄ede ama mmimọ. Edieke oyomde ndikụt se isụk itịn̄de emi, se Ibuot 25, 27, 95.

Jesus ama esibọn̄ akam etieti—ke ini enye odude ikpọn̄ m̀mê ke ini enye odude ye ikọt Abasi. Enye ama esibọn̄ akam kpukpru ini, idịghe ke ini udia kpọt. Enye ama esikọm Ete esie ke akam, otoro enye, onyụn̄ ọdọhọ enye eteme imọ se ikpanamde mbemiso enye anamde n̄kpọ. Se nte enye akanamde emi ke Ibuot 24, 34, 91, 122, 123.

Jesus ama esin̄wam mme owo idem ke ini enye okoyomde ndiduọk odudu. Enye ikọdọhọke mmọ ẹkpọn̄ imọ, ke iyom ndiduọk odudu. Jesus oyom nnyịn ima mme owo ntre n̄ko, utu ke ndima idem nnyịn kpọt. Se nte Jesus ekpepde nnyịn ndinam emi ke Ibuot 19, 41, 52.

Jesus ekekpep mme owo ete ẹsifen ẹnọ owo; enye ke idemesie ama esifen ọnọ mbet esie ye mbon en̄wen. Se nte enye akanamde emi ke Ibuot 26, 40, 64, 85, 131.

Mme prọfet ẹma ẹtetịn̄ ke ediwak mme Jew idinịmke ke Jesus edi Messiah, ye nte ke mme asua ẹyewot enye. Ntre, emi akpakanam Jesus ọdọhọ ke ufọn idụhe ndiwot idem ke utom Abasi sia imọdọdiọn̄ọ ke ediwak owo idimaha ndikop se ikwọrọde. Edi Jesus ikanamke oro, enye ama enen̄ede esịn idem ke n̄kpọ Abasi. Enye ama enịm ata eti uwụtn̄kpọ ọnọ kpukpru nnyịn emi itienede enye, akpan akpan ke ini mme owo ẹkọbọde nnyịn m̀mê ke ini mme owo mîmaha ndikop ukwọrọikọ nnyịn. Se itịn̄de emi odu ke Ibuot 16, 72, 103.

Jesus ama ọfọn ama; idụhe owo emi ekebietde enye ke n̄kpọ ndomokiet—ke ifiọk, ke ọniọn̄, ke edinam, ke odudu, ye ke kpukpru n̄kpọ. Edi enye ama osụhọde idem anam n̄kpọ ọnọ mme owo. Oyokụt emi ke Ibuot 10, 62, 66, 94, 116.

Ke ini mme apostle ye mbon en̄wen mîkanamke se Jesus ekekpepde m̀mê ndidu uwem nte enye okodude, Jesus ama aka iso ekpep mmọ n̄kpọ ke ime. Enye ama esikpep mmọ n̄kpọ kiet ediwak ini man an̄wam mmọ ẹtịm ẹkpere Jehovah. Se nte Jesus ekenyenede ime ke Ibuot 74, 98, 118, 135.