Jesus okpono John Andinịm Owo Baptism etieti, edi mbon en̄wen ẹda didie John? Jesus ọdọhọ ete: “Emana emi . . . ebiet n̄kpri nditọ emi ẹtiede ke an̄waurua, emi ẹfioride ẹkot n̄ka mbre mmọ, ẹte, ‘Nnyịn imefri ifiom inọ mbufo, edi mbufo inekke unek; nnyịn imeseme, edi mbufo iyịbike idem ke mfụhọ.’”—Matthew 11:16, 17.

Nso ke ikọ Jesus ọwọrọ? Enye anam ikọ esie an̄wan̄a ete: “John ama edi idiaha n̄kpọ inyụn̄ in̄wọn̄ke n̄kpọ, edi mme owo ẹte, ‘Enye enyene demon’; Eyen owo emedi, adia n̄kpọ onyụn̄ ọn̄wọn̄ n̄kpọ, kpa ye oro mme owo ẹte, ‘Sese! Owo udia ye owo mmịn, ufan mme ọbọ a-tax ye mme anamidiọk.’” (Matthew 11:18, 19) John odu mmemmem uwem nte Nazirite, in̄wọn̄ke wine, mme owo ẹte ke enye edi owo n̄kpọ-nsọp. (Numbers 6:2, 3; Luke 1:15) Edi Jesus itiehe nte John. Enye esidia udia onyụn̄ ọn̄wọn̄ mmịn esisịt, edi mme owo ẹte ke enye edi owo udia ye owo mmịn. Nso ke owo edinanam ọbọhọ nsụkuyo?

Jesus emen emana oro odomo ye n̄kpri nditọ ke an̄waurua emi mîmaha ndinek unek ke ini n̄ka mbre mmọ ẹfride ifiom inyụn̄ imaha ndifụhọ ke ini mmọ ẹsemede idem. Ekem Jesus ọdọhọ ete: “Mme utom ọniọn̄ ẹwụt ke ọniọn̄ enen.” (Matthew 11:16, 19) Ke akpanikọ, utom John ye eke Jesus ẹwụt ke se ẹtịn̄de ẹban̄a mmọ edi nsu.

Ke Jesus ama ọkọdọhọ ke mbon emana oro ẹdi mbon nsọn̄ibuot, enye ọtọn̄ọ ndisụn̄i Chorazin, Bethsaida, ye Capernaum, emi enye akanamde ikpọ utịben̄kpọ. Jesus ọdọhọ ke ekpedi ikanam mme utịben̄kpọ emi ke Tyre ye Sidon emi ẹdude ke Phoenicia, ke mbon obio oro ẹkpekabade esịt. Enye asiak n̄ko Capernaum emi enye esiwakde ndidu. Idem ke Capernaum oro, ata ediwak owo ikabakede esịt. Jesus ọdọhọ ke “n̄kpọ ọyọfọn ye isọn̄ Sodom ke Usen Ikpe akan” obio oro.—Matthew 11:24.

Jesus ọkọm Ete esie sia Enye edịp “mbon ọniọn̄ ye mbon ikike” ifiọk Abasi, edi ayarade ọnọ mbon nsụhọdeidem emi ẹtiede nte n̄kpri nditọwọn̄. (Matthew 11:25) Jesus ọnọ utọ mbon oro inem inem ikot emi ete: “Ẹtiene mi, kpukpru mbufo emi ẹkpade utom ẹnyụn̄ ẹbiomde ndodobi mbiomo, ndien nyọnọ mbufo nduọkodudu. Ẹmen ọkpọnọ mi ẹkọn̄ọ ke itọn̄ mbufo ẹnyụn̄ ẹkpebe mi, koro ami mmenyene ifụre ifụre ido nnyụn̄ nsụhọde idem, ndien mbufo ẹyekụt nduọkodudu ẹnọ ukpọn̄ mbufo. Koro ọkpọnọ mi ememem, mbiomo mi onyụn̄ efefere.”—Matthew 11:28-30.

Didie ke Jesus esinọ owo nduọkodudu? Mme adaiso ido ukpono ẹsinịm ikpọ ibet emi anamde uwem efek owo, utọ nte ekikak ekikak ibet Sabbath. Edi Jesus anam mmọ ẹbọ nduọkodudu ke ndikpep mmọ ata ikọ Abasi emi owo mîbuakke ekikere owo. Enye n̄ko owụt mbon emi ukara ẹfịkde ye mbon emi ẹkerede ke idiọkn̄kpọ mmimọ okpon akaha, nte mmọ ẹkemede ndibọ nduọkodudu. Enye owụt mmọ se mmọ ẹkpenamde man Abasi efen idiọkn̄kpọ mmọ, mmọ ẹnyụn̄ ẹdu ke emem ye Abasi.

Kpukpru mbon emi ẹnyịmede ndimen mmemmem ọkpọnọ Jesus n̄kọn̄ọ ẹkeme ndiyak idemmọ nnọ Ete nnyịn eke heaven nnyụn̄ nnam n̄kpọ esie sia enye edi eti Ete emi esituade owo mbọm. Ndinam ntre ekeme ndinọ owo nduọkodudu, sia se Abasi oyomde oto owo idobike owo mbiomo ke baba usụn̄ kiet.—1 John 5:3.