Ke Jesus ama akanam idem ọsọn̄ owo akpauben̄ oro, enye aka iso odu esisịt ini ke n̄kan̄ Capernaum emi ekperede Inyan̄ Galilee. Akwa otuowo ẹnyụn̄ ẹbụn̄ọ nte ifian̄ ẹtiene enye, ndien enye ọtọn̄ọ ndikpep mmọ n̄kpọ. Nte enye asan̄ade ebe, enye okụt Matthew, emi ẹdiọn̄ọde n̄ko nte Levi, nte etiede ke itie ubọ tax. Jesus ọnọ enye utịbe utịbe ikot emi ete: “Tiene mi.”—Matthew 9:9.

Etie nte Matthew ememehe ye utom Jesus emi edide ndisan̄a n̄kpep mme owo n̄kpọ nnyụn̄ nnam mme utịben̄kpọ eken ke ofụri n̄kan̄ oro ukem nte Peter, Andrew, James, ye John ẹkemehede. Matthew ọsọsọp adaha etiene Jesus kpa nte mmọ ẹkenamde. Matthew etịn̄ ke Gospel esie nte emi eketịbede ete: “Ndien enye [oro edi, Matthew] adaha ke enyọn̄ etiene” Jesus. (Matthew 9:9) Ntem, Matthew ọkpọn̄ utom ubọ tax oro enye ekesinamde onyụn̄ akabade edi mbet Jesus.

Nte ini akade, Matthew esịn usọrọ ke ufọk esie. Ekeme ndidi enye anam emi man ọkọm Jesus ke san̄asan̄a ikot oro enye ọnọde imọ. Ke adianade ye Jesus ye mme mbet esie, mmanie en̄wen ke Matthew okot usọrọ emi? Ediwak n̄kani nsan̄autom esie ye mme ọbọ a-tax eken ẹtiene ẹdi. Mmọ ẹsibọ nsụn̄ikan̄ emi ebehede tax, ẹbọ mme akaisan̄ emi ẹbede ke usụn̄, ẹnyụn̄ ẹbọ mbon oro ẹmende n̄kpọ ke obio en̄wen ẹdụk ẹdi tax ẹnọ ukara Rome. Ndien mme owo ẹma ẹsisua ukara Rome. Mme Jew ẹsise didie mme ọbọ a-tax? Mme owo idaha-da mmọ ke n̄kpọ, sia mmọ ẹsifịk mme owo ẹbọ okụk tax okpon akan nte ẹkpebọde. Mbon oro ẹkediọn̄ọde ke obio nte ‘mme anamidiọk’ ẹma ẹtiene n̄ko ẹdi usọrọ emi.—Luke 7:37-39.

Ke ini mme Pharisee emi ẹsikụtde idem ke edinen ẹkụtde nte Jesus adiade n̄kpọ ye mme utọ owo emi, mmọ ẹbụp mme mbet esie ẹte: “Ntak emi andikpep mbufo adiade n̄kpọ ye mme ọbọ a-tax ye mme anamidiọk?” (Matthew 9:11) Jesus okop se mmọ ẹtịn̄de emi, ntre enye ọbọrọ mmọ ete: “Mbon emi idem ọsọn̄de isiyomke abiausọbọ, edi mbon oro idem mîsọn̄ke ẹsiyom. Ẹka, ndien, ẹkekpep se emi ọwọrọde, ‘Nyom mbọm, idịghe uwa.’ Koro n̄kedịghe ndikot ndinen owo, edi n̄kedi ndikot mme anamidiọk.” (Matthew 9:12, 13; Hosea 6:6) Kpa ye oro mme Pharisee ẹsikotde Jesus andikpep, mmọ inịmke ke enye ekedi andikpep, ntre mmọ iyomke ndikpep n̄kpọ nto enye okposụkedi emi enye ekpekekpepde mmọ nti n̄kpọ.

Se idude edi ke Matthew okot mme ọbọ a-tax ye mme anamidiọk usọrọ ke ufọk esie man mmọ ẹdikop ukwọrọikọ Jesus ẹnyụn̄ ẹkabade esịt sia ediwak mmọ ẹma ẹsikop se enye ọkwọrọde, emi akanam mmọ ẹtiene enye. (Mark 2:15) Jesus oyom ndin̄wam mme anamidiọk emi ẹfiak ẹdi ufan Abasi. Jesus itiehe nte mme Pharisee emi ẹkụtde idem ke edinen; enye isehe mmọ ke ndek. Mbọm mme anamidiọk emi anam enye etieti, enye ekeme ndin̄wam mmọ.

Jesus ituaha mme ọbọ a-tax ye mme anamidiọk mbọm ke ntak emi enye amade-ma edinam mmọ, edi enye akanam ntre man an̄wam mmọ, kpa nte emi enye akan̄wamde mbon udọn̄ọ. Ke uwụtn̄kpọ, ndi emeti nte enye okotụkde owo akpamfia oro onyụn̄ ọdọhọ enye ete: “Mmama. Sana”? (Matthew 8:3) Ndi ikpọfọnke nnyịn itua mbon en̄wen mbọm kpa ntre, akpan akpan ke ini ikụtde ke oyom ikpep mmọ Ikọ Abasi?