Jesus afiak aka synagogue ke usen Sabbath, etie nte synagogue emi odu ke Galilee. Do ke enye okụt owo kiet emi ubọk nnasia esie akpade. (Luke 6:6) Mme scribe ye mme Pharisee ẹnen̄ede ẹtat enyịn ẹse se Jesus edinamde. Ntak emi mmọ ẹnen̄erede ẹse enye? Mbụme emi mmọ ẹbụpde Jesus anam idiọn̄ọ ntak. Mmọ ẹbụp enye ẹte: “Nte ibet enyịme ete ẹkọk owo udọn̄ọ ke sabbath?”—Matthew 12:10.

Mme adaiso ukpono mme Jew ẹkere ke owo emi ekperede n̄kpa kpọt ke ẹkpekọk udọn̄ọ ke Sabbath. Ke uwụtn̄kpọ, ibet mmọ inyịmeke ẹdụri m̀mê ẹbọp owo ọkpọ ke Sabbath, sia itiehe nte owo oro enyenede orụk unọmọ emi ọmọn̄ akpakpa. Mme scribe ye mme Pharisee ibụpke Jesus mbụme oro ke ntak emi mbọm ete oro anamde mmọ, edi ẹyom usụn̄ nte ẹdọhọde ke Jesus abiat ibet Sabbath.

Edi Jesus ọfiọk idiọk ekikere mmọ. Enye ọfiọk ke ekikere mmọ isan̄ake-san̄a n̄kpọ ye orụk utom oro ibet Abasi ọkọdọhọde owo okûnam ke usen Sabbath. (Exodus 20:8-10) Idịghe akpa ini emi mmọ ẹsuade ẹnọ Jesus ke eti n̄kpọ emi enye anamde edi emi. Idahaemi, Jesus ọmọn̄ anam n̄kpọ emi edinamde mme Pharisee ẹyat esịt ye enye; enye ọdọhọ owo oro ubọk esie akpade ete: “Daha ke enyọn̄ dida mi ke ufọt.”—Mark 3:3.

Jesus ọwọn̄ọde ese mme scribe ye mme Pharisee, onyụn̄ ọdọhọ mmọ ete: “Anie ke otu mbufo ekpenyene erọn̄ kiet ndien, edieke enye ọduọde odụk obube ke sabbath, mîdimụmke enye isio?” (Matthew 12:11) Erọn̄ etie nte okụk emi owo esịnde ke mbubehe, ntre mmọ ikemeke ndiyak enye esịne ke obube eyo esiere sia ekeme ndikpa, ndien okụk mmọ atak. N̄kpọ en̄wen edi nte ke N̄wed Abasi ọdọhọ ete: “Edinen owo ese aban̄a ukpọn̄ ufene esie.”—Mme N̄ke 12:10.

Jesus emen erọn̄ odomo ye owo, ete: “Adan̄a didie ndien ke owo ọsọn̄ urua akan erọn̄! Ntre ibet enyịme ete ẹnam eti n̄kpọ ke sabbath.” (Matthew 12:12) Ntem Jesus ibiatke ibet ndomokiet edieke enye ọkọkde owo udọn̄ọ ke Sabbath. Mme adaiso ido ukpono emi inyeneke n̄kpọ ndomokiet aba nditịn̄, sia Jesus etịn̄ nnennen ikọ emi esịnede ifiọk. Mmọ ẹkịbi inua, imaha aba ndisioro uyo.

Esịt ayat Jesus, enye onyụn̄ ofụhọ ke ini enye okụtde nte mme owo ẹkerede n̄kpọ ntre. Enye ese akanade, ekem ọdọhọ owo oro ete: “Nyanade ubọk fo.” (Matthew 12:13) Ke ini owo oro anamde se Jesus etịn̄de, ubọk esie ọfọn. Oro anam owo oro enem esịt etieti. Edi ndi esịt enem mbon oro ẹyomde-yom se ẹdade ẹmụm Jesus do?

Utu ke mme Pharisee ẹnem esịt ke Jesus anam ubọk owo emi afiak ọfọn, mmọ ẹdaha inikiet inikiet ẹkedụk ediomi “ye n̄ka mme anditiene Herod mban̄a [Jesus], man ẹwot enye.” (Mark 3:6) N̄ka emi edi n̄ka mbre ukara, ndien etie nte ndusụk mmọ ẹdi mbon ido ukpono emi ẹkotde mme Sadducee. Mme Sadducee ye mme Pharisee isimaha kiet eken, edi idahaemi, mmọ ẹdidiana kiet man ẹwot Jesus.