Ibuot 48

Emem Emem Obufa Ererimbot Abasi—Nte Afo Ekemede Ndidụn̄ Do

ABASI ekesịn Adam ye Eve ke in̄wan̄ Eden. Idem okposụkedi mmọ ẹkesọn̄de ibuot ẹnyụn̄ ẹkpan̄ade, Abasi ama anam ndutịm man nditọ mmọ, emi esịnede nnyịn mfịn, ẹkeme ndidu uwem ke nsinsi ke Paradise. Bible ọn̄wọn̄ọ ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29.

Bible etịn̄ aban̄a “obufa enyọn̄” ye “obufa isọn̄.” (Isaiah 65:17; 2 Peter 3:13) Mme ukara owo emi ẹdude mfịn ẹnam “enyọn̄” emi odude idahaemi, edi Jesus Christ ye mbon emi ẹdikarade ye enye ke heaven ẹdinam “obufa enyọn̄.” Nso utịbe n̄kpọ ke edidi ntem ke ini obufa enyọn̄ emi, kpa edinen emem emem ukara Abasi, akarade ofụri isọn̄!

Nso, ndien, idi “obufa isọn̄”?— Obufa isọn̄ edidi nti owo oro ẹmade Jehovah. Kamse, ke ini Bible etịn̄de aban̄a isọn̄, enye ndusụk ini esitịn̄ aban̄a mme owo oro ẹdụn̄de ke isọn̄, idịghe isọn̄ ke idemesie. (Genesis 11:1; Psalm 66:4; 96:1) Ntre mme owo oro ẹnamde obufa isọn̄ ẹyedụn̄ mi ke isọn̄ emi.

Ererimbot emi ọyọhọde ye ndiọi owo mi eyebe efep adan̄aoro. Ti, Ukwọ eyo Noah ọkọkpọri mme owo ke idiọk ererimbot oro efep. Ndien, nte nnyịn ikpepde, ẹyesobo idiọk ererimbot emi ẹfep ke Armageddon. Yak ise idahaemi nte uwem editiede ke obufa ererimbot Abasi ke Armageddon ebede.

Nte afo omoyom ndidu uwem ke nsinsi ke Paradise ke emem  emem obufa ererimbot Abasi?— Abiausọbọ ndomokiet ikemeke ndinam nnyịn idu uwem ke nsinsi. N̄kpasịp ibọk ndomokiet idụhe oro mîdiyakke nnyịn ikpa. N̄kukụre usụn̄ oro nnyịn ikemede ndidu uwem ke nsinsi edi ndisan̄a n̄kpere Abasi. Ndien Akwa Andikpep asian nnyịn nte ikemede ndinam oro.

Yak imen Bible nnyịn idi inyụn̄ ikụbọde ika John ibuot 17, ufan̄ikọ 3. Mi ke nnyịn ikụt mme ikọ Akwa Andikpep emi: “Ndien nsinsi uwem oro edi ndifiọk Fi, ata Abasi kierakiet, ye Enye emi Afo ọkọdọn̄de, kpa Jesus Christ.”

Ntre, Jesus ọkọdọhọ ke oyom nnyịn inam nso man idu uwem ke nsinsi?— Akpa, ana nnyịn ifiọk Ete nnyịn eke heaven, Jehovah, inyụn̄ ifiọk Eyen esie n̄ko, emi ọkọnọde uwem esie kaban̄a nnyịn. Emi ọwọrọ ke oyom nnyịn ikpep Bible. N̄wed emi, Kpep N̄kpọ to Akwa Andikpep, an̄wam nnyịn ndinam emi.

Edi didie ke ndikpep mban̄a Jehovah an̄wam nnyịn ndidu uwem ke nsinsi?— Ọfọn, kpa nte nnyịn iyomde udia kpukpru usen, oyom nnyịn ikpep iban̄a Jehovah kpukpru usen. Bible ọdọhọ ete: “Idịghe uyo ikpọn̄ ke owo edida idu uwem, edi edida kpukpru ikọ eke ẹwọrọde Abasi ke inua odu.”—Matthew 4:4.

Oyom nnyịn n̄ko ifiọk Jesus Christ koro Abasi ọkọdọn̄ Eyen esie edimen idiọkn̄kpọ nnyịn efep. Bible ọdọhọ ete: “Edinyan̄a . . . itoho ke baba owo kiet efen.” Bible ọdọhọ n̄ko ete: “Owo eke ọbuọtde idem ye Eyen enyene nsinsi uwem.” (Utom 4:12; John 3:36) Idahaemi, nso ke ‘ndibuọt idem’ ye Jesus ọwọrọ?— Enye ọwọrọ ke nnyịn imenen̄ede inịm Jesus ke akpanikọ inyụn̄ ifiọk ite ke ẹsiode enye ẹfep ke nnyịn ikemeke ndidu uwem ke nsinsi. Ndi nnyịn imenịm oro ke akpanikọ?— Edieke nnyịn inịmde, nnyịn iyaka iso ndikpep n̄kpọ nto Akwa Andikpep kpukpru usen, ndien nnyịn iyanam se enye ọdọhọde.

 Eti usụn̄ kiet ndikpep n̄kpọ nto Akwa Andikpep edi ndikot n̄wed emi kpukpru ini ndinyụn̄ nse nnyụn̄ n̄kere mban̄a kpukpru ndise. Se m̀mê afo emekeme ndibọrọ mme mbụme oro ẹbụpde ẹban̄a ndise emi. N̄ko, kot n̄wed emi ye eka m̀mê ete fo. Edieke ete ye eka fo mîdụhe, kot enye ye ikpọ owo ye nditọwọn̄ efen. Nte ikpedịghe n̄kpọ inemesịt edieke afo ekemede ndin̄wam mbon en̄wen ẹkpep ẹto Akwa Andikpep se oyomde mmọ ẹnam man ẹdu uwem ke nsinsi ke obufa ererimbot Abasi?—

Bible asian nnyịn ete: “Ererimbot ke ebebe efep.” Edi ekem Bible anam an̄wan̄a nte nnyịn ikemede ndidu uwem ke nsinsi ke obufa ererimbot Abasi. Enye ọdọhọ ete: “Owo eke anamde se Abasi amade ododu ke nsinsi.” (1 John 2:17) Ntre didie ke nnyịn ikeme ndidu uwem ke nsinsi ke obufa ererimbot Abasi?— Ebe ke ndifiọk Jehovah ye edima Eyen esie, Jesus. Edi ana nnyịn n̄ko inam se nnyịn ikpepde. Afo ndikot n̄wed emi akpakam an̄wam fi ndinam mme n̄kpọ emi.

 [Ekebe/Ndise ke page 251]

Nte afo okotde Isaiah 11:6-9 ye Isaiah 65:25, afo ekpep aban̄a mme unam ndidụn̄ ọtọkiet ke emem. Se mme ndise emi. Sese eyenerọn̄, eyenebot, anawụri ekpe, eyenenan̄, akamba lion, ye nditọwọn̄ emi ẹdude ye mmọ. Nte afo emekeme ndisiak enyịn̄ mme unam eken ke ndise emi, oro Bible etịn̄de aban̄a?— Sese ekpri eyeneren ebrede mbre ye ibọm! Iyomke owo ndomokiet emi odude ke obufa ererimbot okop ndịk. (Hosea 2:18) Afo ekere nso aban̄a oro?—

 [Ekebe/Mme ndise ke page 252, 253]

Idahaemi, se nte kpukpru orụk owo ẹdude ke emem. Kpukpru mmọ ẹma kiet eken, kpa nte Jesus ọkọdọhọde ke mme anditiene imọ ẹyema kiet eken. (John 13:34, 35) Ẹda mme n̄kpọekọn̄ ẹnam mme n̄kpọ ndida ndiọn̄ isọn̄. Bible etịn̄ aban̄a utịbe utịbe emem ye ifụre oro mme owo ẹdinyenede ke obufa ererimbot Abasi. Nnyịn imekeme ndikot mban̄a emi ke mme utọ itie N̄wed Abasi nte Psalm 72:7; Isaiah 2:4; 32:16-18; ye Ezekiel 34:25.

 Se mme owo oro ẹdude ke page emi. Mmọ ke ẹdiọn̄ isọn̄, ẹnamde enye edi ediye ebiet. Sese ediye ufọk oro mmọ ẹbọpde ye kpukpru inem inem mfri ye ikọn̄udia oro ẹwụtde mi. Mme owo ẹdu ke emem, ntre isọn̄ akabade edi paradise ukem nte in̄wan̄ Eden. Nnyịn imekeme ndikot mban̄a mme utịbe utịbe n̄kpọ emi ke Psalm 67:6; 72:16; Isaiah 25:6; 65:21-24; ye Ezekiel 36:35.

 [Ekebe/Ndise ke page 254]

Nte afo okụtde mi, kpukpru owo ẹkop nsọn̄idem ẹnyụn̄ ẹkop inemesịt. Mme owo ẹkeme ndifrọ nte okoyo. Owo ndomokiet idịghe mbụn̄ọ, nnan, inyụn̄ idọn̄ọke. Ndien se mme owo oro ẹnamde ẹset ke n̄kpa! Bible etịn̄ aban̄a mme n̄kpọ emi ke Isaiah 25:8; 33:24; 35:5, 6; Utom 24:15; ye Ediyarade 21:3, 4.