Se Nditọwọn̄ Ẹyomde Ẹto Mme Ete Ye Eka

KPUKPRU ete ye eka ẹbuana ke edinam oro ayan̄ade owo ifiọk. Mmọ kiet kiet ẹnọ n̄kpọ oro otode idem mmọ. Nte utịp, se ikọride ke idem eka edi ọyọhọ odu uwem owo. Ke ntre, idịghe n̄kpọ n̄kpaidem nte ke ini nsekeyen amanade, mme owo ẹsitịn̄ ẹban̄a n̄kpọntịbe oro nte “utịben̄kpọ aban̄ade uman.”

Nte ededi, ndinyene nditọ akam edi ntọn̄ọ mbiomo oro ete ye eka ẹnyenede. Ke ntọn̄ọ, ekpere ndidi nseknditọ ẹsiberi edem ofụri ofụri ke ete ye eka mmọ, edi nte mmọ ẹkọride ẹkpon, mmọ ẹsiyom se ikande ntịn̄enyịn ikpọkidem. Mmọ ẹsiyom un̄wam man ẹkọri ke n̄kan̄ eke ekikere, ntụk, ido uwem, ye ke n̄kan̄ eke spirit.

Man ẹkọri ke usụn̄ oro ọfọnde, nditọwọn̄ ẹnen̄ede ẹyom ima ete ye eka. Okposụkedi mme ikọ ima ẹdide akpan n̄kpọ, oyom ẹnanam emi ẹwụt. Ih, nditọwọn̄ ẹsiyom mme ete ye eka mmọ ẹnịm nti uwụtn̄kpọ. Mmọ ẹyom ndausụn̄ ido uwem, kpa mme edumbet ndida ndu uwem. Ndien mmọ ẹyom emi ọtọn̄ọde ke nsek. Mme n̄kpọ oro ẹkamade iduọesịt ẹkeme nditịbe ndien ẹsitịbe ke ini ebịghide akaha mbemiso ẹtọn̄ọde ndinọ nditọwọn̄ un̄wam.

Mme mfọnn̄kan edumbet oro ẹkemede ndikụt ẹdi mbon oro ẹdude ke Bible. Item oro ọkọn̄ọde ke Bible enyene mme n̄wọrọnda ufọn. Ebede ke utọ item oro, nditọwọn̄ ẹsifiọk ẹte ke se ẹtịn̄de ẹnọ mmimọ idịghe ikọ owo, edi ẹdi ikọ Andibot mmimọ, kpa Ete mmimọ eke heaven. Emi esinam item oro enen̄ede enyene odudu.

Bible esịn udọn̄ ọnọ mme ete ye eka ndinam utom ọkpọsọn̄ man ẹsịn ndinen edumbet ke esịt nditọ mmọ. Nte ededi, nte nditọwọn̄ ẹkọride ẹkpon, mme ete ye eka ẹsikụt nte ọsọn̄de ndinyene nneme ye mmọ mban̄a mme n̄kpọ oro ẹdide akpan n̄kpọ ẹkan. Ẹtịm n̄wed emi, Kpep N̄kpọ to  Akwa Andikpep, man an̄wam ndikpan utọ idaha oro ndidemede. Enye ọyọnọ fi ye nditọ fo n̄kpọ eke spirit ndikot ọtọkiet. Edi ke akande oro, enye ekpenyene ndidemede nneme ke ufọt nditọwọn̄ ye mbon oro ẹkotde n̄wed emi ye mmọ.

Afo oyokụt nte ke n̄wed emi oyom nditọwọn̄ ẹnọ mme ibọrọ. Ẹbụp ediwak mbụme oro ẹdotde ke n̄wed emi. Ke ini afo esịmde mme mbụme emi, afo oyokụt ekpri udịm emi (—). Ẹsịn enye man afo eti ndituak nda nnyụn̄ nsịn udọn̄ nnọ eyen oro nditịn̄ ikọ. Nditọwọn̄ ẹsima ẹbuan mmimọ ke nneme. Ye unana edibuan eyenọwọn̄ ke nneme, enye ọyọsọsọp anana udọn̄.

Edi, ke edide akpan n̄kpọ akan, mme mbụme emi ẹyen̄wam fi ndifiọk se eyen oro ekerede. Ke akpanikọ, eyen oro ekeme ndinọ mme ibọrọ oro mînenke. Edi ẹtịm ikọ oro ẹwetde ẹtiene mbụme kiet kiet ndin̄wam eyen oro ndikọri nti edu ukere n̄kpọ.

San̄asan̄a n̄kpọ kiet ke n̄wed emi edi ndise oro awakde ẹbe 230. Ata ediwak mmọ ẹnyene mme uwetn̄kpọ oro oyomde eyenọwọn̄ ọnọ ibọrọ ọkọn̄ọde ke se enye okụtde onyụn̄ okotde. Ntre dụn̄ọde mme ndise emi ye eyen oro. Mmọ ẹkeme ndidi nti un̄wam ukpepn̄kpọ oro ẹnamde se ẹkpepde an̄wan̄a.

Ke ini eyen oro ọfiọkde ndikot n̄wed, sịn udọn̄ nọ enye ndikot n̄wed emi nnọ fi onyụn̄ okot ọnọ idemesie. Adan̄a nte enye okotde, ntre ke nti item emi ẹdisọn̄ọ ẹdu ke ekikere ye esịt esie. Edi man ọsọn̄ọ mbọbọ ima ye ukpono ke ufọt fo ye eyen fo, sịn ukeme ndikot n̄wed emi ọtọkiet nte ekekeme, nyụn̄ nam emi kpukpru ini.

Nditọwọn̄ ẹkụt oburobụt ido idan̄, ubụpekpo, ye mme ndek ndek edinam eken ke udomo oro owo mîkekereke ke isua ifan̄ oro ẹkebede. Ntre mmọ ẹyom ukpeme, emi n̄wed emi an̄wamde ndinọ in̄wan̄-in̄wan̄, edi ke usụn̄ oro owụtde ukpono.

Edi, nditọwọn̄ ẹnen̄ede ẹyom ẹdụri ntịn̄enyịn mmimọ ẹwụt Enye emi kpukpru ọniọn̄ otode, kpa Ete nnyịn eke heaven, Jehovah Abasi. Emi edi se Jesus, kpa Akwa Andikpep, ekesinamde kpukpru ini. Nnyịn imenen̄ede idori enyịn nte ke n̄wed emi ayan̄wam fi ye ubon fo ndidu uwem oro enemde Jehovah esịt, man mbufo ẹbọ edidiọn̄ ke nsinsi.