Ke 1999, esop usem idiọn̄ọ ke Kobe ke Japan ẹma ẹkop ke odu eren inan kiet emi ekerede Hirofumi. Ke ini eyenete eren kiet okodomode ndika n̄kese Hirofumi, eka esie ikayakke eyenete oro okụt enye. Eyenete oro ama aka afiak aka onyụn̄ ekpe eka esie ubọk, ndien ke akpatre enye ama ada Hirofumi ọwọrọ edi enyịnusụn̄. Idet  ye ntan̄ebek esie ẹma ẹniọn̄ ẹnyụn̄ ẹsuahade. Enye ekebiet owo emi okosopde ke akai ke ediwak isua. Iso esie ikebietke iso eyen owo. Hirofumi ekedi inan onyụn̄ edi nnan. Idem ama akpa eyenete oro, edi enye ama omụm Hirofumi ubọk etịn̄ ikọ ke usem idiọn̄ọ inan ye nnan ọnọ enye. Hirofumi ikanamke n̄kpọ ndomokiet. Enye ekesidu ikpọn̄ ikonyụn̄ inemeke nneme ye owo ndomokiet tọn̄ọ enye akakabade nnan ke isua 10 emi ẹkebede ke ini enye ekedide isua 31.

Eyenete oro ama afiak aka ke usen iba ẹma ẹkebe. Idem ama akpa eka Hirofumi sia ekekerede ke eyenete oro idifiakke idi aba ke ntak nte eyen esie eketiede. Eyenete oro ama afiak ekpe eka Hirofumi ubọk ete ayak imọ ikụt Hirofumi, ntre eka esie ama ada enye ọwọrọ edi enyịnusụn̄. Ke eyenete oro ama ekedi edise Hirofumi ke ufan̄ ọfiọn̄ kiet, eka esie ama ọdọhọ eyenete oro ke ufọn idụhe enye ndisidi aba. Edi eyenete oro ama aka iso ndika. Enye ama esida inịn̄e inịn̄e uyo ọsọk mmọ onyụn̄ anam ofụri ukeme esie ndiwụt mmọ ke imọ imama mmọ. Ke ọfiọn̄ iba ẹma ẹkebe, eyenete oro ama ekere ke ufọn ndisika idụhe sia Hirofumi mîkekemeke ndisinam n̄kpọ ndomokiet.

Edi eyenete oro ama ebiere ndika ini kiet en̄wen nte akpatre. Mbemiso enye akade akpatre ini emi, enye ama ọbọn̄ akam ọnọ Jehovah ete an̄wam imọ ifiọk m̀mê akpana isisụk ika ikese Hirofumi. Ke ini eyenete oro ekesịmde edem mme Hirofumi, enye ama omụm Hirofumi ubọk anam idiọn̄ọ man Hirofumi ọfiọk ke enyene Abasi emi ekerede Jehovah emi esitiede ke heaven ese se itịbede inọ enye, emi se itịbede inọ enye an̄wan̄ade enye akan owo en̄wen ekededi. Jehovah ama ekere aban̄a enye  onyụn̄ oyom ndinyan̄a enye nsio ke nnanenyịn esie. Oro akanam Jehovah ọdọn̄ kiet ke otu Mme Ntiense esie edise enye. Ke akpa, Hirofumi ikanamke n̄kpọ ndomokiet; edi nte ini akakade, enye ama ọkọm eyenete oro ubọk ndien mmọn̄eyet ama asiaha enye onyụn̄ ewet osụhọde ke ebek esie. N̄kpọ oro ama enen̄ede otụk eyenete nnyịn, ntre mmọn̄eyet ama asiaha enye n̄ko. Ẹma ẹtọn̄ọ ukpepn̄kpọ Bible.

Ke ẹma ẹkekpep n̄kpọ ye Hirofumi ke isua 11, enye ama ọtọn̄ọ ndisidụk mbono esop ke mbọhọ mmọ utu ke ndisan̄a anyan usụn̄ n̄ka esop oro ẹsinịmde mbono esop ke usem idiọn̄ọ nte enye ekesinamde akpa. Owo ndomokiet ke esop oro ikọfiọkke usem idiọn̄ọ, edi ke ufan̄ isua kiet ye ubak, nditọete 22 ke esop oro ẹma ẹkpep usem idiọn̄ọ  man ẹkeme ndin̄wam Hirofumi. Ke January 2012, Hirofumi ama anam n̄kpọ ke akpa ini ke Ufọkn̄wed Utom Ukara Abasi, ndien owo en̄wen akakabarede se enye eketịn̄de. Ke October 2012, enye ama akabade edi asuanetop oro mînaha baptism.

Floren, asiakusụn̄ emi odụn̄de ke Philippines, esinịm ukpepn̄kpọ Bible 25, emi ata ediwak edide ye mbon ukpeme. Mbon ukpeme emi ẹsiwak ndinam utom okoneyo—ndien ndusụk mmọ tutu eyo esiere. Ke ntem, Floren enyene ndisikpụhọ ini ukpepn̄kpọ esie. Enye esika itieutom mbon ukpeme oro ekekpep mmọ n̄kpọ ke ini nduọkodudu mmọ m̀mê ke ini en̄wen emi mîtịmekede utom mmọ. Enye esinịm ndusụk ukpepn̄kpọ ke ufọt n̄kanika 7 ye n̄kanika 11 okoneyo, enịm mbon eken ke ufọt n̄kanika 5 ye n̄kanika 9 usenubọk. Ndusụk ini, enye esidiomi ndika ke ini mmọ ẹyomde ndikpụhọ ini utom. Emi esinam enye ekpep n̄kpọ ye owo emi oyomde nditọn̄ọ utom, ndien ekem ekpep owo emi okụrede utom idahaoro. Floren ọdọhọ ete, “Sia nnyenede ediwak ukpepn̄kpọ Bible ntem, mmokop idatesịt nte akanam mmen̄kopke.” Ndusụk mbon ukpeme oro ẹsidụk mbono esop ke Ufọkmbono Obio Ubọn̄. Owo kiet ke otu nditọ ukpepn̄kpọ Bible Floren ana baptism idahaemi, onyụn̄ edi asiakusụn̄ ofụri ini.

Ke ini nditọete iban iba ẹkekwọrọde ikọ ke usen edịm ke Armenia, mmọ ẹma ẹkụt eka kiet ye eyenan̄wan esie ẹnyụn̄ ẹnọ mmọ tract. Idem ama akpa nditọete oro ke ini Marusya emi edide eka ọkọdọhọde ke imọ ye Yeva eyen imọ ikada ke an̄wa ke edịm oro ke hour iba ibet ndikụt Mme Ntiense Jehovah. Ntak-a? Eyeneka Marusya ama  ekpep akpanikọ ke ufọk-n̄kpọkọbi oto nditọete emi ẹkedude do ke ntak emi mîketieneke isịn idem ke mbubehe ukara. Marusya ekekere ke eyeneka esie edinyọn̄ n̄kpọkọbi idi nte ata idiọkowo. Edi eyen mbon akakam edi eti owo emi osụhọrede idem. Nte eyeneka Marusya akakade iso ndibuana ye Mme Ntiense, enye eketetịm ọfọn. Kpukpru emi ikebeheke Marusya ye eyen esie sia mmọ ẹma ẹsikop idiọk etop emi ẹkesuande ẹban̄a Mme Ntiense Jehovah ke mme babru usuanetop ye ke ekebe ndise. Yeva ama ekere ete: ‘Eyeneka eka mi edi ata eti owo. Edi ntak emi ẹsitịn̄de ediwak ndiọi n̄kpọ ẹban̄a Mme Ntiense Jehovah?’ Sia okoyomde ndifiọk n̄kpọ emi, enye ama ọdọhọ eka esie ete: “Tutu amama nnyịn idifiọkke n̄kpọ iban̄a ibon emi ibọhọke nnyịn inyịme se ededi oro editịbede etịbe. Yak ika ikoyom Mme Ntiense Jehovah idahaemi inyụn̄ itre ofụri ndutịme emi.” Se mmọ ẹkenyụn̄ ẹnamde edi oro ke usen oro nditọete iban oro ẹkesobode ye mmọ. Usen iba ke oro ebede, ẹma ẹtọn̄ọ ukpepn̄kpọ Bible ye eka ye eyen. Mmọ ẹma ẹtọn̄ọ ndisidụk mme mbono esop, ẹnyụn̄ ẹnam n̄kọri ẹsịm ndikabade ndi mme asuanetop oro mînaha baptism.

Ke obio Adana ke Turkey, n̄wan kiet emi ekenyenede ikpọ mfịna idemesie ye eke ubon, emi okonyụn̄ oyomde ndiwot idem, ama okụt mme magazine nnyịn ke enyịnusụn̄ esie. Etie nte nditọwọn̄ ẹkekụt magazine emi ke isọn̄ ẹnyụn̄ ẹtan̄ mmọ ẹkebon do sia ẹkekerede ke enye enyene. Mme mbụk eyouwem ke magazine oro ẹma ẹnen̄ede ẹtụk mma oro tutu enye oyom nte uwem esie ekpetienede okpụhọde ntre. Mma oro ama okot nọmba telefon oro ẹkewetde ke magazine oro kiet onyụn̄ enyene nneme ye eyenete an̄wan emi edide asiakusụn̄, emi odụn̄de ekpere enye. Ẹma ẹtọn̄ọ ukpepn̄kpọ Bible ye enye. Mma oro ama  ama se enye ekekpepde onyụn̄ ọdọhọ ke iyetiene idụk mbono esop. Ke mfọniso, ufọk esie ekekpere Ufọkmbono Obio Ubọn̄. Enye ama ọsọsọp ọtọn̄ọ ndidụk mbono esop, ndien ke aka iso ndisidụk.

Bam, emi ekedide bodisi ekesinyụn̄ akade ufọkabasi ke Nepal, ama osobo ebe ye n̄wan emi ẹdide akpan asiakusụn̄ ke efak ke ini enye akanamde utom esie. Enye ama ama nte mmọ ẹkekụbọrede Bible ẹbọrọ kpukpru mbụme esie. Bam ama enyịme ẹkpep imọ Bible, ndien ikebịghike enye ama ọtọn̄ọ ndidụk mbono esop. Nte ukpepn̄kpọ esie akakade iso, ubieresịt esie ama ọtọn̄ọ ndifịna enye ke ntak utom esie, ntre enye ama ọdọhọ eteutom esie ete anam imọ isidu ke ọfis, sia enye idisikamake ikan̄ do. Eteutom esie ama enyịme. Ke Bam ama okodụk mbono district, ubieresịt esie ama afiak afịna enye, ndien oro ama anam enye ọkpọn̄ utom bodisi ofụri ofụri.

N̄kpọ emi ikenemke n̄wan Bam esịt, sia utom bodisi esinam ẹkpono owo, ẹkpe owo ediwak okụkọfiọn̄, ẹnyene nsio nsio ufọn, ẹnyụn̄ ẹkpe owo ediwak okụk ukpọn̄ utom. Man anam Bam okûkpọn̄ utom, n̄wan esie ama ọdọhọ ete: “Edieke afo anamde utom bodisi, ami nyekpep Bible ye Mme Ntiense Jehovah.” Ke ini oro mîkakpanke enye, n̄wan esie ama ọdọhọ akamba owo bodisi ọkọbi Bam, sia ekerede ke emi ayanam Bam okpụhọde ekikere. Ke Bam ama okodu usen duop ke ufọk-n̄kpọkọbi, ẹma ẹsio enye, edi enye okosụk ebebiere ndiyom utom en̄wen. Enye ama ọtọn̄ọ ndisida enan̄ukwak emi enyenede ọkpọ ita n̄wat usụn̄, emi ọwọrọde ndinam utom mbịghi ke ufiop eyo. Kpa ye oro ekedide ọkpọson̄ utom, enye ama okop inemesịt. Enye ama aka iso anam n̄kọri onyụn̄ akabade edi asuanetop. Nte ini akakade, ubiọn̄ọ an̄wan esie ama  osụhọde ubọk. Enye ama ọtọn̄ọ ndikpep Bible ke ntak mfọnido emi nditọete ke esop ẹkefọnde ye enye. Bam ama aka iso ese aban̄a ubon esie onyụn̄ enyene okụk nte awat usụn̄ akan nte ekenyenede ke ini ekedide bodisi. Enye ama ana baptism ke mbono ke February 2013, ndien idahaemi n̄wan ye eyen esie ẹsitiene enye ẹdụk mbono esop.

Myeong-hee, eyenete an̄wan kiet emi odụn̄de ke Korea, enyene mfịna ke ukot kiet ke ntak akpauben̄ nditọwọn̄ emi enye ọkọdọn̄ọde ke ini ekedide isua iba. Enye esisọp akpa mba ndien ndusụk ini esiduọ. Ke adianade do, enye okop oyomonsia onyụn̄ enyene mme mfịna en̄wen ke ntak ibọk emi enye esidade. Esisọn̄ Myeong-hee ndikot ibifịk, ndien mfịghe ye editịmede esịt ẹsinam enye okop ubiak. Kpa ye mme mfịna emi, Myeong-hee okoyom ndidi asiakusụn̄ unọ un̄wam ndien enye anam oro ke ekperede ndidi kpukpru ọfiọn̄ ke isua iba emi ẹbede. Enye ọkọm Jehovah ke emi enye ọkọnọde enye odudu ndinam utom emi.

Agnes emi edide isụn̄utom ke Indonesia, ama esikwọrọ ikọ ọnọ n̄wan kiet emi edide n̄kpọ nte isua 45 emi akasan̄ade ye idịbi. Enye ekesinyam ikọn̄ udia ke urua. Mma oro ama ama ndisikot mme magazine nnyịn onyụn̄ ama ndisinyene nneme Bible ke ini enye enyenede ifet. Usen kiet ke ini Agnes akakade urua ndise mma oro, enye ikodụhe. Ebe mma oro ama ọdọhọ Agnes ke n̄wan imọ aman eyen. Agnes ama aka ekese enye. Enye ama ọbọp N̄wed Mi eke Mme Mbụk Bible nte enọ ke ekwo ada ọsọk  mma oro. Idem ama akpa mma oro ndikụt nte Agnes ekedide edise enye ye eyen esie, edi idem ama enen̄ede akpa enye ke ini Agnes ọkọnọde enye enọ oro. Mma oro ama atat n̄wed oro, ese ye n̄kpaidem, onyụn̄ ọdọhọ ete: “Ada n̄wed emi ke m̀mọ̀n̄? Mmoyom enye ke ofụri isua 30! Mmasan̄a kpukpru itie unyam n̄wed nnyụn̄ mbụp ke kpukpru ebiet. Idụhe owo emi ekenyenede, idụhe owo emi ọkọfiọkde enye, n̄wed ndomokiet ikonyụn̄ ikpereke-kpere ndifọn nte enye.” Ke ini mma oro ekedide eyenọwọn̄, eyeneka eka esie ama enyene n̄wed Mme Mbụk Bible, ndien enye ama esima ndikot n̄wed oro. Idahaemi mma oro afiak ọtọn̄ọ ndikot n̄wed oro, ndien adiaha esie ama ndikot enye n̄ko. Ẹma ẹtọn̄ọ ukpepn̄kpọ Bible ye mmọ mbiba.