Esịt ama enen̄ede enem Freda emi edide inan ke ini enye ọkọfiọkde ke enye ye eyenete an̄wan oro esikpepde enye Bible ẹdidu ke akpa esop usem idiọn̄ọ ke Papua New Guinea. Ẹketon̄o esop oro ke March 1, 2013. Se ẹkenemede ke mbono esop ama enen̄ede an̄wan̄a Freda ke ini enye eketrede ndise n̄wed onyụn̄ owụk enyịn ese ke ini ẹnamde idiọn̄ọ ye ndise oro ẹwụtde ke mbot utịn̄ikọ. Ama  akpa enye idem ndikụt ke emi ikayakke enye okop bụt aba ndisibọrọ mbụme ke mbono esop, enye ọnyụn̄ ọtọn̄ọ ndibọrọ mbụme ediwak ini ke mbono esop. Ke April 2013, enye ama odot ndikabade ndi asuanetop oro mînaha baptism, ndien enye esikot mbon en̄wen oro ẹdide inan ẹtiene enye ẹdi mbono esop. Ke ini ẹkebụpde enye ntak emi mmọn̄eyet esiwakde ndisiaha enye ke mbono esop, enye ọkọbọrọ ete, “Sia an̄wan̄a mi ndien.”

Ke ini Barbara akawatde moto aka otu an̄wautom ke Australia, enye ama atuak ada ke mbenusụn̄ man ese m̀mê ima imen n̄wed mfiakn̄ka imọ. Usụn̄ moto ama ebererede ke mbuari, n̄wan kiet onyụn̄ oyom ndidụk.

Barbara ama ọdọhọ ete, “Mbọk kûyat esịt, etie nte idịghe moto oro ekebetde ke edi.”

Mma oro ama ọbọrọ ete, “Mbọk kûyat esịt. N̄kekere ke edi n̄wan oro ekedide ndimen mi.” Ke ini mma oro okokụtde Enyọn̄-Ukpeme ye Ẹdemede! Barbara, enye ama ọdọhọ ete, “Mma nsinyene mme magazine emi ediwak ini ko ke edem ke ini iban iba ẹkesidide ẹdikpep mi Bible.” Ama enem Barbara esịt ndinọ mma oro mme magazine ndien nte ini akakade enye ama ọtọn̄ọ ukpepn̄kpọ Bible ye enye.

Violet edi eyenete an̄wan isua 82 emi idem mîsọn̄ke, emi odụn̄de ke obio emi ekerede Christchurch ke New Zealand. Enye esinọ leta ye mme n̄wed ukpep Bible kpukpru ini ẹsọk mme itie emi ẹsede ẹban̄a n̄kani owo ye mbon n̄kpọnnam ye mme itie oro ẹsede ẹban̄a mbon oro ẹkperede n̄kpa. Mme nurse emi ẹnamde utom ke mme  ebiet oro, emi ẹsidade mme leta emi ẹkenọ ẹdọhọ ke n̄kani owo emi ẹsitetie ẹbet se mmọ ẹkotde leta Abasi. Ndusụk mmọ ẹsidi ẹma ẹkot leta ye mme n̄wed mmọ, mmọ ẹkpụhọ ye mbon eken mîdịghe ẹkot uyo ọwọrọ man mbon oro mîkwe usụn̄ ọfọn ẹkpetiene ẹkop. Mme nurse emi ẹdọhọ n̄ko ke n̄kani owo emi ẹsikotde mme leta ye n̄wed emi ẹsitie sụn̄sụn̄, ẹkere ke n̄kpọ ẹyefọn, ẹnyụn̄ ẹtie emem emem. Violet etịn̄ ntem aban̄a ukeme oro enye esịnde ndikwọrọ ikọ: “Mmenịm ke Jehovah ke adada mi an̄wam mbon en̄wen. Ndikwọrọ ikọ ntem anam mi n̄kop inemesịt.”

“Mma n̄kokot enye oro.” Ibọrọ emi Bernie mîkodorike enyịn mi ama akpa enye idem ke usenubọk Saturday kiet ke ini enye ọkọnọde mme owo ata obufa nsiondi Enyọn̄-Ukpeme ke Isuo Saipan. Enye ama ekere m̀mê Bernadette, emi edide eyen ufọkn̄wed ntaifiọk emi ekeberede usụn̄, akasan̄a didie okot obufa magazine oro mbemiso idade enye idi. Bernie ama esịn ubọk ke ekpat osio magazine en̄wen. Bernadette ama ọdọhọ ete: “Mma n̄kokot enye oro n̄ko.” Sia idem akakpade Bernie, enye ama obụp ete: “Afo okokot magazine emi ke m̀mọ̀n̄? Ndi afo edi Ntiense Jehovah emi edide nduọkodudu mi?” Bernadette ama ọdọhọ ke imọ idịghe Ntiense, edi ke ikokot mmọ ke Intanet. Usen kiet ke ini Bernadette okoyomde n̄kpọ oro aban̄ade mme flawa, enye ama ataip ikọ oro “rose” ndien idem ama akpa enye ndikụt kiet ke otu ibuotikọ emi ọkọwọrọde edi, emi edide: “Alluring Roses From Africa” (Ndiye Rose Africa), ibuotikọ Ẹdemede! emi ẹsịnde ke ikpehe Intanet Mme Ntiense Jehovah. Bernadette ama asian Bernie ke imọ ima ima ibuotikọ oro aban̄ade rose do tutu imọ itọn̄ọ ndikot mme n̄kpọ eken ke ikpehe Intanet oro. Akpa, enye ekesima ndikot n̄kpọ mban̄a mme eto ye unam edi ikebịghike ama okụt ndinem n̄kpọ oro ẹban̄ade Bible. Ke ini Bernie okokụtde ke Bernadette ama ndikpep n̄kpọ, enye ama ọdọhọ ke iyekpep enye Bible onyụn̄ asan̄a ye n̄wed Nso ke Bible Enen̄ede Ekpep? afiak aka ebịne enye. Ọyọhọ ikata oro Bernie akakade, enye ye Bernadette ẹkekpep akpa ibuot ke n̄wed oro. Ke n̄kpọ nte isua kiet ama ekebe, ke November 2012, Bernadette ama ana baptism. Enye ama anam usọp usọp n̄kọri tutu mme ufan esie ẹma ndisidọhọ ke enye “ekefefehe edidụk akpanikọ.” Ke akpanikọ ikpehe Intanet nnyịn ama anam enye ọsọp ọbọ akpanikọ.