Ke March 11, 1792, ata ediwak ifịn oro mbon America ẹkesanade ẹyak ẹma ẹsop idem ke idak Eto Mfriukịm oro ẹdia usọrọ edinyọn̄ ndi Africa. Usen oro ke mmọ ẹkesiak Freetown, emi ọwọrọde Obio Ubọhọ-Ufụn—kpa ubọhọ-ufụn oro mmọ ẹketiede ẹbet ke anyan ini. Ifịn en̄wen oro ẹkesanade ẹyak ẹma ẹka iso ndibehe, ndien nte ini akakade, ifịn emi ẹtode se ibede nsio nsio ekpụk 100 ke Africa ẹma ẹdibehe ke obio emi. Mmọ ẹma ẹkabade mbufa mme enyene obio ẹnyụn̄ ẹmek Eto Mfriukịm oro nte idiọn̄ọ ubọhọ-ufụn ye idotenyịn.

Ke se ikperede ndisịm isua 100 idahaemi, Mme Ntiense Jehovah ke Sierra Leone ke ẹdọn̄ mme mbọhọidụn̄ mmọ esịt ye etop ubọhọ-ufụn emi kpukpru owo ẹdinyenede, kpa “ubọn̄ ubọn̄ ifụre nditọ Abasi.” (Rome 8:21) Ifụre emi ediwọrọ ndibọhọ ufụn idiọkn̄kpọ ye n̄kpa ke ini emi Obio Ubọn̄ Messiah Abasi edidade emem idi, edinyụn̄ anamde isọn̄ akabade Paradise.—Isa. 9:6, 7; 11:6-9.

Ke se ibede isua 50 idahaemi, n̄kọk itieutom Mme Ntiense Jehovah ke Sierra Leone ese enyịn ke utom ukwọrọikọ ke Guinea, kpa idụt oro odude ke mbọhọ Sierra Leone. Ndutịme ke ntak ukpụhọ ukara, ntịme mbio obio, ye nsọn̄ọn̄kpọ ẹnen̄ede ẹnọmọ mme owo ke idụt emi. Mme mfịna emi ẹnam ediwak owo ẹma ndikop etop ndọn̄esịt emi Bible ọnọde.

Mme Ntiense Jehovah ke Sierra Leone ye Guinea ke ẹkwọrọ eti mbụk kpa ye ekese ubiọn̄ọ. Emi esịne nsọn̄ọn̄kpọ, ọkpọikpọi ubuene, unana ifiọkn̄wed, ido obio oro mme owo mîmaha ndision̄o idem n̄kpọn̄, ubahade ke otu mbio obio, ye enyene-ndịk afai. Mbụk oro etienede mi owụt ke mme asan̄autom Jehovah oro ẹnamde akpanikọ ke idụt mbiba emi ẹnyene ọkpọsọn̄ mbuọtidem ẹnyụn̄ ẹsọn̄ọ ẹda. Imenịm ke mbụk mmọ oyotụk fi oyonyụn̄ anam enen̄ede enyene mbuọtidem ke “Abasi emi ọnọde emem” ye idotenyịn.—Rome 15:13.