Satan oyom fi ebre mfọni. Ediwak owo ẹwa n̄kpọ ẹnọ mme ete ete m̀mê mme spirit mbak ẹdinọ mmọ unan. Mmọ ẹnam emi koro mmọ ẹkopde ndịk ẹban̄a odudu ererimbot mme spirit. Mmọ ẹsisịne n̄kpanuen m̀mê okpoho ubọk mfọni. Mmọ ẹsin̄wọn̄ m̀mê ẹfiọn̄ọ “ibọk” emi ẹkerede ke enyene odudu mfọni. Ke ufọk mmọ m̀mê ke isọn̄, ndusụk owo ẹsidịp mme n̄kpọ ẹmi ẹnịmde ke akpanikọ ke ẹnyene odudu ndikpeme owo. Mbon efen ẹkama “ibọk” mfọni koro mmọ ẹnịmde ẹte ke emi ayanam mmimọ ikụt unen ke mbubehe, udomo ufọkn̄wed, m̀mê ke uyomima.

Mfọnn̄kan ukpeme ndibiọn̄ọ Satan edi ndinyene Jehovah nte ufan fo. Jehovah Abasi ye mme angel esie ẹnen̄ede ẹnyene odudu ẹkan Satan ye mme demon esie. (James 2:19; Ediyarade 12:9) Jehovah enyene ọkpọsọn̄ udọn̄ ndiwụt odudu esie ke ibuot mme ufan esie—mbon oro ẹnamde akpanikọ ẹnọ enye ọyọhọ ọyọhọ.—2 Chronicles 16:9.

Ikọ Abasi ọdọhọ ete: “Ẹkûnyụn̄ ẹnam ibọk.” Jehovah obiom mfọni ye ifọt ikpe koro mme edinam oro ẹkemede ndisịn owo nnennen nnennen ke idak odudu Satan kpa Devil.—Leviticus 19:26.