Edieke afo oyomde ndidi ufan Abasi, ana afo odu ke ido ukpono oro Abasi enyịmede. Jesus ọkọdọhọ ete ke “ata mme andituak ibuot” ẹdituak ibuot nte ekemde ye “akpanikọ.” (John 4:23, 24) Nnennen usụn̄ kiet kpọt odu ndituak ibuot nnọ Abasi. (Ephesus 4:4-6) Ido ukpono akpanikọ ada esịm nsinsi uwem, ndien nsunsu ido ukpono ada esịm nsobo.—Matthew 7:13, 14.

Afo emekeme ndifiọk ido ukpono akpanikọ ebe ke ndise mme owo oro ẹdude ke enye. Sia Jehovah ọfọnde, mbon oro ẹdide ata mme andituak ibuot nnọ enye ẹnyene ndidi nti owo. Ukem nte eti sokoro esin̄wụmde nti sokoro, ido ukpono akpanikọ osion̄o nti owo edi.—Matthew 7:15-20.

Mme ufan Jehovah ẹnyene ntotụn̄ọ ukpono ẹnọ Bible. Mmọ ẹfiọk ẹte ke Bible oto Abasi. Mmọ ẹyak se enye etịn̄de ọnọ uwem mmọ ndausụn̄, ọkọk mme mfịna mmọ, onyụn̄ an̄wam mmọ ndikpep mban̄a Abasi. (2 Timothy 3:16) Mmọ ẹdomo ndinam se mmọ ẹkwọrọde.

 Mme ufan Jehovah ẹwụt ima ẹnọ kiet eken. Jesus ama owụt ima ọnọ mme owo ebe ke ndikpep mmọ n̄kpọ mban̄a Abasi, ebe ke ndikọk mbon oro ẹkedọn̄ọde. Mbon oro ẹdude ke ido ukpono akpanikọ ẹwụt ima ẹnọ mbon efen n̄ko. Ukem nte Jesus, mmọ isịnke mbon oro ẹbuenede m̀mê ẹtode isio isio ekpụk ke ndek. Jesus ọkọdọhọ ete ke mme owo ẹdifiọk mme mbet imọ ebe ke ima oro mmọ ẹnyenede ẹnọ kiet eken.—John 13:35.

Mme ufan Abasi ẹkpono enyịn̄ Abasi, Jehovah. Edieke owo esịnde ndikot enyịn̄ fo, nte owo oro ekpedi n̄kpet n̄kpet ufan fo? Baba! Ke ini nnyịn inyenede ufan, nnyịn imesikot enyịn̄ esie inyụn̄ itịn̄ nti n̄kpọ iban̄a ufan oro inọ mbon efen. Ntre mbon oro ẹyomde ndidi ufan Abasi ẹkpenyene ndikot enyịn̄ esie nnyụn̄ ntịn̄ mban̄a enye nnọ mbon efen. Jehovah oyom nnyịn inam oro.—Matthew 6:9; Rome 10:13, 14.

Ukem nte Jesus, mme ufan Abasi ẹkpep mme owo n̄kpọ ẹban̄a Obio Ubọn̄ Abasi. Obio Ubọn̄ Abasi edi ukara Abasi eke heaven oro edinamde isọn̄ edi paradise. Mme ufan Abasi ẹbuana eti mbụk emi aban̄ade Obio Ubọn̄ Abasi ye mbon en̄wen.—Matthew 24:14.

Mme Ntiense Jehovah ẹdomo ndidi mme ufan Abasi. Mmọ ẹkpono Bible ẹnyụn̄ ẹnyene ima ke otu idemmọ. Mmọ n̄ko ẹkot ẹnyụn̄ ẹkpono enyịn̄ Abasi ẹnyụn̄ ẹkpep mbon efen n̄kpọ ẹban̄a Obio Ubọn̄ Abasi. Mme Ntiense Jehovah ẹnam ido ukpono akpanikọ ke isọn̄ mfịn.