ẸKÛTIE KE NDUE-IDEM!
Nso ke Bible Etịn̄ Aban̄a Se Ikpọ Owo Ufọkabasi Ẹnamde Ẹban̄a Ekọn̄ Ukraine?
Kop se nsio nsio n̄wedmbụk n̄kpọntịbe ẹtịn̄de mi ẹban̄a se ikpọ owo ufọkabasi ẹnamde ẹban̄a ekọn̄ Ukraine:
N̄wedmbụk n̄kpọntịbe emi ẹkotde Euobserver eke March 7, 2022 ọdọhọ ete: “Patriarch Kirill, emi edide akwaowo Russian Orthodox Church ikọn̄ke-kọn̄ inyụn̄ ikwanakede iban̄a ekọn̄ emi Russia ẹn̄wanade ke Ukraine. . . . Ofụri nsu emi ufọkabasi esie ẹsude ẹdori Ukraine ọnọ adaibuot ukara Russia odudu ndidaha ekọn̄ ye Ukraine.”
N̄wedmbụk n̄kpọntịbe en̄wen emi ẹkotde AP News eke March 8, 2022 ọdọhọ esie ete: “Patriarch Kirill emi edide akwaowo Russian Orthodox Church . . . etịn̄ ikọ emi owụtde ke idiọkke ndika ekọn̄ ye Ukraine. Enye ọdọhọ ke ndin̄wana ekọn̄ ye Ukraine edi n̄kpọ kiet emi mîdiyakke idiọkn̄kpọ asuana.”
N̄wedmbụk n̄kpọntịbe emi ẹkotde Jerusalem Post eke March 16, 2022 ọdọhọ ete: “Akwaowo Ufọkabasi Orthodox ke Ukraine, emi ẹdiọn̄ọde nte Metropolitan Epiphanius I ke Kyiv ama ọdiọn̄ ikọt esie ke Monday ete mmọ ‘ẹken̄wana ye mbon Russia emi ẹdade ekọn̄ ẹdi’ . . . [Enye] onyụn̄ ọdọhọ ke ndiwot mbonekọn̄ Russia idịghe idiọkn̄kpọ.”
N̄ka nsio nsio ufọkabasi ke Ukraine emi ẹkotde UCCRO a ẹkedọhọ ke February 24, 2022 ẹte: “Nnyịn [N̄ka Nsio Nsio Ufọkabasi ke Ukraine (UCCRO)] ida ye mbonekọn̄ Ukraine ye kpukpru mbon oro ẹdade ye nnyịn. Yak Abasi odu ye mbonẹkọn̄ Ukraine nte mmọ ẹn̄wanade ekọn̄ ye mbon emi ẹdade ekọn̄ ẹbịne nnyịn. Imesịn kpukpru mbufo ke akam.”
Afo ekere didie? Ndi akpana mbon emi ẹdọhọde ke itiene Jesus ẹdọhọ ikọt mmọ ẹn̄wana ekọn̄? Nso ke Bible ọdọhọ?
Ebịghi ufọkabasi ẹketọn̄ọ ẹsịn idem ke ekọn̄
Mbụk owụt ke ufọkabasi ẹsiwak ndisịn nsọk nnọ ekọn̄ m̀mê nditịn̄ ikọ emi anamde owo ekere ke idiọkke ndin̄wana ekọn̄ kpa ye oro mmọ ẹnamde nte iyom ndisịn emem ke obio. Ebịghi Mme Ntiense Jehovah ẹketọn̄ọ ndiyarade utọ mbubịk oro. Mbọk tiene se uwụtn̄kpọ ifan̄ mi ke n̄wed nnyịn.
Ẹdemede! Ikọmbakara emi ẹkewetde ibuotikọ emi, “The Crusades—A ‘Tragic Illusion’” owụt nte Ufọkabasi Roman Catholic ẹkenamde mme owo ẹda enyịn̄ Abasi ye Christ ẹwot mme owo nte unen.
Ẹdemede! Ikọmbakara emi ẹkewetde ibuotikọ emi, “The Catholic Church in Africa” ama etịn̄ nte ufọkabasi mîkamaha ndikpan ikọt mmọ ndin̄wana ekọn̄ nnyụn̄ n̄kpan mmọ ini mmọ ẹkedomode ndisobo ofụri ekpụk kiet mfep.
Se mme ibuotikọ en̄wen emi ẹkewetde ke Ẹdemede! Ikọmbakara mi, “Is Religion to Blame?,” “Religion’s Role in Man’s Wars,” ye “Religion Takes Sides.” Ibuotikọ ita emi ẹtịn̄ nte ikpọ owo Ufọkabasi Catholic, Orthodox, ye Protestant ẹkedade ye idụt mmọ ke ekọn̄ ke ediwak isua.
Ndi akpana Christian etiene esịn idem m̀mê inua ke ekọn̄?
Se Jesus ekekpepde: “Afo enyene ndima mbọhọidụn̄ fo nte idemfo.” (Matthew 22:39) “Ẹka iso ẹma mme asua mbufo.”—Matthew 5:44-47.
Mbọk kere ise: Ndi ufọkabasi emi ẹdọhọde ke imama mme owo nte Jesus ekekpepde ẹkeme ndidọhọ ikọt mmọ ẹken̄wana ekọn̄ ẹwot mme owo? Ibọrọ mbụme emi odu ke ibuotikọ emi, “True Christians and War” ye “Is It Possible to Love One’s Enemies?”
Se Jesus ọkọdọhọde: “Obio ubọn̄ mi idịghe ubak ererimbot emi. Edieke obio ubọn̄ mi ekpedide ubak ererimbot emi, mme asan̄autom mi ẹkpen̄wana mbak ẹdiyak mi ẹsịn mme Jew ke ubọk.” (John 18:36) “Kpukpru owo eke ẹmende akan̄kan̄ ẹdikpa ke akan̄kan̄.”—Matthew 26:47-52.
Mbọk kere ise: Edieke Jesus mîkenyịmeke mbet esie ẹn̄wana ke ibuot esie, ndi emekere ke enye ekpenyịme mme Christian ẹn̄wana ke ntak ekededi? Mbọk kot ibuotikọ emi, “Ndi Odot Mme Christian Ẹn̄wana Ekọn̄?” man okụt nte mme Christian eyo oro ẹkekopde item Jesus ẹnyụn̄ ẹnanam se enye ekekpepde mmọ.
Nso iditịbe inọ mme ufọkabasi emi ẹdọhọde mme owo ẹn̄wana ekọn̄?
Bible ọdọhọ ke Abasi imaha ufọkabasi ekededi emi ẹdọhọde ke itiene Jesus, edi inamke se Jesus ekekpepde.—Matthew 7:21-23; Titus 1:16.
N̄wed Ediyarade ọdọhọ ke Abasi oyobụp utọ ufọkabasi oro iyịp “kpukpru mbon oro ẹkewotde ke isọn̄.” (Ediyarade 18:21, 24) Edieke oyomde ndifiọk ntak emi Abasi edinamde emi, kot ibuotikọ emi “Nso Idi Akwa Babylon?”
Jesus ọkọdọhọ ke kpa nte ẹsisịbede mbukpo eto “ẹtop ẹsịn ke ikan̄,” ke Abasi oyosobo kpukpru ufọkabasi emi mîmaha ndinam se enye ọdọhọde. (Matthew 7:15-20) Kot ibuotikọ emi, “The End of False Religion Is Near!” man okụt nte emi editịbede.
Ebiet emi ẹdade ndise ẹto, ọtọn̄ọde ke ufien ka nnasia: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a N̄ka Nsio Nsio Ufọkabasi ke Ukraine emi ẹkotde UCCRO, esịne ufọkabasi 15 emi ẹdide Ufọkabasi Orthodox, Ufọkabasi Greece, ye Ufọkabasi Roman Catholic, Protestant, Evangelical ye eke mme Jew ye Muslim.
Ekeme Ndidi Ayama Mmọ Emi N̄ko
MME IBUOTIKỌ EN̄WEN
Ndi Akpana Ido Ukpono Ẹsisịn Idem ke Pọlitiks?
Ediwak mbon emi ẹdọhọde ke idi mme mbet Jesus Christ ẹdodụk ẹnyịne ke pọlitiks. Ndi akpana mmọ ẹnam ntre?
Russia Ẹtọn̄ọ Ekọn̄ ye Ukraine—Ndi Prọfesi Bible Osu Emi?
Edieke edide ntre, ndi Bible etịn̄ nte kpukpru emi editrede?
ESSENTIAL BIBLE TEACHINGS
Nso Idi Obio Ubọn̄ Abasi?
Ini Jesus okodude mi ke isọn̄, enye ama esima ndikwọrọ mban̄a Obio Ubọn̄ Abasi. Mme owo ẹsima ndibọn̄ akam ẹte Obio Ubọn̄ oro edi.
MME IBUOTIKỌ EN̄WEN
Ndi Ido Ukpono Edi Usụn̄ En̄wen Ndida N̄n̄wana Okụk?
Ke ndusụk ufọkabasi, ediwak mbon emi ẹkade ufọkabasi oro ẹsidi mme ọkpọikpọi ubuene, edi ọkwọrọikọ mmọ enyene enyọn̄ ye isọn̄.
