Ini ọyọhọ ekọn̄ ererimbot iba okokụrede ke 1945, ata ediwak itie ke Germany akana ndon. Ẹma ẹwụri ata ediwak obio, mme ufọkn̄wed ẹna ukpọk, ẹbiat kpukpru n̄kpọ ke ufọkibọk, ndien ebiet eke ọwọn̄ọrede odụk, se edikụtde edi mme bọmb emi ẹketopde edi mmọ ibomoke. Mfịna efen ekedi ke udia ikekemke owo ubọk; ekpri udia emi okodude, urua ikedịghe se ẹtade ẹtịbi. Mbon emi mîkamaha ndinyam ntiene ibet emi ukara ẹkenịmde ẹma ẹnyam eke mmọ ọsọn̄ urua tutu. Ke uwụtn̄kpọ, bọta emi ọkpọyọhọde n̄kpri iko bọta iba ke ubọk mmọ ekedi okụkutom ọfiọn̄ kiet ye urua iba!

Kpukpru nnanenyịn oro ama etiene esịm ediwak nditọete nnyịn emi ẹkekọbide ke uwak isua ke ntak emi mmọ mîkamaha nditre ndinam n̄kpọ Abasi. Ini ẹsion̄ode mmọ ke ufọk-n̄kpọkọbi ke 1945, n̄kukụre n̄kpọ emi mmọ ẹkenyenede ekedi ọfọn̄ ufọk-n̄kpọkọbi emi mmọ ẹkesịnede ke idem. Mfịna eke nditọete eken emi owo mîkesịnke ke ufọk-n̄kpọkọbi ekedi ke inyene mmọ, ufọk mmọ, ye isọn̄ mmọ ẹma ẹtak mmọ. Biọn̄ ama ọdọn̄ ndusụk nditọete tutu mmọ ẹsụhọ ini mbono esop osụk akade iso.

Mme Ntiense Jehovah ke mme idụt en̄wen ẹma ẹsọsọp ẹnọ udia ye ọfọn̄ ẹsọk nditọete oro. Nditọete ke ibuot itieutom nnyịn ke United States ẹma ẹdọhọ nditọete emi ẹdude ke ọfis nnyịn ke Bern, ke Switzerland, yak ẹn̄wam nditọete ke Germany. Nathan H. Knorr, emi ibuot itieutom ẹkesiode ẹdọn̄ ekese se ikade iso ama aka Europe man ekese enyịn ke utom oro onyụn̄ an̄wam yak ẹsọsọp ẹnọ mme n̄kpọ oro ẹsọk nditọete nnyịn.

Udia, ọfọn̄, ye okụk emi nditọete ke Switzerland ẹkenọde ikedịghe ekpri. Ẹkebem iso ẹmen se mmọ ẹkenọde ẹka Bern. Utom nditọete ke Bern ekedi ndisat udia nnịm isio, nsat ọfọn̄ nnịm isio, ekem ẹdọn̄ mme n̄kpọ oro ke nsio nsio n̄kpọ ẹnọ ẹka Germany. Nditọete nnyịn ke Sweden, Canada, United States, ye ke mme idụt en̄wen ẹma ẹtiene ẹnọ n̄kpọ ẹken̄wam nditọete mmọ. Se mmọ ẹkenọde oro ama an̄wam nditọete ke Germany ye ke ediwak idụt efen emi ẹken̄wanade ekọn̄ ke Europe ye Asia.

Ke ufan̄ ọfiọn̄ ifan̄, ọfis nnyịn ke Switzerland ẹma ẹnọ kọfi, mmọn̄eba, suka, n̄kpọ nte ibokpot ye edesi, nsat mfri, ikọn̄, tian unam, ye tian iyak ẹda ẹken̄wam nditọete. Ẹma ẹnọ okụk n̄ko.

Nditọete ke Switzerland ẹma ẹnyụn̄ ẹnọ ata ediwak ọfọn̄ ẹsọk nditọete mmọ. Ndusụk ọfọn̄ emi mmọ ẹkenọde ẹkedi nnyan kod etuep, ọfọn̄ iban, ye kod irenowo emi asan̄ade ye ọfọn̄ukot. Enyọn̄-Ukpeme Ikọmbakara eke January 15, 1946 ọkọdọhọ ete: “Nditọete ẹkesion̄o ata nti n̄kpọ emi mmọ ẹkenyenede ẹnọ ẹsọk nditọete mmọ. Mmọ ẹma ẹyak n̄kpọ atak mmọ man ẹkeme ndin̄wam nditọete mmọ ke Germany.”

Ikpaukot emi nditọete ke Switzerland ẹkenọde ama ekpere ndisịm ukot ikpaukot 1,000. Edi ẹma ẹkụt ẹte ke mme ikpaukot oro ẹsụk ẹfọfọn se ẹsịnede mbemiso ẹnọde ẹsọk nditọete mmọ. Ini mme ọfọn̄ ye ikpaukot ẹkesịmde Wiesbaden ke Germany, idem ama akpa nditọete emi ẹkekpọkde mme n̄kpọ oro ndikụt utọ nti n̄kpọ emi ẹkenọde ẹdi. Eyenete kiet ama ewet ete: “N̄kereke ke enyene itieurua ndomokiet ke Germany emi ẹnyenede utọ nti ọfọn̄ ye ikpaukot ntem ẹnyam.”

Ẹkesụk ẹnọnọ n̄kpọ ẹken̄wam nditọete tutu ke August 1948. Kpukpru se nditọete ke Switzerland ẹkenọde ẹsọk nditọete mmọ ke Germany ẹkedụk ikpọ ikpọ ekebe 444. Ima itetịn̄ ke idịghe nditọete ke Switzerland kpọt ẹkenọ n̄kpọ yak ẹken̄wam nditọete mmọ. Edi mmọ ẹkesịne ke otu mbon emi ẹkpride ẹkan, emi ẹketienede ẹn̄wam, sia ini oro Mme Ntiense Jehovah 1,600 kpọt ẹkedu ke Switzerland!

Jesus Christ ọkọdọhọ ete: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” (John 13:​34, 35) Ima akanam ikọt Jehovah ẹsion̄o ata nti n̄kpọ emi mmọ ẹnyenede ẹnọ ẹsọk nditọete mmọ, inọhọ usat-usụhọ. (2 Corinth 8:​1-4) Leta kiet emi nditọete ke Zurich ẹkewetde ọkọdọhọ ete: “Ediwak nditọete emi ẹtịpde okụk ẹdi ubuene. Edi mmọ ẹyom ndin̄wam nditọete mmọ.”

Ke ukọbọ ye ekọn̄ ama eketre ke Germany, ikọt Jehovah ikabiatke ini ndifiak ndaha nda ikpat iba. N̄kpọ kiet emi akan̄wamde mmọ ekedi nte nditọete ẹkenyenede ima ẹtat ubọk ẹnọ n̄kpọ ẹsọk mmọ, ye nte mbon emi ẹkesede ẹban̄a ndutịm oro ẹkenamde yak mme n̄kpọ oro ẹsọsọp ẹkesịm nditọete ubọk.