AYÈGÈ 46

Asu dzé wò yeane ve wòmen nguma abe Zamba, o duben fe?

VOGOLO A

A ve wòmen nguma abe Yéhova wa tilen na, wò kaa nyè a ngogelen na, ve nnye étam wò yi lugu, ai na wò yi fe telé nyien woé osu énying dzoé (Salmen 40:8). Éyòng té wò duben asu yi na o lere é bot bevòk a ngeng na o veya wòmen nguma abe Zamba. Ntsigen wò nòng na wò ve wòmen nguma abe Yéhova o ne nfi abui. Dzé é ne wò tindi na o nòng akia ntsigen té?

1. Dzé ya tindi mot na a ve émen nguma abe Zamba?

Éding ndzò ya tindi mot na a ve émen nguma abe Yéhova (1 Yohannes 4:10, 19). Bibel a béndé bia na: “Wò yeane ding Yéhova Zamba woé ai nnem woé ose, ai nsisim woé ose ai ngul dzoé ése” (Markus 12:30). Bia lere na bia ding Zamba seki ve nyène a minkòbò tò a mimbòen miaan fe. Ane ngul éding ya tindi fam ai mininga na be lug, akia deda fe, é ngul éding bi bele asu Yéhova ndzò ya tindi bia na bi ve biabeben nguma abe nyè, bi duben fe.

2. Bemaa befé Yéhova a ve é Beboala boé be dubeneya?

Nduen wa yi bò na o nyii a nda bot Yéhova. Éyòng té fe wò yi yen ane a lere wò éding dzié ai abui mezen, nala a yi hm wò vòli na o tuene nyè subu babi (Langʼa Malakias 3:16-18). Nde fe, Yéhova a yi tòbò Ésia woé, éyòng té fe wò yi tòbò mbòk ya babedzang ai bekal baan ya si ése, a ba ding nyè, be ding fe wò (Langʼa Markus 10:29, 30). Ane bi yeneya, wò yeane bò mam mezing osusua yi na wò duben. Wò yeane tari yègè yem Yéhova, o ding nyè, o bi fe afiri ai Mòn woé. Amvus ya été, o ne ve énying dzoé nguma abe Yéhova. Éyòng o maneya bò mam meté mese, o duben fe, éyòng té hm wò yi tari na wò wulu a zen ya énying kòm. Ébug Zamba ya dzo na: “Nduen . . . wa nyii mina” (1 Pétrus 3:21).

TUENE FAG

Bi tam yen asu dzé a ve wòmen nguma abe Yéhova ai a duben bi ne nfi abui.

3. Bia bese bia yeane tòb za bia yi sié

A melu ya mvus, bòn be Israel bezing be mbe tsog na be ne kang Yéhova be kang fe évovol zamba Baal. Ve Yéhova a nga lom nkuli medzo woé Élias asu yi na be tséndé nyenen mam waba. Langʼa 1 Minkukuma 18:21 ai yalen a nsili hi:

Ntòben mbé bot ya ayòng Israel be mbe yeane bò?

Ane bòn be Israel, bia yeane tòb za bia yi sié. Langʼa Lukas 16:13 ai yalen minsili mi tsaa mi:

Asu dzé bia yeane ki kang Yéhova, bi kele fe osu na bia kang mot zing ngeki dzom zing éfe?
Akia afé bi ne lere Yéhova na nnye étam bia tòb na bia kang?

4. Nòng abog ya bindi éding ya Yéhova a bele asu doé

Yéhova a nga ve bia abui bifaa a bi ne mbeng. Mfaa waan dzé bi ne nyè dzam ve? Bebege VIDÉO.

VIDÉO: Bò mimveen asu Zamba (3:04)

Akia afé Yéhova a lereya na a ding wò? Langʼa Salmen 104:14, 15 ai 1 Yohannes 4:9, 10, ai yalen minsili mi tsaa mi:

Bifaa bi Yéhova bifé wò dang ding abui?
Dzé wò woren asu Yéhova éyòng wò tsog bifaa bité?

Bia ding abui éyòng mot zing a ve bia éfaa, dzom té nde bia ve mot té ngang. Langʼa Deutérònòm 16:17 ai yalen a nsili hi:

Éyòng wò tsog é mam mese Yéhova a bòya asu doé, dzé wò yi na wò ve nyè?

5. A ve wòmen nguma abe Yéhova a zu ai abui bemaa

Abui bot da tsog na duma, mfang asu ésié ngeki mòni mbiè bia ve mintak. Ye a ne fò nala? Bebege VIDÉO ai yalen minsili mi tsaa mi:

VIDÉO: Ndamba a nga be é dzam a mbe dang nfi énying dzama (5:45)

Tò ane Andrey a nga be dingʼi lè ndamba, asu dzé a nga dzogè asu ésié té?
A nga nòng ntsigen na a belen ai énying dzié asu yi na a sié Yéhova aloro na a lè ndamba. Ye wò tsog na a nga nòng mbembe ntsigen? Asu dzé?

Osusua yi na a vengʼen kristen, apostel Paul a nga yègè nyebe yuden abe nyegele nnen. A nga be a bele mfang asu ésié, ve a nga dzogè ésié té asu yi na a vengʼen kristen. Ye a nga singi fò ngaa? Langʼa Filippi 3:8 ai yalen minsili mi tsaa mi:

Asu dzé Paul a nga be a yene é mam mese a nga bò osusua yi na a vengʼen kristen ane “mbuen”?
Bemaa befé a nga bi?
Mfaa woé, dzé ya yi bò na o buli tòbò mintak: a sié Yéhova ngeki a bò dzom éfe énying dzoé?