1-2. Amu dzé bia tobe Ésesang ôsiman awu Yésu kada mbu ?

 É NTOO mimbu 2 000, ave Yésu a nga ve éning dèñ akal dèè, é yoo zen nfa ye naa, bi bele éning é ne mbèmbèè. Alu kaa naa a wu, Yésu a nga dzô beyeghle bèñ naa, be simane mboane édzing wèñ, béé bo fave ôyôm moan ésesang, béé belane nfem ya vino—1 Becor. 11:23-26.

² Bia bo Yésu mewokh amu bia bira ñe dzing (Jean 14:15). Kada mbu, é tam Ésesang ôsiman awu Yésu, bia lere naa bia bira dzing é dzam a nga bo. Bia ñong tam naa, bia binane meyaghlan été, ayilgha ye awu dèñ akal boan be-bôt. Éde ya n’nem ôse, bia koghle tam minkanghle ye luè abuiñ bôt, naa be zu tobe ye bia ngura aval ésesang té. Éde bia ñong nkighane naa, biaa ye ki likh dzam ézing é ve naa, bi taa tobe Ésesang ôsiman awu Yésu.

3. Za mam bia ye yen ayeghle di été ?

³ Ayeghle di été, bia ye yen meval melal ayong Jehôva da ve mengu’u naa, é tobe Ésesang ôsiman awu Yésu : (1) béé bo mam ane Yésu a nga takh me, (2) béé bane é bôt bevoo ésesang té, ye (3) béé bo ésesang té amben bitéñ bi ne be nzukh.

4. Be bebela bevé ba ngônô Ésesang ôsiman awu Yésu kada mbu, amu dzé biaa yiène ki ñong be bebela beté ane é dzôm bii se ki dzimle ? (Luc 22:19, 20)

⁴ Kada mbu, é tam Ésesang ôsiman awu Yésu, bia bèè ntun ya Bible wa ve biyalan ébe minsili minzing. Bia yeghe amu dzé boan be-bôt ba yi ntang, ye aval awu moan môt mboo é ne dzame minsem abuiñ bôt. Wa simane fe bia é  dzôm nfem ya vino ba yili, ye beza ba yiène dzi ye ñu biôm bité (A lang Luc 22:19, 20). Éde bia binane ébe biboran bia yane é bôt be bele ôyane ya ning a si va mbèmbèè (Esaïe 35:5, 6 ; 65:17, 21-23). Biaa yiène ki ñong be bebela beté ane é dzôm bii se ki dzimle. Baakuru be-bôt baa yem ki be bebela beté, ye naa, baa yem ki éban ntang Yésu ô bele. Baa dzemle ki Ésesang ôsiman awu Yésu aval ane émièn a nga takh de. Amu dzé ?

5. Niène abuiñ mintôl Yésu mi nga mane wu, aval avé bôt be nga sum dzemle awu dèñ ?

⁵ Avitsang tam, niène môra ngap ye mintôl Yésu mi nga mane wu, bivus bekristen be nga sum ñii ékôan été (Mat. 13:24-27, 37-39). Be nga kobe « bikoar-koat bi-mam nfa ye naa be duru beyeghe Christ ébe be » (Bisè mintôl 20:29, 30). Éde, « ékoar-koat dzam avoo » bivus bekristen be nga sum yeghle é mbe naa, Yésu éé dzi ke ve é ñuu dzèñ « éyong daa akal a dzame minsem abuiñ bôt », aval ane Bible a dzô de. Ve naa atungha dèñ, ba yiène de baalé abuiñ biyong (Behéb. 9:27, 28). Ya dzam té, ému wi, abuiñ bôt ba kômô sèhane Jehôva ye n’nem ôse ba bunu bivus meyeghle meté. Ba kôane menda-menzame abuiñ biyong, tam ézing melu mesese, naa be bo é dzam be nga sughlane luè naa « comunión nge ki communion. » b Min’yebe mivoo, miaa simane ki awu Yésu biyong bisese, ve bôt be ne min’yebe mité, baa tugha ki yem é dzam ntang Yésu wa dzale. Bevoo b’ézing be ne sili naa, ‘Ye awu Yésu é ne faa dzame minsem miam ?’ Amu dzé ba sili dzam té ? Biyong bizing bôt beté ba tem aval té, amu ba bunu minèè é bôt ba kanghle naa, ntang Yésu a nga ve, wéé se ki dzam minsem. Za éyalan beña beyeghe Yésu be nga ve nsili té ?

6. Mbu 1872, za dzam moan nsama beyeghe Bible be nga wokh ?

⁶ Mbu 1870, Charles Taze Russell ye moan nsama beyeghe Bible, be nga sum naa ba tugha fakh Mintsili. Be nga kômô yem bebela, nfa ayilgha ye atungha Yésu, ye aval ba yiène dzemle ésesang ôsiman awu dèñ. Mbu 1872, be nga wokh naa, Yésu a nga ve éning dèñ ane ntang éyong daa akal boan be-bôt besese. Béé dzi ki baghle é mam be nga yen vèè akal bebién. Ve, be nga ve naa, é bôt bevoo be yem de ngalane mebakh, be periódicos, bejournaux nge ki be vééghan ôyô. Éde, avôô-avôô, amu be nga kômô vu bekristen be ye ntet mimbu ôsua, be nga sum naa, ba kôane fave éyong daa ébe mbu, naa be dzemle Ésesang ôsiman awu Yésu.

7. Aval avé bia buane mindzeng beyeghe Bible ôsua be nga bo ?

⁷ Ému, bia buane é mam bekristen beté be nga yeghe ébe abuiñ mimbu mvus. Aval avé ? Ya biboran Jehôva, é mis mèè me yongbaneyang nfa é bebela a daghe atungha Yésu a nga ve, ya é mam atungha té da dzale (1 Jean 2:1, 2). Bi yegheyang fe naa, Bible a ve mengiagh mebèñ akal é boan be-bôt ba ve Nzame n’nem mbeng, éning é ne kaa awu a dzôp été akal bevoo, y’éning é ne mbèmbèè akal bizukh bivoo. Bia bera yit Jehôva bebéñ éyong bia fas nté mbé a dzing bia, ye aval avé kada môt y’ébe bia abuan ye atunegha Yésu a nga ve (1 Pierre 3:18 ; 1 Jean 4:9). Éde, aval ane besôsôe bobedzang be ye metam ô mvus be nga bo de, bia fe, bia bane é bôt bevoo naa be zu tobe ya bia Ésesang ôsuman awu Yésu, ye dzemle de aval émién a nga takh de.

8. Za dzam ayong Jehôva é bo-hang naa be bane é bôt bevoo Ésesang ôsiman awu Yésu ? (A daghe évaghle).

⁸ Ayong Jehôva é nga bane bôt Ésesang ôsiman awu Yésu ébe abuiñ mimbu. Niène mbu 1881 ô nga kuiñ, a ne be nga bane bobedzang ya bekal bèè be ya Estados Unidos naa, be ke ngura aval ésesang, a nda ézing ye Allegheny, a Pennsylvania. Ôsu vèè, kada ékôan é nga bo Ésesang ôsiman awu Yésu dèñ. É Ngoan lal ye mbu 1940, be nga dzô bekar fuèñ naa, be ntoo bane bôt be ye mebeng minkanghle meba ba kômô, ésesang té. Mbu 1960, é mbe éyong ôsua Béthel a nga ve bikôan mefep nluèn akal ésesang. Atéé ye tam té, be nga ve baakuru be-bôt mefep nluèn akal ésesang. Amu dzé bia lôt abuiñ tam ye ve abuiñ mengu’u naa bi bane bôt befe ?

9-10. Beza ba buane ya mengu’u bia ve naa bi bane bôt Ésesang ôsiman awu Yésu ? (Jean 3:16)

⁹ Akalgha évoo bi bele naa bia bane bôt Ésesang ôsiman awu Yésu, é ne amu bia kômô naa, é bôt ba ye tobe ya bia éyong ôsua, be yem é bebela a daghe é dzam Jehôva ba Yésu be nga bo akal bia besese (A lang Jean 3:16). Bia bune naa, é mam ba ye yen ye wokh Ésesang ôsiman awu Yésu, ma ye be tsini naa, be kômô yeghe abuiñ mam, ya be be-bo bisèñ Jehôva. Ve, bôt befe baa ba buane fe de.

¹⁰ Bia bane fe é bôt baa sèhane ki fe Jehôva. Bia bo de amu bia kômô naa, be simane naa Nzame a ngen a dzing be. Abuiñ y’ébe be, ba zu nluèn bia ve be, éde da ve bia mesan éyong bia yen be. A tobe Ésesang  ôsiman awu Yésu, da simane be, nté mbé be nga dzing ba sèhane Jehôva metam ô mvus. Fasghe éfônan Mónica. c A nga bera sum naa a sèhane Jehôva metam COVID-19. Niène a nga so Ésesang ôsiman awu Yésu, ye mbu 2021, a nga dzô naa : « Ésesang ôsiman awu Yésu di, é mbaa ngura aval ésesang akal dam. A mbe éyong ôsua ébe mimbu 20 me nga kanghle é bôt bevoo ye bane be Ésesang ôsiman awu Yésu. Me nga ve n’nem wom ôsese naa ma bo de, amu me mbe méé bira dzing é dzam Jehôva ba Yésu be nga bo akal dam » (Bya 103:1-4). A bo naa bôt ba yebe nluène wèè nge ki kaa, bia bane é bôt bevoo ya mengu’u mesese Ésesang ôsiman awu Yésu, bii yem naa, Jehôva a bira dzing a yen mengu’u bia ve.

11. Aval avé Jehôva a nga borane mengu’u bi nga ve naa, bia bane bôt Ésesang ôsiman awu Yésu ? (Aggée 2:7)

¹¹ Jehôva a nga bira borane mengu’u bi nga ve naa bi bane bôt Ésesang ôsiman awu Yésu. Mbu 2021, amben biki be nga ve étom ôkoan COVID-19, bi nga lang bôt tang 21 367 603 be nga tobe Ésesang ôsiman awu Yésu. Nomo té a lôt biyong bibèñ y’étun é nomo Bengaa Jehôva be ye si ése ngura ! Bebela a ne naa, Jehôva aa dang ki bis é nomo bôt be va tobe ésesang té. Boan be-bôt ébe a dang bis (Luc 15:7 ; 1 Tim. 2:3, 4). Bia bunu ye n’nem ôse naa, éyong bia ve bôt mefep nluèn, Jehôva a vole bia a yen é bôt be bele mbemba min’nem—A lang Aggée 2:7.

12. Za bitéñ bi ne ve naa a tobe Ésesang ôsiman awu Yésu é bo bia ayeñ ? (A daghe évaghle).

¹² Yésu a nga dzô naa, melu me y’asughlan, bia ye tubane abuiñ meval bitéñ bi ne ayéñ, a lang été, menda me-bôt ma tebe bia é ngam ayat, bitsible, melumane, akoan, y’abuiñ mam mefe (Mat. 10:36 ; Marc 13:9 ; Luc 21:10, 11). Biyong bizing, bitéñ bité, bi ne ve naa, a tobe Ésesang ôsiman awu Yésu é bo bia ayéñ. Za dzam bobedzang ye bekal bèè be bo-hang naa be dang bitéñ bité ? Aval avé Jehôva a nga vole be ?

13. Aval avé Jehôva a nga borane ayokh ye nkighane Artem a nga ñong naa, a tobe Ésesang ôsiman awu a too mimbokh ?

¹³ Mimbokh. É bobedzang bèè be ne mimbokh étom mebun meba, ba bo é dzam ésese be ne bo naa, be tobe Ésesang ôsiman awu Yésu. Fasghe éfônan Artem. Mbu 2020, sono ébèñ kaa naa Ésesang ôsiman awu Yésu é kuiñ, be nga fet ñe é moan édzina a bele fave be metros cuadrados 17, ye mimbokh mitan mife étéñ dèè. Amben a mbe a fere mimbokh, a nga kôane ayôm boan be biôm nfa ye naa a belane bie, ane mendem ba belane me Ésesang ôsiman awu Yésu, ye kômane naa a tebe ntun akal émièñ. Ve mimbokh mivoo, mii mbe ya ñe be mbe béé bira ñu sigha ye kule mbimbia bifiè menu. Za dzam a nga bo ? A nga sili be, nge be ne tobe kaa kule mbimbia bifiè ye kaa ki ñu sigha fave tang awala daa. Kaa naa Artem a nga yane de, mimbokh mivoo mi nga yebe naa baa ye ki ñu sigha nge a kule mbimbia bifiè éyong Ésesang awu Yésu da ye lôt. Artem a dzô naa : « Me nga dzô be naa ma kômô be kobe adzô Ésesang ôsiman awu Yésu. » Amben be nga dzô naa baa kômô ki de bèè, ve, niène be nga yen ye bèè a ne Artem a bo ntun akal Ésesang ôsiman awu Yésu, a ne be nga sili ñe é dzam da larane ésesang té, ye abuiñ ngang.

14. Za mengu’u bi nga ve nfa ye naa bi tobe Ésesang ôsiman awu Yésu amben ôkoan COVID-19 ô mbe ?

¹⁴ Ôkoan COVID-19. Éyong ôkoan té ô  nga so, ayong Jehôva éé mbe ki fe tobe nsama vôm mboo, akal Ésesang ôsiman awu Yésu. Ve, dzam té déé dzi ki likh naa, be taa dzemle Ésesang ôsiman awu Yésu. d Bikôan bi bele internet, bi nga bo Ésesang ôsiman awu Yésu ngalane video conferencia. Ve, dzi nga lôrane ye bizukh bi-bôt biaa mbe ki bi bele internet menda meba ? Ébe mesi m’ézing, be nga bo minkôman naa be lere Ésesang ôsiman awu Yésu biwala bingengeng nge ki biwala minkobe. Ane ki vèè, minten bikôan mi nga konghlane ntun té, tang minkobe a lôt 500, a bo naa, amben é bôt be too é vôm ô ne édedèè ôyap, baa fe, be dzemle Ésesang ôsiman awu Yésu. Éde, besôsôe bobedzang baa be nga bo minkôman béé ñong meking é bôt be nga tebe mintun ye ke mi kee é bôt be nga yi mie.

15. Za dzam bia yeghe ya éfônan n’yeghe Bible ézing a too éyôla naa Sué nge ki Sue?

¹⁵ Éyong é nda-bôt duè da tebe wa é ngam ayat. Ébe bôt b’ézing, é dzam da dang be nzukh naa be tobe Ésesang ôsiman awu Yésu, é ne éyong é nda-bôt deba é tele be é ngam ayat. Fasghe éfônane n’yeghe Bible  ézing a too éyôla naa Sué. Mbu 2021, môs mboo kaa naa Ésesang ôsiman awu Yésu é kuiñ, Sué a nga dzô n’yeghle Bible wèñ naa, aa ye ki tobe Ésesang ôsiman awu Yésu, amu bôt b’ézing be ye é nda-bôt dzèñ ba tebe ñe é ngam ayat. N’yeghle Bible wèñ a nga lang ñe nten Luc 22:44. Ane a nga lere ñe naa, éyong bia tubane metam me ne minzukh, bia yiène béé éfônan Yésu, bii daghe ébe Jehôva meyaghlan été, ye ve mebun mesese mèè ébe ñe. É môs ô nga berane vèè, Sué a nga mane kômane nfem ya vino akal Ésesang ôsiman awu Yésu, ye daghe ngura aval éngengeng be nga kôman akal ayeghe ye kikiri a nden wèè jw.org. Alu té, nté a mbe étam édzina dèñ été, a nga daghe Ésesang ôsiman awu é teléfono wèñ été. Ane a nga tsili n’yeghle Bible wèñ naa : « Ô nga bira me tum asi ôngué. Me va bo é dzam sese me mbe bo, naa me tobe ésesang té. Jehôva ña a va bo abim avoo. Maa se wô mane kat abim avé ma ve Jehôva akiba amu mbeng a va bo ma ! » Ye wa bunu naa, Jehôva a ne fe wô vole nge waa fe, wa tebe aval étéñ té ?

16. Amu dzé bi bele ndzi-n’nem naa, Jehôva a ye borane mengu’u bia ve naa, bi tobe Ésesang ôsiman awu Yésu ? (Beromain 8:31, 32)

¹⁶ Jehôva a bira dzing a yen mengu’u bia ve naa, bi tobe Ésesang ôsiman awu Yésu. Bi ne tobe ndzi-n’nem naa, a ye borane bia, amu bia yem mbeng a nga bo akal dèè (A lang Beromain 8:31, 32). Éde, n’ñonghane nkighane naa, bia tobe Ésesang ôsiman awu Yésu mbu wi, ye bo é dzam sese bi ne bo naa bi koghle ésèñ minkanghle dèè é tam Ésesang ôsiman awu Yésu.